Sînemxan Celadet Bedirxan : “Şoreşa Kurdan da jin roleke xwe yê giranbiha hebûye”

Ronakbîr û şajinê Kurd Sînemxan Celadet Bedirxan, peyamek şand KOMJİNê. Sînemxan di peyama xwe da behsa rola jin di şoreşa Kurdan da kir û ji hemu jinên Kurdistanê  daxwaz kir, beşdariya avakirina civateke tendurist bikin.

Peyama Sînemxan Celadet Bedirxan bi vî awayî ye:

Ji bo KOMJİN-Yekîtiya Jinên Kurdistanê

Ji Hewlêra Paytext Silavekî Germ!

Berî her tiştî ji bo destnîşankirina min a beşdarîkirina çalakiya salvegera 100 Saliya Roja Jinan a Cihanê gelek spasiya rêxistina Komjinê dikim û li her çalakî û karên we yên giranbiha de daxwaza serkeftinê dikim.

Bê guman 8 Adarê ji bo hemû jinên cîhanê rojeke gelek girînge. Lê belê ji bo min du caran taybetiya xwe heye. Îro hem roja salvegera jinên cîhanê û hem jî roja ji dayikbûna keça min Dilnaz e ku niha li Paris e. Ji bo wê yekê jî bi hestên xwe yên gelek germ pêşwaziya vê roja taybet dikim.

Bi vê helkefta 8 Adarê ya Roja Cîhanî ya Jinan pîrozbahiyên xwe yên germ pêşkêşî jinên Kurdistan bi taybetî û hemû cîhanê bi giştî dikim, hêvîdar im ev salveger bibe piştgireke din a xebat û tekoşîna jinan . Dîsa bi vê helkeftê roja ji dayikbûna keça xwe Dilnazê pîroz dikim û hêvîdar im li gel hezkirên xwe jiyaneke bextewer bijî.

Wekî ku hûn ji dizanin di hemû şoreşên gelê Kurdistanê de jin roleke xwe yê bi taybetî û giranbiha hebûye. Her tim ji bo bira û bav û hevjînê xwe yê Pêşmerge piştgîriyeke xurt bûye û di gelek waran de jî çek daniye li ser milê xwe û parastina hebûna gel û doza xwe kiriye. Ji bo vê yekê jî  ew gel û neteweyê xwediyê jinên wekî Rewşen Bedirxan, Qedemxêr, Xanzad, Hepsaxanê Neqîb, Leyla Qasim û Zîlan… her tim dê bi zîndî bimîne.

Bi vê helkeftê jî bi taybetî daxwaz ji hemû jinên Kurdistanî dikim ku piştgîriya xwe ji bo beşdariya pêvajoya avakirina civakeke tendirust û perwerdekirina nifşekê hişyar ya bi hestên Kurdayetiyê bikin û li asta berpirsiyariyê de beşdar bibin. Her wiha ez jî wekî hemû jinan li gel erkê nîştîmanî û neteweyî û daxwaza nehiştina diyardeya tundûtujiyê dikim.

Dûbare 8 Adarê Roja Cîhanî ya Jinan pîroz be.

 Li gel silavên germ.

Sînemxan Celadet Bedirxan