Kurd bi zmanê xwe xwendinê dixwazin
Dewleta Tirk bi zordestî bersîvê dide

Êdî bes e ev barbarî!

Di van rojên dawî da li Kurdistana Bakûr û li bajarên mezin ên Tirkîyê xortên Kurdan heqê xwendinê dixwazin bi zmanê dayikê û daxwazên xwe bi rê olaxên aşitîxwaz, bi nivîskî û bi devkî digihînin rektorên zanîngehan; carina bi hevra, carina yek bi yek. Lê mixabin dewleta Tirk bi destê polêz û cendirme, bi qehr bersîva daxwazên wan dide. Ango vê daxwazê wek curmekî dibîne, wan diêşîne û bi destê Sazîya Bilind ya Perwerdegarîyê (YOK) wan ji mektebê dûr dixe.

Di nav xortên zanîngehê da daxwaza xwendinê bi zmanê Kurdî li Stembolê dest pê kir û ji wir derbazî Enqerê, Edenê û Kurdistanê bû. Bi hezaran xortên zanîngehê, kom bi kom arzûhal dane serkirdayatîya fakulte û zanîngehan û gotin em heqê xwendinê dixwazin bi zmanê dayîk, ango bi Kurdî. Divê zmanê Kurdî jî bibe wek dersek û bê xwendin. Li hin cîyan xortên lîsê, heya zarokên dibistanên pêşîn jî ev daxwaz nîşan dan. Li  gele cîyan dê û bavên wan jî piştgirîya vê daxwazê dikin.

Di arzûhala xortan da usa tê gotin:

* "Piştî guhartinên ku di Qanûna Esasî da çêbûn, zêdetir rê vedibe ji bo karanîna zmanê Kurdî.

* Li Tirkîyê heya nuha hebûna gelê kurd û gelên din hate înkarkirin û rê li ber karanîn û pêşvebirina çand û zmanê wan hat girtin.

* Di nav erkên hemû sazîyên dewletê da yek jî ev e ku, gor pirmilletî û pirçandîya welat bingeheke demokratîk û pirrengî ava bike. Em ji rektorîya zanîngehê dixwazin ku zmanê Kurdî jî bibe dersek û kî bixwaze bikaribe bixwîne."

Ev daxwazeke gelek li cî ye, heq e ji bo milletê Kurd ku ev heq bi salan e ji destê wan hatîye girtin.

Lê sazûmana Tirk ku li ser zor û zulmê ava bûye ji kurdan ra ewqasî jî nasnake.

Serkirdayetîyên zanîngehan van arzûhalan qebûl nakin û vê daxwazê wek curmekî dibînin. Afîşek hazir kirin li dîwaran xistin ku xort "şaşîyeke han" nekin. Li gelek cîyan jî di derheqa van xortan da muamele kirin, ew gunekar kirin, hinên wan ji bo salekê, hin jî bi temamî ji mekteban dûrxistin.

Li Dîyarbekrê di Zanîngeha Dîclê da polêzê bi navê "Hêza Lezik" bi panzerên xwe, derê dersxaneyan girtin.

Li Lîseya Bismîlê sê miellîm, bi navê Mesût Firat, Rojhat Kayran û Leyla Durmaz hatin girtin, ji ber ku li ser dîwarên Lîsê hatibû nivîsandin ku "Em bi zmanê dayîkê xwendinê dixwazin".

Dîsa Sekriterê Egîtîm-Senê (rêxistineke mamosteyan e) Medenî Alpkaya, ji ber ku beyanek derxistibû û piştgirîya vê daxwazê kiribû, ew jî hate girtin.

Li Meletyê, Zanîngeha İnonî jî xwendekaran Sazîya Perwerdeyî ya Bilind protesto kirin û gotin "Em bi zmanê dayîk xwendinê dixwazin!" Serkirdayetîya zanîngehê bona vê yekê ew gunekar kirin û 10 xwendekar ji mektebê hatin dûrxistin.

Li Dîyarbekrê, li mintiqa Çarixlîyê 6 zarokên dibisitna pêşîn, ji ber ku şîara ”Em xwedina Kurdî dixwazin!” bilind kirin, cendirme ew girtin birin û îfadeyên wan girtin.

Ev tiştên ku dewleta Tirk di destpêka hezarsalê teze jî bi rêva dibe tenê bêdadî û zordestî ye, har û hovî ye.

Komara Tirk (KT) bi van kirinan Beyana Heqên Mirovî ya Cîhanî ya Milletên Yekbûyî dide bin lingan.

KT, bi van kirinan Peymana Rêxistina Ewrûpê ya Ewleyî û Hevkarîyê (REEH) jî dide bin lingan.

KT bi vî awayî wadên ku dabû Yekitîya Ewrûpa jî binpê dike. Guh nade Şertên Kopenhagê û Belgê Şirîkatîyê.

Bi kurtahî, KT bi van kiryaran huquqa navnetewî dide bin lingan û dijminahîya mirovetîyê dike.

Di vî zemanî da qedexekirina zmanê milletekî di warê dan û stendinê û perwerdegarîyê da ji barbarîyê pêve ne tiştek e. Eva nijatperestî û faşîstîyeke eşkere ye.

Em, wek Partîya Sosyalîst a Kurdistan, bi dil û can piştgirîya vê daxwaza xortên Kurdan dikin. Her usa jî hêvî û daxwaz dikin ku hemû milletê me ji vê daxwazê ra xwedî derkeve.

Her usa jî hêvî û daxwaz dikin ku herçî xebatkar, rewşenbîr û demokratên gelê Tirk jî piştgirîya vê daxwazê bikin, dijî vê zulma nedîtî derkevin.

Divê raya giştî ya dinyayê jî li himber vê zordestîyê bêdeng nemîne.

Berî hemûyan Yekitîya Ewrûpê li himber binpêkirina Şertên Kopenhagê bêdeng nemîne.

Divê dewleta Tirk êdî dev ji vê har û hovîyê berde.

PARTİYA SOSYALİST A KURDİSTAN
22, Çileyê Pêşîn 2001