Benişt

Casim Rênas

Erîşkirin li ser Kurdistana Başûrê buyê benişta devê karbidestên dewleta Tirk. Serokvezîrê Tirkiyê di heyama seredana xwe li Englandê da dîsa behsa vê yekê kir û got, ku eger Dewleta Yekbûyî ya Amerîka (DYA) daxwazên me qebul neke, mafê me ye, ku dijî PKK li „Şimala Îraqê“ operasyona leşkerî çêbikin.

Herwekî tê zanîn, dewleta Tirk ji DYA dixwaze êriş bike li ser bingehên PKK li Kurdistana Başûrê. DYA, dewleta İraqê û Federasyona Kurdistana Başûrê dijî operasyona leşkerî ya Tirk in û dibêjin mifta çareseriya vê pirsê li Tirkiyeyê û dive dewleta Tirk bona çareserkirina pirsa Kurd gavan bavêje.

Ne tenê karbidestên hikumatê û leşker, her usa muxalefetên Tirkiyê jî, hebûna bingehên PKK li Kurdistana Başûre wekî xeterek li ser evleyî ya Tirkiyê nişan didin. Hinek ji wan ji hikumet û leşkerê Tirk daxwaz dikin, ku herçi zûtir êrîş bikine ser Başurê.

Hinek ji wan dibêjin, me heya niha gelek caran operasyona leşkerî çêkir, lê belê em serneketin. Bona sarketinê bilî operasyona leşkerî, rêyên dinê jî hene. Armanca wan ji „rêyên dinê“ wekî rojê ron û eşkere ye: bi destê nokerên xwe va, xirabtir kirina pêyvendiya PKK û hikumeta Heremê Kurdistan û hezên Kurdistana Başurê.

Di du-sê salên dawiyê da, li Kurdistana Başurê, mabeyna PKK û hezên herêmê bûyereka xirab rûnedaye. Divê bê gotinê, ku ev yeka ne ji baqiliya PKK, ji ber mesuliyeta PDK û YNK ye.

Hinek Tirk, ku Partiya Komarî û Gel (CHP) yek ji wan e, pêşniyar dikin, ku leşkerê Tirk Kurdistana Başûrê dagîr bike. Serokê CHP dibêje „me berê jî peşniyar kir, ku bona pêşî lê girtina hatin û çûyina PKK, divê li deşta Zaxoyê kembera emniyetê were avakirinê.“ 

Herwekî tê xuyanê, gava karbidestên Tirk û qaşo muxalefetên Tirkiyê, gava devên xwe yên ne bi xerê vedikin, behsa êrîş û dagirkirinê dikin, benişta berê diçûn, ku bi salan devê wan da bûye.

Gelo dewleta Tirk di zirûfa navxweyî û navnetewî ya hêyî da wê êrişê Kurdistana Başurê bike an na? Ne diyar e.

Lê tiştek diyar e û wekî ronahiya rojê eşkere ye. Ev e, ku gava dewleta Tirk êrîş bike, an jî bi pêşniyara CHP û yên dinê Kurdistana Başurê dagir bike, Herêmê Kurdistan jêra dibe dozex, batlax, ku êdî nikare jê derkeve. Ji ber ku Parlamento û Hikumeta Heremê Kurdistanê gelek caran eşkere kirine, ku dijî hatina leşkerê Tirk in. Amade ne bona parastina ax û deskevtiyên xwe şer bikin. Ne tenê hezên Başurê, her usa hemû hezên Kurdistanê diji dewleta Tirk derkevin, tevger û bizav bikin.

Helbet di vî warê da helwest û kiryara PKK jî gelek giring e.

Serokê Komîta Karger a Kongra Gel Murad Karayilan, di giftogoyek da, ku ligel wî hatiyê çêkirinê, usa dibêje. “Armanca operasyona leşkerî Federasyona Başur e.”

Karayilan rast dibêje, rastiyek, ku rêxistinên din yên Kurdistanê gelek caran gotibûn, ducar dike.

Lê belê gotina, ducar kirina rastiyek baş e, lê ne bes e. Divê bi gor vê rastiyê tevger bêne kirinê. Ango bahaneyek nedin dewleta Tirk û dagirkerên dinê Kurdistanê, ku êrîşê Kurdistana Başurê bikin.

Gelo Karayilan di vî warê da çi difikire? Çi dibêje? Gelo amade ye şerê dawî ya bê armancên netewî rawestine? Da ku bahane nede destê dewleta Tirk.

Gelo Karayilan amade ye di warê Kurdistana Başûrê, hêz û serokên vê beşê da, ji rêbaza İmraliyê derkeve? Ku Ocalan hertim digot,Federasyona Kurdistanê bi destê nokerên DYA hatiye damezrandin, Federasyona Kurdistana Başurê “Îsraîla didu ye” li ser yekbûna Tirkiyê xeterekê mezin e, bona pêşî lê girtina vê xeterê ji bo Tirkiyê Mustafa Kemalê didu pewîst e, Barzanî û Talabanî kevneperest in, serokaşîret în û hwd..

Gelo Karayilan amade ye bêje, ku gotina Ocalan yên jorî û yen dinê xelet in?

Lê ji gotina Karayilanê berê tê xuyanê, ku Karayilan ne tene amade nine, her usa piştgirê gotina Ocalan e, rêvingê rebaza İmraliyê ye.

Ku usan e, hingê kî bawer dike, ku Karayilan di bangawaza xwe yên dawiyê da samîmî ye?  Herwekî tê zanîn Karayilan di giftogoyê da, her usa pêşniyar dike, ku mabeyna hemû rêxistin, sazî û kesayetiyên Kurdistanê da hevkarî û hevahengî were ava kirinê.

Bawerî bi du alî bona hevkarî pêwîst e û mixabin çu hêzên Kurd nîne, ku baweriya xwe bi PKK bîne û sedema vê yekê jî PKK bi xwe ye.

Eger Karayilan bi rastî dixwaze hevkariya hêzên Kurdistanê pêkwere, divê ji rêbaza İmraliyê derkeve.

Ku, xuya ye ev yêka jî gelek dijwar e.