Nîgeranî

Casim Rênas

Bûyerên Dihok û Zaxo, li ba gelê Kurdistana Başurê nîgeraniyek peyda kiriye. Herçend rewş îro aram be jî, xelk nîgeranî hinde ye, ku bûyerên hanê berdewam bin.

Tiştekî vaşartî nîne, ku cinarên Başurê, ango dagirkerên Kurdistanê, dijminên demokrasî û federasyonê, kevneperest û nijadperestên Ereb, bi kurtî neyarên Ezmuna Kurdistana Başurê, li derfetê digerin, ku derb li Kurdistana Başurê bidin, destê xwe dirêjî kar û barê ve parçeyê bikin.

Bê guman eger pêşî neyê girtinê, berdewbûna bûyerên Dihokê û rûdavan hanê, rê li ber nehazên Kurdistana Başurê xweş dikin.

Her usa divê ji bîra me neçe, ku dagîrkerên Kurdistanê bona, ku aramiya Kurdistana Başurê têkbiçe, bi hemû hêzên xwe va hewl didin; wê bidin jî...

Bûyerên Dihok û Zaxo jî, ji bo wan keyseke baş e ji bona gihiştina armancên xwe yên kirêt.

Eva aliyekê mesele ye.

Aliyekê dinê jî ev e, ku mafê tu partî, rêxistin, grub û kes nine, ku xwe poles û qazî bizane, biryar bide, ku ev an ew kes an rêxistin tewanbar in û ew bi xwe jî cezayê wan diyar bike.

Herwekî li Dihokê rûda ye, eger her grubek xwe qazî û poles bizane û êrîş bike ser bingeha Yekgîrtiya Îslamî, êdî dezegeyên hêzên asayişê, dadigeh û qaziyên Kurdistana Başurê bo çi ne?

Divê ji bîra me neçê, helwesteka hanê ne tenê helwesteka diktatorî ye, her usa pêpes kirina deshilatiya Kurdistana Başur e, nasnekirina serweriya welat e.

Bi gor zagonên Kurdistana Başurê hemu rêxistinên siyasî azad in bi tenê an ligel rêxistinê dinê wekî hevpayman beşdarê hilbijartinê bin û di proseya hilbijartinê da bîr û baweriya xwe pêşkeşê gel bikin, ji wan deng bixwazin.

Eger partiyek di proseya hilbijartinê da qanunan pêpes kir û bi gor zagonê hilbijartinê tevnegeriya, li welatê dezgeyên aşayişê, dadigeh û qazî hene. Ew dikarin pêşiya qanunşikêne bigrin û cezayê wan diyar bikin; ne her grubek an kesek.

Bi gor nuçeyên rojnama û sîteyên Kurd, Yekgîrtiya Îslamî di proseya hilbijartinê da propagandayên xirab û dijî ezmuna Kurdistanê kiriye. Diyar e ev yeka tiştekê ne baş e. Lê belê dîsa jî mafê tu kes û hêz nine, ku êriş bike ser bingeha vê partiyê û cezayê wan destnişan bike. Ev erk û karê hêzên asayiş û dadigehên Kurdistanê ne.

Bi baweriya min erkê partî û grubên siyasî, ku dijî Yekgirtina Îslamî ne, di proseya hilbijartinê da eşkere kirina rû û armanca vê rexistinê ye. Û ev yeka ne tenê baştirin ceza ye, her usa demokratiktirin rê ye jî...

Rêya hanê li Kurdistana Başurê demokrasiyê bi hêztir dike, her usa rê û keys nade dagirker û nehazên Kurdistanê, ku destê xwe dirêjî kar û barên Başurê bikin.

Helwesta Serokê Herêma Kurdistana Başurê Mesud Barzanî helwesteka demokratîk û netewî ye. Divê êrîşên ser bingeha Yekgirtiya İslamî bê mehkum kirinê.

Bi baweriya min baştirin rêka pêşi lê girtina geşbûna Partiya Îslamî, çareser kirina pirs û pirsgirêkên civakî û aborî ye. Ji ber ku em hemû dizanin, gava pirs û pirsgirêkên civakî neyêne çereser kirinê, demokrasî bi hemû dezgeyên xwe va cigîr nebin, tevgera îslamî bi hêztir dibe.

Li Başurê jî gavê yeka, ku divê bona çareser kirina pirsên civakî û aboriyê, ji bona cîgirtir kirina demokrasiyê bê avêtinê, yekxistina herdu îdare ye.