Apo hazirîya çi dike?

Mehkema Heqên Mirovî ya Ewrûpa (MHME) di 31’ê Gulanê da li dewaya Avdila Ocalan dinêre.

Wekî tê zanîn, Awûqatên Ocalan, ji mehkeme û biryara Îmralîyê ra di MHME da êtiraz kirin. Yek ji êtirazên wan, şiklê anîna Ocalan e ji der welat. Dibêjin Ocalan hatîye revandin û ew dijî usûl û qeydeyên huqûqa navnatewî ye. Her usa jî dibêjin heqê parastinê ji wî û awûqatên wî ra têr ne hatîye naskirin..

Helbet revandina Apo ne gor usûl û qeydeyên huqûqa navnetewî ye, bi şiklekî korsanî ye. Lê kî guh dide van tiştan? Ew zulma ku dewleta Tirk bi salan e ji Kurdan ra rewa dibîne, ewqas neheqî, teda, kuştin, nefîkirin, ma gor huqûqa navnetewî ye? Karên dinyayê, mixabin, ne li ser heq û hiqûqê, li ser hêz avabûye. Zora kê ku çû kê. Kî xurt e, her usa jî heq para wî ye! Dewlet û hêzên dinyayê, ger zirarê nede wan, guh nadine neheqî û zordestîya yên dinê.

Ocalan bi xwe jî, di jîyana xwe da tenê qîmet da zorê, zor pîroz kir, di pêvendîyên xwe da, di nav partîyê û dervayî partîyê da, dijî hevalên xwe, dijî rêxistinên welatparêz û çep ên Kurd û Tirk, heya dijî gelê Kurd bi kar anî. Heya ne gor biryareke mehkemê, lê gor kêfa xwe hevalên xwe dan girtin, dan kuştin; ji ber ku li ser hin tiştan cuda difikirîn.. PKK bi emir û fermana Apo, di ser gundên Qoricîyan da (heya di ser gundên dinê da ku ne qoricî bûn, lê ne hevalbendê PKK jî bûn) girt, jin û zarok ne got, kuşt. Li welat û der welat PKK, gor emr û daxwaza Apo êrîşî ser partî û rêxistinên welatparêz kir, gelek însanên şoreşger kuşt, komele şewidandin, civînên Newrozê belav kirin.. Ma ew hemû gor huqûqa netewî û navnetewî bûn?.

Apo piştra, ev hemû kiryarên xirab kir ser hevalên xwe, da ku xwe ji vî barî xilas bike..

Çi xerîb e ku, nuha ew Apo li heq hiqûqê digere.. Lê bila bigere. Em bi xwe, heqê yekî wek Apo be jî diparêzin. Ferqê me û wî ew e..

Mehkemeyên Tirkan jî, ne tenê Mehkema Parastinê yên Dewletê, lê temamîya wan di pirsa Kurd da ne bêteref in. Dewleta zalim çi rê danîya pêşîya wan gor wê dikin. Ew mehkemeyê neyaran in, emê ji wan çi hêvî bikin?. Helbet biryarên wan ne adil in. 

Ka em binêrin MHME di derheqa êtirazên Apo da çi biryarê bide. Bo wê jî ne hêsan e. Ewê biryareke gor huquqê bide, gor sîyasetê?..

Ger mehkeme êtirazan rast bibîne û bêje ew biryara derheqa Ocalan ne li cîye, helbet ji bo dewleta Tirk di warê navnetewî da serêşîyeke teze çêdibe. Lê Tirk, li himber biryareke han, herhal ji helwestê xwe danakevin û Apo jî şunda venagerînîn Kenyayê. Ango rewşa apo, gor biryara MHME naguhure. Tirk ne Apo berdidin ne jî darda dikin. Ew dardanekirin ne tenê jî bo xatirê Ewrûpîyan e. Lê Tirk bi rîya Apo, di pirsa Kurd da sîyaseta xwe ya teze dimeşînin. Roja hatibû girtin, Apo gotibû “canê min bibexşînin, ezê xizmeta we bikim!” Wan canê Apo bexşandin û ew jî xizmeta xwe bi dil û can dike. Ew çi dixwazin Apo dike. Pêşnîyarên wan digihîne partîya xwe û partîya wî jî bi cî tîne. Ango Apo di dest wan da mirîşka hêkzêrîn e, divê jîyana vê mirîşkê baş bê parastin…

Nuha Apo hazirîya xizmeteke teze dike. Ray û daxwazên xwe dinivîse ku bigihîne MHME. Ew gotin û mesajên Apo, ku bi rizaya dewleta Tirk û bi destê Awûqatên wî digihîje derva, di rojname, têlevîzyon û înternetan da cî digrin, baş xuya dikin ku Apo xwe hazir dike, bi navê “parastinê” derbeke teze li tevgera Kurd xe. Careke din doza Kurd li pêş dinya alemê înkar bike. Bêje ku Kurd, ji xweşîya Tirkîyê, ji “komara demokratîk” pêve tiştekî naxwazin. Serhildanên Kurdan yê dused salî neheq derîne, wek kevneperestî nîşande û bona vê yekê Kurdan rûreş bike. Gunehê van serhildanan, wek dewleta Tirk, bike stûyê bîyanîyan, Ewrûpîyan gunekar bike. Ango dewleta Tirk paqij û bêgune nişande û berö Kurdan bide ser hedefên şaş… Amanc û niyet ev e.

Apo van tiştan bi mehan e dibêje û li pêş MHME careke din wê bêje.. Helbet Apo bi xwe nikare biçe wir, lê gotinên xwe bi nivîskî û bi rîya Awûqatên xwe bişîne û li wir bide xwendin.

Apo, di beyana xwe ya dawî da, ku bi serenavê “Kürtlere de Hukuk” (Ji Kurdan ra jî Huqûq), ku di rojnama Ozgur Polîtîka, 21 Gulan, 2001 da derket, van tiştan eşkere dibêje:

“Komploya ku dijî min hat darxistin, çavkanîya wê bi giranî Ewrûpa ye. Bingehê wê 200 salî ye. Îngiliz û Frensî 200 sal e ku bi vî karî mijûl in. Mîna arenayên Romê, em avêtin ber şêran. Ji Tirkîyê ra gotin, ‘Ahan ji te ra qurbanek, dardabike!’ Di dîrokê da îxaneta Yunanîstanê gelek mezin e, bê emsal e…”

“Me ji bo serxwebûn û  azadîya Tirkîyê kar û xebat kir. Eva ne teslîmbûn e… (Bi rastî, hayê xwe ji kiryara xwe baş heye. NN.) Komplo ne tenê dijî min e,  her usa jî dijî Tirkîyê ye…”

“Dîroka pirsa Kurd digihîje 200 salan. Eva dîrokeke bi lanet e, tê da bêbextî, lîstikên İngilizan û ya împeryalîya Evrûpa heye.  Pêvajoya sala 1920 li Anadolê (qesdê wî îttîfaqa Kurdan bi Mistefa Kemal ra) êttifaqeke baş bû. Serhildanên Kurdan bû asteng li ber pêşveçûna Komarê (Tirkîyê). Îngilizan ji yekî ra gotin serî hilde, ji yê dinê ra gotin dardabike!”

“Ez nuha ne mehkûmê Tirkîyê me, yê komployê me. Emê di mehkemê da van tiştan eşkere bikin. Emê ji Ewrûpîyan ra bêjin ku, we gor huqûqê ne kir, we qetlîam û komploya 200 salî pêşberî me kir. Min ji bo parastina xwe 300 rûpel nivîsand. Ezê derewên Ewrûpîyan di warê sîyaset û huqûqê da, sedî da 75 eşkere bikim, rûyê wan reş bikim…”

“Dema tu zirar nedî yekitîya dewletê, ew jî hin tiştan dike. Min ne ji bo cudabûnê , ne ji bo şer, lê ji bo aşitîyê kar û xebat kir…”

Belê, Apo van tiştan dubare dike. Xuya ye 300 rûpelê ku wî nivîsandîye ne ji bo parastina doza Kurd e, lê bo parastina sîyaseta dewleta Tirk e û bo rûreşkirina tevgera Kurd û xelkê biyanî ye. Ango, bi taybetî wan hêz û kesên demokrat gunekar dike ku mafên mirovî diparêzin, bona vê yekê jî Kurdan ra xwedî derdikevin û Tirkîyê rexne dikin. Ango Apo, wekî berdevikekî Tirk, ji bo pirsa Kurd, ji bo serhildanên Kurd, Kurdan bi xwe, her usa jî welatên Ewrûpa gunekar dike.

Tirk jî bi salan e vî tiştî dikin û ji Ewrûpîyan ra dibêjin: “Li welatê me pirsa Kurd tune, ya terorê heye. Ew jî bi destê hêzên derva çêdibe. Tilîya hin dewletên Ewrûpî di vî karî da heye. Hûn piştgirîya terorê dikin, hûn wan xwedî dikin… Hûn dixwazin welatê me parçe bikin…”

Dema Apo,  ku xwe wek serokê Kurdan nîşan dide, li pêş mehkema Ewrûpayê van tiştan bêje, êdî dinya alem çawa difikire û çi dibêje?.

Belê, xuya ye Apo, ji bo ku dewleta Tirk memnûn bike, ji bo canê xwe yê şîrîn, xwe hazir dike ku, roja 31’ê Gulanê derbekî teze li doza Kurd xe. Helbet, medyaya Tirk vê firsendê baş bi kar bîne û tevî wê jî medyaya PKK û hemû pelên hêcîrê ji van gotinên bêbext ra kirasên teze û rengîn bidûrin…

Divê hemû hêz û kesên welatparêz, hemû rewşenbîrên Kurd di vî warî da hişyar bin.. Rê û firsend nedin ku bi destê hin maşikan pirsa Kurd çepeçûlkî be û raya giştî bê xapandin. Bila Tirkîye jî, ew fîguranên hanê jî baş bizanibin ku meydan ne vala ye.

(*) Têbinî: Ev nivîs berî 31’ê Gulanê hatibû nivîsandin. Di vê navberê da bi daxwaza awûqatên Ocalan mehkemê (MHME) dawe bi şunda avêt, roja 31’ê Tebaxê. Sedem jî usa hate nîşandan ku, Awûqatên Ocalan ji bo parastinê hîn ne hazir in û waxtekî zêde xwastine. Lê ev tişt nakeve serê mirovan, ji ber ku, ev roj ji mehan berê xuyayî bû.. Lê sebep her çibe jî li dawîyê mehkeme hate tehirkirin. Bi alîyekê jî ev tişt baş bû! Ger hûn bêjin çima, sebep di jor da hatîye nivîsîn…