Senger Girtin
Casim Rênas

Di wan rojên dawiyê da dîsa “demazrandina dewleta Kurd ya serbixwe”, “xetera dewleta Kurd li ser aramiya navçe” û meseleyê Kerkukê ketin rojeva siyasiya deverê Rojhılata Navîn.

Rojnama û televîzyonên Tirk, nuçeyeka derewin dubare, sêbare dikin, ku di rojnameka Amerîkî da derketiye, qaşo ”poles û peşmergeyên Kurd li Kerkukê Ereb û Tirkmanan digrin, çavên wan digrin û dibine ciyên ne diyar.”

Di televîzyona resmî ya Tirk bi navê TRT da gelek bername û nûçe tên belav kirinê, ku qaşo Kurdan li Kerkukê zilm û zordarî li Tirkmeman dikin. Hinek Tirkmen li ber mikrofonê diaxifin, behsa vê hendê dikin, ku Kurdan çawa li wan zilm dikin; çawa êriş dikin ser mala wan û mal û milkê wan talan dikin!..

Konsertên, ku stranbêjên nijadperest û faşist têda beşdar dibin, stranên dijî Kurdên Kerkukê tên gotin, diruşmên dij-Kurdan tên bilind kirin.

Hikumeta dagirkera Tirk jî siyaseteka durû bi rêva dibe. Alîkî va bi rêka Bayloza xwe li Baxdayê, pirozbahiya xwe pêşkeşê Mesud Barzanî dike ji bo hilbijartina wî wekî Serokê Herêma Kurdistanê. Alîkî va jî ne tenê pêşiya dijmintiya Kurdên Kerkuk û Başurê Kurdistanê nagre, her usa bi rêka radyo û televîzyonên resmî wekî TRT va, vê neyartiyê tundtir dike.

Herweha dewleta dagirkera Suriyê jî bi Kurdên Başurê va mujil dibe. Bayloza Suriyê li Enqere, di giftogoyek da, ku li gel wî hatiye çêkirin usa dibêje: “Damezrandina dewleta Kurdî li heremê (Iraqê), parsenga (balansa) navçeyê sero-bino dike û Dewleta Yekbûyî ya Amerîka (DYA) jî bona pêşî lê girtina damezrandina dewleta Kurdî cehd nake, hewl nade.”

Bayloza dewleta dagirker û diktatora Suriyê, ku di bin zexta DYA û welatên Ewropî da ye, dev jê hemu tiştê berdaye. Bi Kurdên Başurê va mujil e; neyartiya Kurdan dike. Bayloza nijadperest usa dibêje: “Di warê damezrandina dewleta Kurd da, welatên cîran li hev hatine. Damezrandina dewleta Kurd çu caran nayê qebûl kirinê. Divê bê zanin, ku damezrandina dewleta Kurd, xeterekê mezin e li ser dehatûya heremê.”

Helwesta dewleta Cumhuriyê Îslamiya Îranê, yên dagirkerên dinê cuda nîne. Serokkomarê nû Mehmud Ehmedîdijad yek ji “Yaranên Xatê Îmam” e, “Xatê Îmamê, ku kijan parçe dibe bila be, dijminê azadiya Kurdistanê ye, dijî “Kurdên xwe  “banga cihadê” daye.

Ma halwelsta hevpeymanên Kurdan di hikumeta İraqê da, ji yên dagirkeran baştir e? Dek û dubaraya Serokvezîrê İraqê İbrahîm Caferî di heyama sond xwarinê da ji bîra me nuçûye. Belê Caferî û derdorê wî hê jî dev jê dek û dubareyê bernedane. Her wext bi bahaneyek pêşiya xebata Komîteya Kerkukê, ku bona cî be cî kirina xala 58’ê hatiye damezrandin, digrin. Asteng derdixin pêşiya Encumena Bajarê Kerkukê, nahelin Encumen karê xwe bike, erkên xwe bi cî bine û gelek karên ne reva û dij-hevpeymanî.

Herwekî tê xuyanê, ku dijminê me li hember xebata rizgariya gelê me, bi taybetî jî dijî deskevtiyên Başurê, dijî Federasyona Kurdistanê senger girtine û keys, derfet digerin, ku dirba xwe lêxin.

Herku amade kirina qanuna esasiya İraqê ber bi pêş diçe, herku yekxistina herdu hikumeta Kurd nêzik dibe, herku bi rêva birina Kerkukê di bin serokatiya Listeya Birayetî da cîgir dibe, hewl û cehda neyarên me jî pirtir dibin.

Divê hêzên welatparêzên Kurd jî çeperên xwe qehîm kin, keys nedine dijminê. Rêka vê yêkê jî, herwekî berê îro jî hevkarî û hevxebatiya hêzên welatparêzên Kurdistan e.