Konferansa Rewşa Wêjeya Kurdî

Li Amedê ji aliyê Komeleya Çand û Hunerê ya ÇIRA ya Amedê ve Konferansa Wêjeya Kurdî hate lidarxistin. Konferans bi pêşkêşiya nivîskar Latîf Epozdemîr ve Prof. Dr. Bedirxan Sindî û Doç. Dr. Hemdad Huseyîn Bekir gotarên xwe yên li ser wêjeya Kurdî, pêşkêş kirin.

Dengê Azad/Amed
Konferansa ku ji aliyê Komeleya Çand û Hunerê ya ÇIRA ya Amedê ve hatibû lidarxistin, li avahiya konferansê ya otela Prestîjê pêkhat. Konferans li gel gelek rewşenbîr, nivîskar û şaîrên wek, Remezan Pertew, Remezan Alan, Aram Gernas, Edîp Polat, Recep Dildar, Seîd Veroj, Metin Yalçin, Eyup Kiran, Ehmedê Dirihî û Yusuf Ziya Kaya û Desteya Serokatiya Partiya Maf û Azadiyan-HAK-PAR, Muhîttin Batmanli û hejmarek mezin endam û piştgirên komeleyê beşdar bûn.

Nivîskar Hesen Hebeş û Kulsîne Osmanpûr jî ji bo konferansê hatibûn vexwendin, ji ber egerên asteng û teknîkî nehatin û beşdar nebûn.

Di konferansê de bi pêşkêşiya nivîskar Latîf Epozdemîr, Prof. Dr. Bedirxan Sindî û Doç. Dr. Hemdad Huseyîn Bekir gotarên xwe pêşkêş kirin.
Piştî ku ji aliyê pêşkêşkerî konferansê Latîf Epozdemîr ve agahiyên berfireh ya li ser wêjeya Kurdî ya klasîk û nûjen hat ronî kirin, Prof. Dr. Bedirxan Sindî gotara xwe ya li ser wejeya Herêma Behdînan ya beriya Şoreşa 1961 û piştî şoreşê, pêşkêş kir.

Prof. Dr. Bedirxan Sindî axaftinê xwe weha domand; “Divê rewşenbîrî, nivîskarî, ronakbîrî, wêje serbixwe û azad be afirandin û di binê siya tu alî de nemîne. Divê em rewşenbîrên Kurd ên hemû dinyayê pêwendiyên me hebin û em her tim hevkarî û piştgiriya hevûdu bikin.”

Di heman beşê de Doç. Dr. Hemdad Huseyîn Bekir gotarê xwe pêşkêş kir. Bekir di gotara xwe de behsa edebîyata klasîk û ber bi ya nûjen qonaxê ku têde derbas bûne, bir û asteng, bandora dagirkeran ya li ser wêjeya Kurdî û lawaz hiştina wê kir.

Di beşê duwem ya konferansê de bi pirs û bersîvên li ser wêjeya Kurdî berdewam bû.

Di encama konferansê de pirtûka bi navê “Dîwana Gûldeste” ku di nav weşanên Veng ve hatiye çapkirin, diyarî beşdaran hat kirin û ji aliyê nivîskarê wê Prof. Dr. Bedirxan Sindî ve hat îmzekirin.