Axaftina Heval Burkay
di Kongra 7. da
Sekriterê Giştî ya Partîya Sosyalîst
a Kurdistan, Kemal Burkay, di vekirina kongra PSK ya Heftan
da axaftineke dirêj kir, di axaftina xwe da li ser bûyerên
mihîm sekinî ku ji Kongra 6. vir da çêbûne, wek bûyerên
11 İlona 2001, şerê Afganîstanê û Iraqê, rewşa
Kurdistana Başûr piştî şer, Pêvîndîyên Tÿrkîyê
û Yekitîya Ewrûpa, hilbijartinên sala berê li Tÿrkîyê, her
usa jî kar û xebata partîyê di vê demê da. Burkay, di dawîya
axaftina xwe da li ser pirsa sekriterîya giştî sekinî
û usa got:
Hevalno,
Ez ji avabûna PSK vir da, va ye 29 sal e sekriterê giştî
me. Eva ji bo emrê mirovekî demeke gelek dirêj e.
Di dema borî da çend caran min xwest vê wezîfê dewrî hevalên
xwe bikim, lê her car ev daxwaz bi cî ne hat. Cara dawî
min xwe hazir kiribû ku di Kongra 6. da, ku di Tîrmeha sala
2000 da çêbû, êdî dev ji vê wezîfê berdim. Min di kongrê
da daxwaza xwe ji hevalan ra got. Ji ber ku him ev karê
giran ku min gelek sal e dikir, ez westandibûm, him jî min
feyde ditît ku êdî hevalên din vî karî bigrin ser xwe, ango
guhartinek çêbe.
Lê mixabin, wekî hûn jî dizanin, ew daxwaza min bi cî ne
hat. Kongrê qasî heftekê ev mesele gelek mezin kir, dijî
daxwaza min derket û li dawîyê ez mecbûr mam cardin vê vezîfê
bigrim. Bona vê yekê min ev kar sê salê din kir û heya îro
anî.
Lê di vê Kongrê da êdî ji bo min ev kar dighê dawîyê.
Hin heval, bi taybetî jî endamên Komîta Merkezî, dizanibûn
ku ez vî karî piştî Kongra 7. êdî naxwazim bidomînim.
Min ev biryara xwe, wek nameyekê şeş meh berê
ji Komîta Merkezî ra şand, heya tevî wê civînê ne bûm,
ku di hezîrana çûyî da çêbû, da ku heval bi rehetî li ser
vê meselê bişêwirin û tevdîrên xwe bistînin
Hevalno, ji we hemûyan ra gelek spas dikim ku we ev karê
hêja û qedirbilind ewqas demeke dirêj ji min ra laîq dît.
Karê rêxistinî karekî kollektîf e, ha mirov li serê refê
be, ha li dawî, hemû jî hêja ye.
Ez êdî di dereca Komîta Merkezî da jî wezîfe nagrim. Ji
vir ha da dixwazim piranîya waxtê xwe bidim karê nivîsandinê,
bi taybetî ji bo weşana hin pirtûkên xwe, ku di nav
da cîldê 2. û cîldên din yên xatiratên min jî hene ku di
dest min da ji bo weşanê hazir in, lê ji bo çapkirina
wan li benda demeke minasiw im. Her usa jî, ger ji bo karên
partîyê, ji vir hada jî hin tişt bikevin ser milê min,
helbet, gor mecala waxta xwe ezê wan jî pêk bînim.
Ez herçiqas, hîn berî karê sîyasî mirovekî şair û
nivîskar bim jî, ev çil sal e ku karê sîyasî dikim bi şiklekî
rêxistinî. Ez dizanim karê rêxistinî çiqas mihîm e. Di vê
dema dirêj da, ne ku tenê min gelek tişt da rêxistina
xwe, lê rêxistinê jî di warê moral da gelek tişt dane
min.
Rêxistin sîlehê herî giranbuha ye, ji bo wan kesan ku armancekî
sîyasî dane pêşîya xwe, bi taybetî jî bo tevgerên rizgarîxwaz.
Tucar bê rêxistin nabe.
Heya di jîyana kar û di warê çandî da, di her warekî jîyana
civakî da rêxistin divê. Civaka medenî û demokrat, civakeke
usa ye ku bi her awayî baş rêzbûye.
Rêxistinên sîyasî jî, helbet wek hemû rêxistinan ne armanc
in, lê hevcar in, ango halet in. Navê wan, şiklê wan,
bernamê wan û şiklê kar û xebatê jî di zeman da dikare
biguhure. Lê rêxistineke sîyasî, heya ku welatê me rizgar
be ji me ra lazim e. Heya piştî wê jî, ji bo avakirina
welat û jîyaneke teze û ji bo meşandina kar û xebatê
ji bo sazûmaneke sosyalîstî, dîsa ji me ra lazim e.
* * *
Hevalno,
Partîya me, di van rojên pêş da 29 salîya xwe temam
dike û dikeve sala 30. Ev ne emrekî kurt e.
Mixabin em hîn ne gihîştine armancên xwe. Sebebê vê,
dibe ku hinek ji wan sabebên dervayî me, ango yên objektîf
bin, lê dibe ku hin sebep jî qisûr û kêmasîyên me bin, ango
yên subjektîf bin. Bi kêmayî, ger me nekarîye bibin partîyeke
mezintir û xurttir, helbet kêmasîyên me jî tê da hene. Lê
şik tune ku me di vê dema dirêj da, ango nêzî sî salî
ji bo dozeke heq, ji bo rizgarîya gelê Kurd û sosyalîzmê,
kar û xebateke mezin kir, em bê westan xebitîn. Di xebata
giştî ya gelê me da para me jî ne piçûk e.
Divê hemû hevalên me ji vê yekê serbilind bin.
Ez bawer im, ev kar û xebat di avê da naçe.
Ez wan hemû kesan pîroz dikim ku di vî karî da para wan
heye.
Ez wan hevalan bi hurmet tînim bîra xwe, ku di vê rê da
jîyana xwe winda kirin.
Divê em 30 salîya avabûna partîya xwe bi şiklekî baş
pîroz bikin ku layîqî wê be û bo vî karî piştî kongrê
dest pê bikin, hazirî bikin.
Ez careke din ji Kongra 7. ra serketin dixwazim.
Ji we hemûyan ra di jîyana taybetî û ya rêxistinî da sefirazî
û bextewarî dixwazim.
Kemal Burkay
Çileyê Pêşîn 2003
