Li Wuppertalê civîna Hilbijartina li Tirkiyê û Bakûrê Kurdistanê û Yekîtiya Netewî

Li ser banga Murat Dagdelen, Hîkmet Serbilind, Kovan Amedî, Baran Hemze, Suleyman Ateş ,Yaşar Kaya, Yilmaz Çamlibel, Selim Çurukkaya, Sirac Kirici, Seyîtxan Kurij, Prof. Dr. Huseyîn Bektaş, Bayram Ayaz, Alî Haydar Koç û Mustafa Kisabacak, beşek welatparêzên Kurd yên diyaspora li Ewrûpayê di 21ê Gulana 2011´an de li Elmanya, bajarê Wuppertalê hatin ba hev û bi navê  „Hilbijartina li Tirkiyê û Bakûrê Kurdistanê û Yekîtiya Netewî“ civînekê li dar xistin. Bi biryara beşdarên civînê bo raya giştî daxuyaniya jêrîn hat amade kirin.

Daxuyanî

Di civînê de biryar hat girtin, ku di hilbijartina 12ê Hezîranê ya li Tirkiyê û Kurdistanê de, divê Kurd tu car dengên xwe nedin partiyên sazûmanê û li hember partiyên dewletê de, di  helwesta xwe de xwedî biryarbin.

Hevkarî û tevxebata sê partiyên legal yên Kurd, ya li ser hevkariya ji bo hilbijartinê, bi giştî wek helwesteke erênî hat nirxandin.

Beşdarên civînê dan zanîn ku divê ev hevkarî ne tenê ji bo hilbijartinê bibe û divê, ew piştî hilbijartinê jî bi awayekî berfirehtir kar û xebatên xwe berdewam bike.

Beşdarên civînê daxwaz kirin ku di hevkariya hêzên Kurdan de, divê hemû nêrîn û ramanên cuda tê de bên temsîl kirin. Û divê di temsîliyek wekhev de mecala bi cîhanîna biryaran hebe, û her usa divê berdewamiya vê  hevkariye hebe û ber bi dezgehbûnek demokratîk ve biçe. Beşdarên civînê hevkariyek bi vî rengî, ji bo berjevendiyên netewî ya gelê Kurd girîng nirxandin.

Di civînê de îşaret bi wê yekê hatkirin ku, avakirina dezgeh an jî saziyeke neteweyî ya li ser bingeha berjewendiyên netewî, xwedî prensîp bûyina wî û bûyina wî ya xwedî îradeyeke siyasî, giring û elzem e.

Ji ber vê yekê jî daxwaz hat kirin, ku di demek nêzîk de hêzên Kurd yên Bakûrê Kurdistanê divê bên ba hev û konferanseke netewî pêk bînin.