HAK-PAR; “Nabe ku gelê me karanîna zimanê xwe bêpar bimîne”

Cîgirê Serokê Giştî yê Partiya Maf û Azadiyan-HAK-PARê Îbrahîm Kureken bi mebesta 21ê Sibatê Roja Zimanê Zikmakî daxuyaniyek belav kir û diyar kir ku HAK-PARê nikaş û çêkirina Makezagonek nû, him ji bo pejirandina mafê gele Kurd yên neteweyî him jî ji bo li her qadî, taybetî jî di qada fermî de karanîna zimanê kurdî wek derfet û firsendek nav dike.

Daxuyanî bi vî awayî ye;

NABE KU GELÊ ME KARANÎNA ZIMANÊ XWE BÊPAR BIMÎNE

Sala 1999an de UNESCO, ji bo pêşî li ber mirin û wendabûna zimanên li dinê bigre, ji bo zextên li ser zimanên zikmakî yên hindikahî û gelên bindest bên rakirin û ji bo xurtkirina zimanên li ber mirinê, 21ê Sibatê wek Roja Zimanê Zikmakî îlan kir.

Hewceyê gotineye ku, ziman ji şert û zirfên netewbûyînê ye. Parçeyek girîng ya nasname û şexsiyeta mirovatiyê ye. Ziman, heman demê de dewlemendiya jiyanê û mirovahiyê ye. Rûmeta ziman, qedrê ziman, rûmet û qedirnasiya civak û mirovatiyê ye. Hezar mixabe miletê Kurd li sê parçê Kurdistanê gelek qadan de,ji mafê xwe yê rewa, karanîna zimanê zikmakî bêpar e. Şik tune ku zulm û zixta li ser netewa kurd, di warê ziman de jî bê hempa didome. Ev siyaseta nijadperest ku li himber miletê kurd tê meşandin, roj bi roj karanîna zimanê kurd qelstir û zehmetir dike. Li hinek deveran zimanê me asta birbûyînê de ye.

Li gel hemû berxwedan û tekoşîna miletê Kurd mixabê ev siyaseta hovane pêşketiye û karanîna zimanê kurd paşketiye. Qedexekirin û asîmîlasyona (pişaftin) sîstematîk di rengek etnosît de (tunekirin û qirkirin) hat domandin û îroj jî didome.

Divê her dezgeh û kesayetên kurd zixte bide karanîna zimanê zikmakî. Divê her derê jiyanê bi kurdî jîn bibe. Hewce pê heye û gelek girînge ku malbatên Kurd xwe û zarokên xwe mecbûr bibîne bi karanîna zimanê şêrin. Li her qada jiyanê bi şiyara “Jiyan Bi Kurdî Xweşe” biaxife û bête axaftin. Em bizanibin ku berxwedariya karanîna ziman, berxwedana li himber zilm û zora nijadperest e. Bilindkirin û mezinkirina asta neteweyî ye.

Wek partî em çaverêne ku desthilatiya Komara Tirkiyê demek nêz de ev zilm zora li ser zimanê kurdî heye rakê û xwe ji şermek mezin xilas bike. Naskirin û qebûlkirina nasnama kurd bi gav avêtinek bi vî rengî ve rastarast girêdayî ye. Nabe ku di qurna 21an de miletê kurd ji mafek xweyê rewa bêpar be.

Zimanê kurdî ne tenê ji bo dewlemendiya çandî, ji boneya mafek bingehîn û ji egera nasnama kurd divê di her warîde bi fermî bête qebulkirin. Ev mafê rewa di zagon u makêzagonê de bê pesendkirin.

Partiya me nikaş û çêkirina Makezagonek nû, him ji bo pejirandina mafê gele Kurd yên neteweyî him jî ji bo li her qadî, taybetî jî di qada fermî de karanîna zimanê kurdî wek derfet û firsendek nav dike.

Wek partî hêvîdarin û berxwedarin ku, sala bê (2012) roja 21ê Sibatê gele Kurd jî, wek gelên cîhanê ew rojê pîroz bike û gavek din nêzika azadiya xwe bibe. 21.02.2011

Îbrahîm Kureken
Cîgirê Serokê Giştî Yê Partiya Maf û Azadiyan