Encamname

Meclisa Partiya me di 6-7ê Çiriya Paşîn ya 2010an de li Enqereyê civînek pêkanî, mijarên di rojevê de niqaş kir û di cîh de dît ku ev encamnameya li jêr ji raya giştî re bê eşkerekirin.

Ji aliyê Meclisa Partiya me ve hat destnîşankirin ku Komcivîna partiya me ya Asayî ya 4an bi serkeftî pêk hatiye. Tê zanîn ku kongreya me bû hedefa gef û êrişên aliyên nijadperest û şoven. Van aliyên şoven bi ser kongreya me re li hember nirxên neteweyî yên gelê kurd kampanyayeke êrişane û reşkirinê dan destpêkirin. Meclisa Partiya me, bi vê mebestê van aliyên şoven şermezar dike. Hat tespîtkirin ku aliyên şoven bi van êrişan dixwazin pêşî li nêzîgahiya gelê kurd û tirk bigirin.

Meclisa Partiya me, ew êrişa li Teksîma Îstenbolê şermezar dike û em di wê baweriyê de ne ku wek berê jî hatibû dîtin, van çalekiyên bi vî rengî ku wexta behsa aşitiyê tê kirin pêk tên, ji aliyê hêzên tarî û şerxwaz ve tên kirin.

Di civîna meclisê de giringiya hilbijartinên ku dê di sala 2011an de pêk bên, hat diyarkirin û midaxeleya partiya me ya di vê pêvajoyê de wek sengerek hat destnîşankirin. Meclisa me diyar kir ku ew ê bi biryarî beşdarê hilbijartinan bibin û ji Lijneya Serokatiyê re pêşniyar kir ku ji nuha ve dest bi amadekariyên hilbijartinê bên kirin.

Meclisa me carek din giringiya yekîtiya neteweyî anî ziman û wek berê jî dihat kirin, dê di vê pêvajoyê de jî xebatên xwe yên di vî derbarî de bidomîne.

Di civînê de carek din bal hat kişandin li ser giringiya niqaşên derbarê makezagoneke nû de û giringiya wê ji bo demokratîkbûnê. Herweha, hat destnîşankirin ku ji bo gelê kurd û tirk bi hev re di nav aşîtiyê de bijîn, pêwistî bi makezagonek ku li ser esasê wekheviya gelê kurd û tirk bê amadekirin, heye.

Meclisa Partiya me, carek din mafê perwerdehiya bi zimanê zikmakî ya bi zimanê kurdî daxwaz kir û ji hikumetê hat xwestin ku dev ji helwesta xwe ya red û înkarê berde û bi helwesteke rasteqîn û hevdem pêşwazî li vê daxwazê bike.

Di civîna Meclisa Partiya me de bal hat kişandin li ser biryara bêçalaktiyê ya PKKê ku heta hilbijartinên giştî hatiye dirêjkirin. Hat diyarkirin ku bi vê biryarê, ji bo nirixandina daxwazên Gelê Kurd û demokratîkbûnê rewşeke erênî pêk hatiye û firsendeke giring hatiye bidestxistin. Divê rayedarên dewlet û hikumetê vê firsendê baş binirxînin û di vê çarçoveyê de pêngavên erênî bên avêtin.

Ji aliyê Meclisa Partiya me ve hat daxwazkirin ku divê ew yasa û qanûnên antîdemokratîk ku siyasetmedarên kurd yên ji doza KCKê jê tên darezandin, bên guhertin. Herweha, divê bê zanîn ku mafê xweparastina bi zimanê kurdî, mafekî mirovî ye.

Di heman civîna Meclisa Partiyê de Lijneya Serokatiyê jî hat hilbijartin. 08.11.2010

Meclisa Partiyê ya Partiya Maf û Azadiyan