Platforma Kurdên Ewrûpa ji
Tony Blaîr ra name şand

Beşa UK (Îngilistan) ya Platforma Kurdên Ewrûpa ku ji 33 partî, komele û înîsîyatîfan pêk tê, li ser bûyerên dawî ji Serokwezîr Tony Blair ra nameyek şand. Di namê da behsa plana Tirkîyê tê kirin ku dixwaze êrîş bibe ser Kurdistana Başûr û dagir bike, encamên ve yekê yên xirab tê nîşan dan û ji Blaîr tê xwestin ku dijî vê êrîşgerîyê derkeve.

Name bi Îngilizî hatîye nivîsandin û di malpera me da, beşa Îngilizî da heye. Di namê da usa tê gotin.

“Em êrîşgerîya Tirkîyê û plana dagirtina Kurdistana Başûr wek xetereke mezin dibînin. Ev yek dikare encamên gelek xirab bide li temamîya Rojhilata Navîn û bi taybetî li Tirkîyê.

Em hemû jî dixwazin ku piştî ruxandina sazûmana saddam li cîyê wê sazîyeke demokratîk û aramî bê rojhilata Navîn. Lê ev êrîşgerîya dewleta Tirk dikare vê guhartinê bike xeterê. Em bawer in ku dema Kurd, di İraqeke federal û demokrat da welatê xwe bi destê xwe îdare bikin, tu zirara vê yekê bi Tirkîyê ra tune. Serda jî, İraqeke bi pirpartî û pirdengî, ango ¢raqeke federal û demokrat wê tesîreke baş bike li ser aşitî û aramîya Rojhilata Navîn.

Divê hûn destûr nedinê ku Tirkîye êrîş bibe ser Kurdistana İraqê. Hemû serokên Kurd ên İraqê bi yek dengî dijî vê êrîşa bî dawet û provokatîf in.”

Digel vê nameyê, Kurdên Îngilistanê yek yek bi yek jî ji partîyên sîyasî ra, ji sazîyan ra, bi taybetî ji parlamenterên herema xwe ra name şandin, ew agahdar kirin û ji wan xwestin ku dijî vê êrîşgerîyê bêdeng nemînin.