Li Hewlêr ê Mihrîcana rêzgirtinê li Mihemed Şêxo destpêkir

Îro li Hewlêrê, li hola Pêşewa li Wezareta Rewşenbîrî û Lawan mîhrîcana hunermendê navdar ê Kurd Mihemed Şêxo dest pê kir.

Dengê Azad/Hewlêr

Mîhrîcana rêzgirtin li hunermendê navdar û welatparêz Mihemed Şêxo, ku wê 2 roj dombike, lijêr çavdêriya Wezîrê Rewşenbîrî û Lawan Dr. Kawa Mahmûd û bi sponsoriya Hisên Şingalî îro li paytexta Herêma Kurdistanê Hewlêrê li hola Pêşawa li Wezareta Rewşenbîrî û Lawan destpêkir.

Nêzî 100 mêvanên ji parçeyên din yê Kurdistanê û ji Ewropayê zêdebarî çend endamên malbata hunermend, Wezîrê Rewşenbîrî û Lawan Dr. Kawa Mahmûd, Wezîrê Perwerde Sefîn Dîzeyî, çend serkirdayetiyên PDKê, şandên Partiya Sosyalîst a Kurdistan-PSK û Partiya Demokrat a Kurdistana Îranê-PDKÎ beşdarî vê mîhrîcanê bûn.

Di destpêkirina mîhrîcanê de çend axaftin li ser jiyan, xebat û hunera Mihemed Şêxo de hate kirin. Piştî axaftinan kurte jiyana hunermendê navdar yê Kurd Mihemed Şêxo dokumenteke sînevîzyonê hate nîşandan.

Piştî sînevîzyonê hunermendên wek, Brader, Canê, Dilniya Qeredaxî çend stranên Mihemed Şêxo pêşkêşî beşdarvanên mîhrîcanê kirin. Mîhrîcan bi konser û semînerên ku li ser hunera Mihemed Şêxo ne, wê berdewam bibe.