Heyeta Hevbeş a HDKÎ û PSK Serdana Laleşa Nuranî Kirin

Heyeta hevbeş a Hizba Demokrata Kurdistana Îran (HDKÎ) û Partiya Sosyalîst a Kurdistan (PSK) serdana Bîngeha Laleş li Dihok û Perestgeha Laleşa Nuranî kirin.

Dema Nû/Dihok

Heyeta hevbeş a HDKÎ û PSK, ku Endamê Polît Buroya HDKÎ Rustem Cîhangîrî û Sekreterê Giştî yê PSK Mesud Tek serokatiya wê dikirin, di 7’ê Nîsana sala 2011’an da serdana Bîngeha Laleş li Dihokê kirin. Serokê Bîngeha Laleş Şêx Şemo û birêvabirên Bîngehê, pêşwaziya heyeta hevbeş kirin. Şêx Şemo zanyarî li ser damezrandin û pêkhatina Bingehê Laleş û kar û xebata wê pêşkeşê heyeta hevbeş kir. Heyeta PSK û HDKÎ jî piştgiriya xwe li kar û xebata Bîngeh û dezgehên Kurdên Êzidî kirin.

Heyeta hevbeş di roja 8’ê Nîsana sala 2011’an da jî serdana Perestgeha Laleşa Nuranî kirin. Serokê civata Ruhanî ya Êzîdiyan Baba Şêx, Serdesteyê Laleş Feqir Hecî, Kurê Mîre Êzîdiyan Kamuran Xêrî, Rawejkarê Serokkomara Iraqê Bo Kar û Barên Êzîdiyan Îdo Baba Şêx û Rêvabirê Nivisîngeha Kar û Barên Êzidî Li Hewlêr Ezîz Şemo peşwazî heyeta hevbeş kirin.

Baba Şêx û Kamuran Xêrî behsa bîr û bawerî û dîroka Êzidî û rewşa wan yên dema rejîma BAAS û niha kirin. Heyeta hevbeş jî piştgiriya xwe li daxwaza rewa yên Kurdên Êzidî nişan dan.