Konferansa salane ya KOMKAR.eu pêk hat

Konfederasyona Komeleyên Kurdistan li Ewrûpa-KOMKAR.eu, di roja 28.05.2011`an de, bi beşdariya Komîteya Giştî, serokên komeleyên endam û organên din ve konferansa xwe ya salane pêkanî. Di konferansê de rapora kar û xebatên KOMKAR.eu û raporên komeleyên endam hatin pêşkeşkirin. Raporên KOMKAR.eu û yên komeleyan hatin niqaşkirin. Karên hatine kirin bi erênî hate nirxandin û her usa li ser kêmasiyan, li ser rewşa komeleyên endam, rewşa civata Kurd li Ewrûpayê û li gor vî jî xebatên bên kirin jî niqaşên germ hate kirin.

Nûnerên konferansê li ser rewşa Kurdistanê jî dîtinên xwe anîn ziman û bi giştî berdewamiya pişgiriya xwe bo Tevgêra Azadîxwaz a Kurdistanê li ser bingeha berjewendiyên netewî,  xwedî îradeyeke siyasî bûyinê anîn ziman.

Konferans rewşa Kurdistana Rojava jî nirxand û îşaret bi vê yekê kir ku di van çend mehên dawî, serhildanên azadîyê li Afrîka Bakur û Erebîstanê û daxwazên azadiyê li welatên Ereb bilind bûye. Serhildanên bo azadiyê li Tunisê, Misirê, Lîbya û Yemenê  rû dan nuha jî xwe gihandiye Sûriyê.  Gel ji bo daxwaza azadî û demokrasiyê daketiye kolanan û bi awayekî demokratîk daxwaza mafên xwe yên însanî dike. Lê rejîma Baas bi panzer û gullan pêşwazîya xelkê sivîl dike. Heta nuha bi sadan kuştî hene. 

Li herêma Kurdistana Rojava jî livandinek heye. Bi girseyî nebe jî xelk, ji bo bidestxistina mafên xwe, dadikeve kolanan.  Elbet divê Kurd ji serhildana 12 Adara  2004´an tercube derxînin, ku bûbû sebeba kuştina gelek xortên Kurd û wêrankirina bajarên Kurdan.

Loma jî divê, hêzên welatparên Kurd bi gavên lezgîn li ser esasên berjewendiya netewî yekîtiya xwe ya demokratîk pêk bînîn.  Xwe baş bi rêxistin bikin û her usa  ji bo gorankariyên ku li heremê rû dide, xwe amade bikin. Divê Kurd ji bo hemû îhtimalan xwe amade bikin.

Di vê çerçewê de KOMKAR.eu kêfxweşiya xwe bo tevxebatiya partî û rêxistinên Kurd li Rojava Kurdistanê ku bi navê ”Partiyên Tevgera Niştimanî Kurdî li Sûriya” pêkhatiye dike. Her usa pişgiriya daxwazên wan yên muşterek ku di roja 11.05.2011`an de bi daxuyaniyek ji bo raja giştî hate belevkirin, dike.