Partîya Sosyalîst a Kurdistan:
Tezekirina mehkema Ocalan tiştekî naguhure

Daîreya Mezin ya Dadgeha Mafên Mirovî ya Ewrûpa jî biryara DMME ya du sal berê, di derheqa Avdilla Ocalan’da erê kir, ku tê da dihate gotin dadgeha Tirk ew gor dadîyê (adil) mehkeme ne kirîye. Ev biryar jî diçe Encumena Wezîran yê Ewrûpa. Encumen yan ji Tirkîyê dixwaze ku vê biryarê bi cî bîne, yan jî bêje ne hewce ye.. Êhtimala mezin ev e ku ji Tirkîyê bixwaze ku bi cî bîne.

Li Tirkîyê hin sazî û kes vê biryarê dikin mesela êtibarê, dibêjin Yekitîya Ewrûpê dest dirêjîya serxwerîya me dike. Lê eva gotineke ne li cî ye. Dema welatek bixwaze bibe endamê Yekitîya Ewrûpê, divê hukma huqûqa wê jî nas bike. Qeyde û şertên ku ji bo herkesî derbaz dibin, helbet ji bo Tirkîyê jî derbaz dibin.

Hin kes û sazîyên dinê jî, ku di navbera wan da serokê CHP Baykal jî heye, dixwazin vê biryarê bikin mane, wek bûyera ala Tirkî ya du meh berê, bi kar bînin, xelkê dijî Kurdan û dijî Yekitîya Ewrûpê kiş bikin. Êhtimaleke mezin e ku evana, di van rojên pêşî da vê kar û xebata xwe ya xirab geş bikin.

Lê bi rastî, biryara DMME ne dijî Tirkîyê ye, ne jî dikare rewşa Avdilla Ocalan biguhure.

Ev biryar di alîyê huqûqî da bi şiklî ye. Ango nabêje ku Ocalan bê gune ye, yan we çima ceza dayê. Dibêje, Öcalan berî ku derkeve dadgehê, di binçav da demekî dirêj ma ye. Ji parêzgerên (awûqatên) wî ra têr waxt ne hatîye naskirin ku parêznama xwe hazir bikin. Her usa di heyeta dadgehê da yekî esker cî girtîye, herçiqas piştra bi yekî sîwîl ra hatîye guhartin jî.. Evana hemû wek sebep hatine nîşandan û hatîye gotin ku “ew dewa gor dadîyê derbaz ne bûye.”  

Hingê, ku gor biryara DMME bê kirin, divê dewayê Avdilla Ocalan bê tezekirin. Ango hertişt ji serî dest pê bike: gunekarkirin, parastin û hwd…

Lê usa be jî, heya ger Avdilla Ocalan di dadgeheke dinê da, di “dadgeha curmên giran” da bê mehkemekirin jî, bo wî tu tişt naguhere. Heya, ger dev ji helwesta xwe ya berê bernede, ji bo Kurdan jî tu tişt naguhure. Hertişt ducar dibe, ewqas. Helbet di heyetê da yekî esker nabe, têr waxt didine parêzgeran û hwd… Lê biryar, bê guman dîsa wek berê derdikeve. Ne DMME , ne jî kesekî din li benda biryareke cuda ye. 

Her usa jî, xuya ye ku Ocalan helwesta xwe ya berê naguhure, ango cara berê teslîmî dewleta Tirk bû, dev ji hemû daxwazên Kurdan berda û dîsa usa bike. Heya zêdetir kêfa dewleta Tirk bîne.. Ew jî dibe firsendeke teze ji bo propagandeya dewletê.

Ji ber vê ye ku, ne ev biryar ji bo Ocalan û PKK serketinek e, ne jî bo Tirkîyê zirar û zîyaneke giran e. Di dagehê da ew lîstîka berê wê ducar be û piçek waxt bıçe û mesref bibe, ewqas…

Ger, rêberîya AKP û hukumeta wan bi ber bayê wan kesan nekevin, ku dixwazin vê biryarê bikin mane û pevendîyên Tirkîyê bi YE ra qut bikin, vê biryarê wê bi cî bînin. Ne usa, pirseke mezin derdikeve di navbera Tirkîyê û YE da.

Ji bo milletê Kurd tu ehemmîyeta vê biryarê tune. Ne Yekitîya Ewrûpê ne jî dadgeha wê pirsa Kurd bi şiklekî baş nekirîye rojeva xwe, pê mijûl ne bûye û doza maf û azadîyên milletê Kurd yên esasî ne kirîye. Her usa jî, tu nîyeta Avdilla Ocalan û PKK tune ku vê biryarê ji bo doza Kurd baş bi kar bînin, li pêş dadgehê maf û daxwazên milletê Kurd biparêzin û li dinyayê bidin bihîstin. Na, derdê wan ne ev e.

Hingê ji bo nijadperest û şovînên Tirk sebebekî makûl tune ku vê biryarê bikin mane û tevlihevîyê derxin. Her usa heqê PKK û hevalbendên wê jî tune ku vê biryarê ji bo xwe wek serketinekê nîşandin û midetekî dinê jî Kurdan bi vê yekê mijûl bikin.

Avdilla Ocalan ji xwe, çend sal e ku li Îmralî, di dest dewleta Tirk da bûye maşikek. Ji bo Kurdan û Tirkan, her usa jî bo YE  tiştê mihîm ne rewşa wî ye, divê ne ev be, lê rewşa milletê Kurd e, ku hîn ji heq û azadîyên xwe yên bingehîn bê par e, di bin zulm û zordestîyeke giran da ye.

Dadî (edalet) berî hertiştî ji bo çareserkirina vê pirsê hewce ye. Ev dadî jî bi dewayên usa sosret, wek lîstikê zarokan bi cî nayê; divê Kurd hemû heqên xwe yên bingehîn di warê sîyasî, îdarî û çandî da bistînin. 

Ev heqên ku îro, ji bilî çend milletên mezlûm û hîn kole wek me, hemû milletên himçax û medenî xwedîyê wan in.

Divê milletê Kurd jî ji vê koletîyê xilas be, qedera xwe bi serbestî tayîn bike, ango di heqê serrastkirina dahatû û karê welatê xwe da azad be.

Ew yek îro bi federasyoneke Kurd û Tirk û li ser esasê wekhevîyê çê dibe.

PARTÎYA SOSYALÎST A KURDİSTAN

13 Gulan 2005