Komciwan-Swêdê şevbihêrka çandî ya payîzê pêkanî

Haluk Öztürk

Stockholm-19.12.2010- Li paytextê Swêdê Stockholmê Komeleya ciwanên kurd Komciwan-Swêdê şahiya xwe ya payizê pêkanî. Wek tê zanîn Komkar û Komciwan-Swêd, hersal di dawiya payîzê û baharê de piştî xilaskirina çalakiyên xwe yên perwerdeyî wek kursên govendê, tembûrê û zimanê kurdî, şahiyên çandî li dar dixin.

Şevbihêrka payîza îsal jî bi xweşî derbas bû. Şevbihêrkê bi axftina serokê Komciwanê Ferhad Sönmez dest pêkir. Sönmez di axaftina xwe da bi kurtî behsa armanc û xebatên komelê kir. Wî da xuyakirin ku hejmara endamên komelê her diçe zêdetir dibe. Sönmez got ku beşdariya gelek zarok û ciwanan di van çalikiyên komelê de wan bêtir li xebatê germ dike. Sönmez spasdariya xwe ji bo mamosteyên kursên folklorê Atilla, Sorgul, Mîrza, Zerya û mamostayê tembûrê Yaşar, mamostayê zimanê kurdî Haluk Özturk û hevkar û  rêvebirekî Komciwanê yê berê Şukrî Demîr kir. Şukrî Demîr nuha jî wek şêwirmendekî komeleya ciwanan roleke baş dilîze. Bernama şevbêrkê bi kurdî û swêdî ji alîyê Zerya Özturk û Mîrza Karaduman Bîngöl ve hat meşandin. Li ser navê Federasyona kurdan Çiyavan Şerîfî û li ser navê Yekitiya  Jinên Kurd li Swêdê xanim Kurdîye Kanat axifîn û xebatên Komciwanê pesinandin û jê ra serfifirazî daxwaz kirin.

Vê carê jî komên cuda yên zarok û ciwanan ji xabatên xwe yên termîna payizê gelek nimûneyên govenda kurdî pêşkêşî dêûbavan û beşdaran kirin. Di bernameyê de pênc (5) komên govendê ji folklora kurdî ya dewlemend nimûneyên bijarte nîşandan. Koma tembûrê bi rêberiya mamosta Yaşar meqamê ”Malan Barkir” pêşkêş kirin. Koma tekvando hunerên xwe yên ” şerkirinê” rayî temeşevanan dan. Mamostayê muzîkê Yaşar bi miqam û stranên kurdî rengekî xweş da şahiya îsal. Wek her carê îcar jî birêz siyasetmedar û nivîskarê gelê Kurd Kemal Burkay mêvanê şahiya zarok û ciwanan bû. Wî kêfa xwe bi kurmanciya serokê Komciwanê Ferhat re anî. Ji der û dora xwe pirs kir “ev xort ji ku ye?”. Ji Şirnexê ye, gotin. Wî bêtir kêfa xwe anî ku “kurmanciyeke hevpar peyda bûye. Herkes bi rehetî dikare ji vê kurdîyê fehm bike” got.  Îşev zarok, ciwan û dê û bavan heta nîvê şevê li ber muzîka kurdî, dev û zurnê govend gerandin. Li welatê Skandinavya li Swêdê derva sar bû, berf û bager bû, lê li hundirê salonê bi def û zurna kurdî, bi miqam û govanda kurdî germ bû. Li vir Nûrê ya deh salî û Kemal Burkayê heftê û sê (73) salî bi qasî hev kêfxweş û bextewar bûn. Şeva kurdan xweş bû. Mala Komciwanê ava be ji bo şeveke weha xweş...