Cem û Cemat

Çeko Kocadag

 Gelê waxto, ke ez cem û cematan ra, rewşan û îdîyan ra, veyve û govendan ra, şîn û şahîyanê welatî ra durî kewta. Çito ke merdim têşanîye dest bikewkerîyo we, ez kî henî bîya têşanê bera (adet) û kulturê şarê xo yê bindestî. Ê kewtê re mi vîrî, fênda bijika binadirî.

Merdim, her çiqas ke îta Ewrûpa de tayê çîyan yad bikero kî, tamê cemanê welatî çîyêde bîn o. Heyanî ewro, Ewrûpa de nesîb nêbî, ke ez cemêde amade bibî. No firsend, bi destê Cematê Dêrsimî yê Berlînî, 19.Gucige 2000 de, kewte re mi dest. Ez peyco henî terewîya (fikirîya), ke nê cemî binûsnî. Seba ke heyanî nika nênûsîyê û têvter bîyê vîndî. Heq (Homa) pîrê Sêydalî ra razî bo. O, mi rê bareyê nîyaz-dua û degêrayena cemî de bî yarmetkar, ke no nûs bêro huzbar. Dewrêş Îsmaîl û Dewrêş Doxanî, seba yarmetkarîya deyşan ra weşûwar bê.

Na cem de, tayê çîyî bi mi zêdê ya kî vûrîyaye ameyî. Henî êno re mi vîrî, ke cemanê verênan de xoşebere (sohbet) û şîretî gumra bîyî. Bi kirmanckî (zazakî) venga heqî, êr-ewlîyanê ma dîyêne. Deyş û nîyazî bi kirmanckî amêne wendene û vatene. Cemanê ewroyan de, ziwanê (zon) cemî yo kirmanckî bîyo tirkî. Waştena Cematê Dêrsimî ser, her çiqas pîrê Sêydalî cat kerd, ke nê cemî bi kirmanckî bigêro de kî, re ser nêkewt. Ancî kî, na yewe seba vereroje gamêde hêca ya. Ganî, naye ra tepîya kar û gureyê pîr û rayberanê ma, bi ziwanê kirmanckîyî cemdegirewtene û duadayene bo. Şarê ma kî, êndî fênda şaranê bînan, nega û duayan ziwanê xo de bikero.

Çîyên ke mi cem de qeydê teyîbî kerdê, ya kî uca vînîtê, wazena ke înan bêkêmîye pêşkêşê şima wendoxan bikerî. No nûs reya verî, edi kovara Vateyî (hûmar 11) de neşir bî. Mi seba kêyepelan newe ra redekte kerd. -ÇK

Cem