“Gorên Bi Komel” Û Jenosîd

Casim Rênas

Di wan mehên dawiyê da, li Iraqê gelek “gorên bi komel” an jî gorên cemî hatiye derxistin.

Bi gor gotina Vezîrê Mafê Mirov yê berê Baxtiyar Emîn, heya niha li Iraqê 300 gorên bi komel hatiye ditîn, ku têda hestiyên nezikê dused hezar kes hebûne. Dîsa bi gor gotina Baxtiyar Emîn li Iraqê nezikê 2 mîlyon kes “bê ser û şun” in, ango ji wan çû xeber nîne, gelo mane an na? Eger nemane, çi bi ser wan da hatiye, gorên wan li ku ne? 

Di wan rojên dawiyê da, li paytexta Kurdistana Başur, Hewlêrê goreke bi komel hatiye derxistin. Ciyê gorên bi komel di serdema Baas’ê da Bingeha Emniyetî ya Partiya Baas bûye.

Bi derxistina gorên bi komel va, hêdî hêdî çarenusî qurbaniyên enfalan jî diyar dibe.

Gava zilm û zordariya rejîmê BAAS li ser gelê me tê hole, “Kîmyabaranî ya Helepçe” tê bîra me û em jî her tim behsa vê karasatê dikin.

Lê belê, bi baweriya min girîngiya Enfalan ji karasatê Halepçe zêde nebe jî, kêm jî nîne. Di encama Enfalan da bi jîn û zarok, bî pîr û xortê va, nezîkê  182 hezar Kurd “bê ser û şun” in û bi derxistina gorên bi komel jî çarenusî wan hêdî hêdî diyar dibe.

Herku hêjmara gorên bi komel, ku hatine derxistin, zêde dibe, pervendeyê (dosyayê) Seddamê li ber dadigeh jî sturtir, ehtimala mehkûm kirina Saddam bi tavanê jenosîdê xurttir dibe.

Eger Saddam û hevalên wî, bi tavanê jenosîdê bêne mehkum kirin, hingê rê li ber mehkum kirina dagirkerên din yên Kurdistanê jî vedibe. Û bivê nevê ew jî wekî Seddamê wê bêne  mehkum kirinê.

Ku, yek ji wan dewleta Tirkiyê ye.

Dewleta Tirkiyê, di warê navnetewî da,  ji ber meseleyê jenosîda Ermenî, sal bi sal dikeve tengasiyê. Zexta navnetewî li ser Tirkiyê roj bi roj zêde dibe.

Bi baweriya min Tirkiyê nikare xwe li ber vê zexta navnetewî rabigre. Evê mecbur bimîne û tavanê jenosîda Ermeniyê îtîraf bike.

Dewleta Tirkiyê ligel îtiraf kirinê, dikare bêje, ku “jenosîda Ermeniya di serdema İttîhad Teraqî da qewîmiye, em Komarî ne, pêyvendiya me ligel vê jenosîdê nîne”, û hwd.

Van gotina dewleta Tirk di qada navnetewî da tê qebul kirin an na? Ev babeteke cuda ye.

Lê dewleta Tirkiyê derbareyê jenosîda Kurdan nikare usa bêje. Ji ber ku li ser qetliama Pîranê, Agiriyê, Dersîmê gelek wext ne çûye, şahîdên wan qetlîaman hê jî dijîn. Ligel vê jî yên ku li Pîranê, Agirî û Dersîmê jenosîd xulqandina, ji esmanê ne hatine, ji vî welatî ne û bi destura karbidestên dewletê xulqandine.

Bi bawariya min yek ji erkên rêxistinên siyasî û civakiya Kurdên Bakûrê, berhev kirina belge û dokumentên pewîst li ser jenosîda kurdan e. Divê partî û rexistinên siyasî ji bona vê armancê dezgeyeke netewî damezrînîn, an jî piştgiriya xwe li dezgeyên, ku di vî warî da kar û xebatê dike, nişan bidin, alîkariya wan bikin.

Bi kurtî divê em kurdên Bakûr divê xwe amade bikin.

Daku ji mehkum kirina Seddam bi tavanê jenosîdê îstîfade bikin, bona mehkum kirina dagîrkerên xwe..