FKKS: Sî saliya xwe pîroz kir

Federasyona Komeleyên Kurdistanê li Swêdê di 14`ê meha Gulana 2011 de, di gel endamên Komîteya Karger û Komîteya Giştî yên kevin û yên nû, serokên komeleyên endam, nûnerên rêxistin û ragihandinê, 30-mîn salvegera Federasyona Komeleyên Kurdistanê, bi Komîteya Giştî ku ji hemû endamên kevin û nû, bi konferans û şahîyekê pîroz kir.

Di konferansê de kesên di damezrandina FKKS`ê de cîh girtibûn, û kesên di organên Federasyonê de kar kirinê, serokên kevn û nû, kesên ku ked û mil dane kar û xebatên FKKS`ê, li ser xebat û serpêhatiyên xwe peyivîn. Hema hema ji sî salan vir ve kesên ku di organên FKKS`ê de kar kirine, hatin xelat kirin. Pîroz kirina sî saliya FKKS`e, bi şahiyek berdewam kir.

Partî û rêxistinên siyasî û civaki yên Kurd jî wek; PDK,YNK,HDK-Îran, Komîteya Hevkariya Hêzên Siyasî, PSK û gelekên din jî bi axaftin û peyamên pîrozbahiyê beşdarî şahiya pîrozkirina sî saliya FKKSê bûn.

Ji bo pîrozkirina sî saliya FKKS`ê, Konfederasyona Komeleyên Kurdistanê li Ewrûpa-KOMKAR.eu jî hatibû dawetkirin. Peyama Serokê KOMKAR.eu yê Kovan Amedî usa bû:  

Ji bo sî saliya Federasyona Komeleyên Kurdistanê li Swêdê

Pêşî dixwazim li ser navê Konfederasyon Komeleyên Kurdistanê li Ewrûpa   KOMKAR.eu yê, 30 saliya Federasyona Komeleyên Kurdistanê li Swêdê, ji dil ve pîroz bikim. Sî sal di jiyana rêxistinek demokratîk de ne hindike.   

Rêzdaran,

Federasyona Komeleyên Kurdistanê li Swêdê, ji avabûna xwe heta nûha, di warê  parastin û pêşvebirina ziman, çand û folkora Kurdî de, di warê çareserkirin pirsên civakî   yê civata Kurd li Swêdê û her wisa di warê danasîna pirsa Kurd de, ango di warê çêkirina lobîyê de,  xebatekî giranbuha  daye. Em wek KOMKAR.eu, qîmetek mezin didin kar û xebatên FKKS´ê.  

Hêjayan,

Wextekî em rêxistinên penaberan bûn. Rewşa Kurdên berî sî salan û ya îro ne wek hev e. Rewşa Kurdan li Ewrûpayê hatiye guhartin. Êdî em ne Kurdên penaberin, Kurdên  Ewrûpayê ne. Loma jî divê rêxistinên me yên demokratîk li Ewrûpayê li gor demê û pêdivîstiyên demê xwe bigorîne û dizaynek nû bide kar û xebatên xwe.

Pêşveçûna teknolojiyê di cihana mezin da, têkiliyên însanan gelek nêzîk kiriye. Ango   di warê ragîhandinê de Cîhan gelek piçûk bûye. Bûyerek li ku derê biqewime, tu di nava deqeyek de jê agahdar dibî.  Ji bo wê bûyerê kêfxweşî yan jî dijberiya xwe nîşan didî.  Her bûyerên ku çi li Kurdistanê çi jî bi taybet li welatên Ewrûpayê diqewime, me     hemiyan eleqeder dike. Loma jî di nav Rêxistinên  Kurdan li wrûpayê de hevkariyek û  koordînasyonek xurt divê.

KOMKAR-EU, hevkariya nav rêxistinên Kurdan li Ewrûpayê, pêwîst dibîne. Em rêxistinên demokratîk yên Kurd li Ewrûpayê, dikarin bi hev ra îmzeyan bavêjin bin  gelek xebatên hêja. Bi hêviya xurtkirina hevkariya navbeyna dem û dezgehên kurdan de, carek dî sî saliya Federasyona Komeleyên Kurdistanê li Swêdê, pîroz dikin û we   hemiyan ji dil ve silav dikim.  

Silav û rêz

 Kovan Amedî    Serokê Giştî yê KOMKAR.eu