"Ji bo wan bêşerefên ku dixwazin navê Kurdistanê" winda bikin:

Tirkîye kîngê derket?
Kurdistan kîngê? 

Cemîl BARAN

Ka em gelek caran dibêjin dewleta Tirk pirsa Kurd nasnake, ji bo çareserîya vê pirsê tu gav navêje. Lê herhal em neheqî dikin!

Dewleta Tirk ewqas jî xirab nîne..

Karbidestên Tirk, herçiqas navê vê pirsê hilnedin jî baş zanin ku ev pirs heye. Ger rastîyê dipirsin, kes vê pirsê ji wan baştir nizane. Ji bo çareserîyê jî, karbidestên Tirk gelek kar û xebat nîşan didin!.

Çawa nîşan didin? Carina Kurdan qirdikin, carina koçber dikin..

Lê ger nekaribin bi vî şiklî 20 mîlyon Kurdê Bakûr bi temamî winda bikin û Kurdistanê serbiser vala bikin jî, hingê zmanê Kurdî qedexe dikin.. Dema milletek zmanê xwe winda bike, êdî nasnama xwe jî namîne.

Xuya ye, em nikarin bêjin dewleta Tirk naxwaze pirsa Kurd çareser bike. Ew, gor dilê xwe ji bo çareserîyê gelek tiştan dike, dicêribîne…

Yek ji van tiştan di van rojên dawî da derkete pêşîya me. Dewleta Tirk bona vê yekê daxwaznameyek (yan jî emirname) bi 12 bendî danî pêşîya ”Rêxistina Cudaxwaz”. 

Rêxistina ku ew dibêjin ”cudaxwaz” û him jî ”terorîst” malûm e..

Lê sazîya ku bi navê Tirkan van daxwazan dike kîjane? Hukumet e, Genelkûrmay e, yan MİT e? Ev ne xuyayî ye. Dibe ku çawîşekî xizmetdirêj (ûzatmalî) be..

Lê dibêjin ”hêza dewletê ya emnî” ye. Ango dewlet e..

Xuya ye dewleta Tirk a "mezin û pîroz" rêxistina ku bi "cudaxwazî" û "terorîstî" bi nav dikir, êdî nasdike, jê ra mesajan dişîne.. Baş e, ser xêrê be..

Lê daxwaz çi ne?

Dibêje, navê Kurdistanê bi kar neyne! Nebêje "Kurdistan" ji bo erda Tirkîyê, mintiqa ”Rojhilat” û ”Rojhilata Başûr”. Vê gotinê ji navê partîyê derxe! Vî navî (Kurdistan) di MED-TV û di weşanên dinê da bi kar neyne!

Xerîta Kurdistanê di weşanên xwe da nîşan nede!

Kongra Netewî ya Kurdistan” belav bike!

Hêzên xwe yên eskerî belav bike. Bila ewên li çîyê bi temamî tevî silahên xwe bên teslîm bin.

Ev jî ne bes e. Bi zmanê dayik heqê xwendinê û heqê axaftinê nexwaze!

Nasnama Tirkî ji xwe ra wek nasnama esasî qebûl bike. Ango bêje ez Tirk im!

Daxwaz bi vî awayî berdewam dikin..

Ev sazîya dewletê ku vana ji PKK dixwaze, kî ye, çi ye, ne xuyayî ye. Li dawîyê usa dibêje:

"Madem ku tu dibêjî, min dev ji dewleta Kurd berda, ez êdî naxwazim Tirkîye parçe be û bi dewleta ûnîter ra me, madem ku tu aşitî û demokratîyê dixwazî, de keremke van tiştan pêk bîne ku ez jî bibînim tu rast î yan na. Hingê ezê bifikirim…”

Ev çiqas daxwazên xweş in, ne? Piştî ku evtişt pêk bên, bi rastî jî êdî ne pirsa Kurd dimîne, ne jî Kurd!

Baş e ”rêxistin” çi bersîvê dide? Berdevkê Konseya Serokatîya PKK, Osman Ocalan ji bo van pêşnîyaran gelek kêfxweş xuya dike, wekî dewleta Tirk ew muhatap dîtîye û usa dibêje:

"Helbet, ev tiştê hanê dikarin bibin!.."

Û berdewam dike:

Lê divê dewlet li serokê me baş miqate be.. (Helbet canê wî ji hertiştî ezîz e!)

”Kurdistan” navekî cografî ye. Dema em vî navî bi kar tînin, tu nîyeteke me ya xirab tune..

        Daxwazên nivîsandî (erzê hal) ji bo xwendina bi zmanê dê, heqekî  Zagona Bingehîn e..

Em dikarin bi silahên xwe bên, teslîm bin; lê divê dewlet jî efeke giştî derîne. Ji ber ku kes naxwaze ji çîyê dakeve û bikeve hepsê.

Ji vê jî xuya ye ku di navbera herdu alîyan da ferqekî mezin ne maye û ew dikarin li hev bên. Ferqa herî mihîm jî, bawer bin, "xweşîya Serok" û efa giştî ye…

Ger ev du tişt bibin, temam e!

Helbet, Apo jî ji İmralîyê raya xwe, ango fermana xwe eşkere dike, usa dibêje:

”Di warê xwendina Kurdî û nasnamê da destûr û rizaya dewletê ewqas ne mihîm e. Di mehle û gundan da odeyên hînbûnê avakin çêtir e.”(Ozgur Polîtîka , 19, Çileyê Paşîn 2002).

Ango Apo dibêje, ger dewlet nasnama Kurdan û xwendina bi zmanê Kurdî qebûl neke jî dibe. Dev ji van tiştan berdin û di mehle û gundan da odeyên hînbûne çêkin.

Helbet, ger ”dewleta mezin a Tirk” îzna vî tiştî bide!

Çend roj piştî vê mesajê Apo mesajeke din da û merema xwe zêdetir eşkere kir:

”Xort bila çanda xwe, zman û dîroka xwe hînbin. Ev yek bi şiklekî fermî jî dibe, bi îmkanên şexsî jî. Divê daxwaza xwendina Kurdî ne bi şiklekî serhildanê be dijî dewletê, ne jî Kurd li raweran bigerin. Divê pirsa zman bi vî şiklî dernekeve pêşîyê. Ango divê rê nedin dijayetî, şer û pevçûnê bi dewletê ra, da ku xizmeta demokratîyê bikin. Divê em êkonomîya sîwîl, sîyaseta sîwîl û sazîyên çandî yên sîwîl avabikin û bi rîya wan pirsan çareser bikin.”(Ozgur Polîtîka, 25 Çileyê Paşîn, 2002).

Ev gotin gelek vekirî ye. Apo dibêje, ev daxwazîyên xort û zarok û dê û bavê wan ji bo xwendina Kurdî, wek serhildan û şer e, him jî Kurd bi vê daxwazê serê xwe li ber dewletê xar dikin. (Ev herdu tişt, serhildan û serînizmî çawa bi hevra dibe, nayê fêm kirin..) Zman û dîroka xwe hînbin, lê ne şert e ku evtişt di mektebên dewletê da bin. Bila fermî nebin, sîwîl bin.. Ji bo xatirê demokratîyê dewletê aciz nekin!..

Xuya ye, di warê pirsa Kurd da, di navbera dewleta Tirk û Apo da tu ferq ne maye, raya wan yek e. Ma êdî ji çareserîyê ra çi ma?.

Belê, xwendevanên delal, di navbera "Dewleta Tirk a Mezin" û PKK da, ”danustendinên” li ser pirsa Kurd –ger li dor maseyekê nebe jî- bi rîya mesajên ”sazîyên emnî yê dewleta Tirk”, yê ”gerîllayên serê çîyê” û yê ”Girtîyê İmralîyê” bi vî rengî çê dibe!.

Bila ji wan ra quwet be!

Lê ger ji PKK ra nebe jî, ji "Dewleta Tirk a Mezin" û ji çawîşên wê yên xizmetdirêj ra çend gotinên me hene:

Gelo, hayê we jê heye, navê ”Tirk” çi waxt derketîye di dîrokê da? Gor gotina Tirkan bi xwe, di dema ”Nivîsên Orhûn” da. Ew jî hîn sedî sed ne rast e, lê rast be jî çi nîşan dide: Dîroka Tirkan ji hezarsalî piçek derbaz dibe. Lê navê Kurdan ji 3-4 hezar sal berê vir da (di mixnivîsên Şumîr û Aşûran da, di çavkanîyên Rom û Ereban da) heye.

Li ser vê erdê, ango li Anadolê û li Trakyê, ma zemanê berê Tirkîye hebû? Helbet tune bû. ”Tirkîye” wek nav piştî avabûna Komara Tirkîyê derkete holê; ango heye tune 78 sal berê dest pê dike.

Lê bi mana welatê Kurdan ”Kardaka” 4 hezar sal berê di mixnivîsên Şumîran da, dîsa bi vî maneyî ”Korduene” di dema Xaldîyan (Ûrartûyan) da dihate zanîn û ji bo mintiqa başûr ê Gola Vanê bi kar dihat.

”Kurdistan” jî wek nav ji dema Selçûkîyên Mezin (yê İranê) vir da, ango dora hezar salî ye ku heye. Heya dîrokzan dibêjin ku cara pêşîn Sultan Sancar ev nav li vî welatî kirîye. Osmanîyan jî ev nav bi kar anîn, wek Yavûz Selîm û Kanûnî Suleyman…

Ev dora hezar salî ye ku Tirk hatine vî welatî. Lê Kurd xelkê vî welatî yê herî kevn in. dîroka wan bi hezaran sal berî Êsa dest pê dike.

Dema Tirk hatine vî welatî li vir ”Tirkîye”yek, yan jî ”Tirkîstan”ek tunebû. Lê Kurdistan hebû. Ber bi bakûr ”Ermenîstan”, ber bi rojava Bîzans (ango Romîstan), ber bi başûr Erebîstan, li bakûr, li qiraxê Behra Reş jî Lazîstan hebû.

Di ”Meclîsa Mebûsan ya Osmanî” û di ”Meclîsa Millet” ya Enqerê da jî nûnerên van hereman, bi şiklekî fermî wek ”Mebûsê Kurdistan” yan ”Mebûsê Lazîstan” dihatin binavkirin.

Lê efendîno, we nîvê Ermenan qir kir, yê mayî revand û ev welat ji wan paqij kir.

We beşek ji Roman qir kir, yên mayî koçber kir û ev welat ji Roman (Grêkîyan) jî paqij kir.

We Laz, Çerkez, Çaçan, Abaza, Ereb, Albanî û Bulgar, her usa jî lewanten û hinên dinê asîmîle kir (di nava xwe da heland) û kir Tirk.

Heya beşek ji Kurdan jî, li hêla Rojava û li bajaran we kir Tirk.

Bona vê yekê, îro ew kesê ku hûn dibêjin Tirk in, yan ew dibêjin em Tirk in, xwedê jî zane ku di sedî da 95’ê wan, heya dibe ku di sedî da 98’ê wan ne Tirk in! Ango, ew tiştê ku hûn di heqê ”nijad û xwîn û mîna” Tirkan da dibêjin, hemû vir û derew in.

Lê li cîyê ku hûn dibêjin ”Rojhilat û Rojhilata Başûrê Tirkîyê”, ango li Bakûrê Kurdistanê xelk di sedî da 90 Kurd e. tevî Kurdên Rojava, nifûsa Kurdan di nav sînorên Tirkîyê da ji 20 mîlyonî derbaz dibe. ( Tevî hemû Kurdên Rojhilata Navîn ji 40 mîlyonî derbaz dibe).

Lê îro hûn rabûne dibêjin "navê Kurdistanê bi kar neynin û bi Kurdî qise nekin!"

Ma gelo hûn qet fedî nakin?

Gotineke we Tirkan heye, dibêje: ”Yê çîyê hatîye, yê deştê direvîne.” Hûn jî wek yê çîyê dikin. We dest danîye ser rezê xelkê, lê nahêlin guşîyek tirî jê bixwe.

Lê divê hûn baş bizanin, ne bi qirkirinê ne bi revandinê hûn nikarin dawîya Kurdan bînin. Hûn nikarin milletê Kurd û Kurdistanê winda bikin.

Kurdistan parîyekî mezin e ku ji gewrîya we derbaz nabe; bi taybetî di vî çaxî da û di dinyayeke han da.

Tiştê herî baş ku hûnê bikin, divê hûn bi Kurdan ra li hev bên û vê pirsê gor esasê dadîyê û li ser bingehê wekhevîyê çareser bikin. Ew jî federasyon e.

Ne usa be, rojek wê bê hûnê mecbûr bimînin li Enqerê li derîyê sefaretekê jî bi destê xwe ”Kurdistan” binivîsin..

Lê usa bikin ku, sube em bikaribin li rûyê hev binêrin. Ev helwesta we, ev zulm, neheqî û xirabîya ku hûn dikin, di me da dil ne hiştî ye.