Beravejî Kirina Rastiyan û Erkên Me

Casim Rênas

Gelo di dinyayê da û di warê beravejî kirina rastiyan da, medyayek heye, ku qasê medyayên Tirk û Erebên şoven zîrek bin?

Gotin û helwesta medyayên Tirk û Erebên şoven derbareyê destura Serokê Herêma Kurdistanê li ser alayê Iraqê, carakî dinê nişan da, ku tû kes qasê wan jêhatî nîne.

Ew bi rastî zîrek in, reş wekî sîpî, sîpî jî wekî reş nişan didin.

Serokê Herêma Kurdîstanê hêja Mesud Barzanî destur dabû, ku di sazî û dezgeyên fermî da, heya ku Parlamentoya Iraqê li ser alaya nû ya vê welatî biryar dide, bilî ji alaya Kurd tû ala neyên bilind kirin, çi alayê niha ya Iraqê û çi alayên partîyên Kurd, ango alayên PDK û YNK..

Serokê Herêma Kurdistanê digot û dibêje, ku alayê ku niha tê bî karanin alaya dewleta Iraqê ye, ya BAAS’ê ye, sembola zilm û zordariya diktatoriya Saddam e.

Mesud Barzanî dibêje, Enfalan, qetliema Helebçe di bin sîbera ev ala da hatine çêkirinê. Eger Parlamento li ser alaya nû ya Iraqê biryar da, ser seran ser çawan, em jî alayê nû li Kurdistanê, li tenişt Alayê Rengîn bilind dikin...

Gotinên Serokê Herêma Kurdistanê zelal in, daxwazên gelê Kurd in, gelek maqul in û haqaret li tû nirxên netewî û dînî nakin.

Lê medyayên Tirk û Erebên şoven gotina Mesud Barzanî beravêjî  kirin.

Gotin, li ser destura serokê Herêma Kurdistanê Kurdan alayê Iraqê anîne jêr û şuna wî alayê Kurd danîne.

Yek ji televizyona Tirk haqeret li Alayê Rengîn kir û got, “Kurdan şuna alayê Iraqê, paç û perûyê xwe bilind kirin.”

Medyayê Tirk gelek caran behsa evê dikir, ku Kurdan rêz li alayê Tirk nagrin.

Gelo çawa dibe, ku medyayê Tirk tinazê xwe bi Alayê Rengîn bike û paşê jî ji vê gelê bindest bixwaze, ku rêz li alaya dewleta dagirker bigre?

Ku ev ala jî wekî alayê BAAS remza zilm û zordarî ye.

Tiştekê vaşartî nîne, Kurdan ji sala 1991’ê virda alayê BAAS’ê li Kurdistana Azad bilind nakin û gelek caran bi zelalî gotine, em alaya Saddamê diktator di welatê xwe da bilind nakin.

Bi gor xalek ji xalên Destura nû ya Iraqê divê alayeke nû were çêkirinê, daku remza hemu netew û olên Iraqê be.

Şovenên Erebên Sunnî û medyayê wan rastiyên hanê yên ku li ber çav in, nabinin, nexwazin bibinin.

Şovenên Ereb yên Sunnî ne tenê axaftina Mesud Barzanî beravejî dikin. Her usa bi medya, sîyasetmedar û melayên xwe va Kurdên Başurê tehdît dikin û dibêjin, “yên ku bi zorê hatine girtin, wê rojek dîsa bi zorê werin stendin.”

Gelo pêwîst e, gotinên hanê şirove bikin?

Axaftina şovenên Ereb ji serê heya binî beravêjî kirina rastiyan e, tehdît kirina gelê Kurd e.

Kurdên Başur bi zor û zordariyê mafê tû gel ji destê wan ne stendine.

Bi kar û xebatê xwe va, bi dayina dehhezaran qurbanî va, mafên xwe yên reva û bi heq bi dest xistine û dixwazin li welatê xwe azad û serbest bijin.

Kurdên Başur gefa çu gel û kes nexwarine; aşitîxwaz in.

Dixwazin pêyvendiyeka aşitîxwaz ligel hemu gelên Iraq û welatên cîran bigrin.

Lê belê şovenên Ereb yên Sunne nexwazin ligel Kurdan, li ser bingeha wekhevî pêkve bijin.

Bê pêç û pena, li ber çavê hemu alemê ji Kurdan ra dibêjin “îro hûn bi hêz in. Eger sibe em bi hêz bûn, ne Federasyon, Hikumet û Parlamanto, ne jî Alayê Rengîn dimîne!”

Divê ji bîra me neçe, ku helwest û gotinên Erebên Sunne yên nijadperest her usa ya hemu dagirkerên welatê me û nahezên azadiya gelê Kurd in; nemaze ya dewleta dagirkerê Tirk e.

Bîr û bawer û daxwazên wan li ser Kurdistana Başurê weku şovenistên Ereb yên Sunne ne.

Ew jî dixwazin Ezmuna Kurdistanê têkbiçe, Kurdên Başur disa bindest bin.

Bûyer û gengeşiyên dawî li ser alayê, carekî din da xuya kirinê, ku bona parastina deskevtîyên netewî, berê her tiştê divê gelê Kurd li Kurdistana Başurê, yekdeng û yekhelwest bin.

Yekdengî û yek halwestî bi tenê ne bes in.

Divê Hikumeta Herêma Kurdistanê nehele qelaştok bikeve refa gel, pirtir guhê xwe bide dengê zehmetkeşên Kurd û daxwaza wan cî be cî bike.

Ku, barê giran ya xabatê li ser milê gundî, karker û karmendan da bû, bona rizgariya Kurdistanê, ew cangoritir û fidekartir çînê civata Kurd bûn.  

Divê rêxistin, sazî û dezgeyên Kurd yên perçeyên din, li hember êrîşa şovenistên Ereb piştgiriya helwesta Serokê Herêma Kurdistan û Kurdên Bakur ya derbareyê alayê BAAS’ê bikin.

Baştirin piştgirî jî pêkanina yekitî û hevkarî ye, bi hêz kirina xebata azadî û serbestî ye.