Konsera Pişgiriyê ji bo gelên Suriyê

Ji bo pişgiriya raperîna gelên Suriyê ya li dijî Beşar Esad û rejîma Baas, di roja 09.07.2011, Şemiyê de, li Elmanya Federal, bajarê Bonnê konserek hat li dar xistin. Hunermendê Kurd yê navdar Şivan Perwer û yê Ereb Semih Şiqêr beşdarî konserê bûn.

Di despêka konserê de li ser navê Komîta Amadekar ya Konserê Akîf Hesen û Yusuf Elo, bi Kurdî û Erebî axaftin û li beşdarên konserê silav kirin. Di mîtîng û konserê de pirbûna alên Kurdistan û yên Suriyê balkêş bûn.

Piştî axaftina komîtê, kurê Şêx Maşûq Xiznewî, Murşîd Xiznewî jî axaftinek dûr û dirêj kir û li ser rewşa Suriyê agahdarî da beşdaran.

Alîgir û pişgirên KOMKAR û PSK yên herêma Koln, Bonn û Troisdorfê jî bi girseyî beşdarî mîting û konserê bûn û pişgirî dane gelê Kurd yê Kurdistana Suriyê. Her weha li ser navê KOMKAR.eu jî peyamek hat ragihandin. Komîta Amadekar peyama KOMKAR.eu xwend û ji bo peyamê spasdariya xwe pêşkêşî KOMKAR.eu kir.

Şivan Perwer di konserê de bi stranên xwe yên Helepçe û Ez Dengê Kurdistan im û hwd. dilê beşdaran geş kir. Şivan her weha axaftinek kurt jî pêşkêşî beşdaran kir. Şivan Perwer di axaftina xwe da hestên xwe weha anî ziman: „Gelên Rohilata Navîn ji dîktatoran pir kişand. Wan dîktatoran bi salan zûlm û zordariya li ser gelan kêm ne kirin. Lê belê îro herkes jî dibîne, ku ev dîktator û desthilatdariya wan yek bi yek hildiweşin.“ Perwer di dawiya axaftina xwe de da zanîn, ku çi Ereb, çi Tirk û çi Kurd, ew dijî dîktatoran e û weha got: „Ez li vir bang li gelê xwe dikim: Li hember dîktatoran serî netewînin û ber xwe bidin.“

Di konserê de Şivan Perwer û Semih Şiqer bi hev re derketin ser dikayê û stranên Kurdî û Erebî yên gelêri û şoreşgerî pêşkêş kirin. Bilî Şivan Perwer û Semih Şiqêr hin hunermendên Kurd jî bi stranên xwe pişgirî dane raperîna Suriyê.    

Her weha nûnerê Platforma Demokrasiyê ya Suriyê, ku van demên dawiyê li Elmanya Federal kar û xebatên lobiyê dike, Azîz Zaxuranî jî beşdarî konserê bû. Wek tê zanîn ev platform, bi parlamentera SPD Uta Zapf ve hevdîtinek pêk anî û her weha têkiliya xwe ya bi rêxistinên sîvîl yên Elman ve xurtir dike.

Dema Nu-Bonn