Sekriterê Partîya Sosyalîst Kemal Burkay di 17 Sibatê da li Hollanda, bajarê Den Haagê konferansek da.

Konferanas bi destê rêxistinên Holanda yên Partîya Sosyalîst a Kurdistan (Bakûr) û Partî Demokratî Kurdistan (Başûr) hatibû hazirkirin.

Zmanê konferansê bi Kurdî bû. Qasî 300 kesê dawetkirî ji çar parçên Kurdistanê û nûner û berpirsîyarên gelek partîyên Kurd ku li Hollandê hene, di civînê da amede bûn. Konferans piştî nîvro di saet 14.00 da dest pê kir heya saet 18.00 ajot.

Babet li ser rewşa welat û dinyayê ya dawî bû. Ango, bi taybetî piştî bûyerên 11 İlonê guhartinên teze di sîyaseta Amêrîkê da çi ne û tesîra wan li dinyayê û li Rojhilata Navîn, her usa jî li ser pirsa Kurd wê çi be û helwesta Kurdan wê çi be..

Burkay di axaftina xwe da got: “eva pêleke guhartinê ya teze û mezin e ku tesîra xwe bi taybetî li Asya Navîn û Başûr û li Rojhilata Navîn bike. Piştî têkçûna Yekitîya Sovyêt û bloka sosyalîst, li Ewrûpa Rojhilat, li Asya Navîn û li Balkanan statûko hejîya, sînor guharîn, dewletên teze ava bûn. Ew guhartin hat li sînorê Rojhilata Navîn sekinî. Piştî Şerê Kendavê li Iraqê jî guhartin çêbûn, lê heya serî neçû. Nuha, piştî bûyerên 11 İlonê, dor hatîye Rojhilata Navîn.

“Amêrîka heya duh silahên kîmyevî û bîyolojîk di dest dewletên heremê da, wek Iraq û İranê bi taybetî ji bo İsraîl xetereke mezin didît. Lê piştî 11 İlonê êdî bo xwe jî xeter dibîne. Dixwaze rejîm û hukumetên heremê yên neyar biguhure û yên dost bîne ser hukim. Ew jî bibê nebê statûkoya heyî wê bihejîne. Dibe ku sînor jî bilivin, xerîte jî biguhirin..

“Guhartina statûkoyê ji bo me Kurdan ne tiştekî xirab e. Ji ber ku ev sazî û dewletên heremê, ev sînorên heyî her usa jî welatê me parçe dikin û sedemên bindestîya me ne. Hêza me Kurdan têr nake ku em vê statûkoyê hilweşînin û van sînoran bilivînin. Hilweşandina sazîyên heremê yên zordest û kevneperest, hejandina statûkoyê bi destê kê dibe bila bibe ji bo me ne xem e, heya dikare tesîreke baş li ser rewşa me bike, mîna dawîya Şerê Kendavê..

“Helbet, guhartina Statûkoyê bi tena xwe têr nake. Divê rewşa dinyayê û bi taybetî rewş û helwesta me Kurdan jî têr bike ku em bikarin ji vê guhartinê îstîfade bikin. Şerê Pêşîn yê Dinyayê û ya Duwem jî li heremê statûko guhartin lê me ne karî jê îstîfade bikin. Ji ber ku him em di warê sîyasî da baş organîze ne bûn, him jî rewşa dinyayê rê ne da me.

“Divê vêcar qe nebe em Kurd ji guhartinê ra hazir bin, helwesteke baş bigrin û ji maf û daxwazên xwe ra xwedî derkevin.”

Burkay berdewam kir û got: “Li Afganîstanê şer çêbû û hukim guharî, Amêrîkî hevalbendên xwe anîn ser hukim. Xuya ye, dor hatîye Iraqê. Bi raya min Amêrîka biryara xwe daye sazûmana Iraqê biguhure. Lê ji bo operasyona bejîyê jê ra hêzên heremî hewce ye. Ew jî yan leşkerê Tirk e, yan jî Kurd in.

“Tirk nawazin dijî Iraqê bikevin şer. Ji parçebûna Iraqê gelek ditirsin. Lê hin planên wan jî heye ku, dema şer çêbe bikevin Kurdistana Başûr û Musûl û Kerkûkê dagrin. Helbet ew bi rizaya Amêrîkê dibe.

“Dagirtina Tirkan xetereke mezin e ji bo Kurdan. Dikarin kartê Tirkmenan jî bilîzin û wek Qibrisê li heremê dewleteke totik avabikin, ji Kurdan ra gelek serêşîyan derînin. Ji dest wan bê, dixwazin sazîya heyî li Kurdistana Başûr jî hilweşînin..

“Bona vê yekê, divê Kurd razî nebin ku Tirk li heremê operasyonê bikin, yan eskerê Tirkan di vê operasyonê da bi kar bê.

“Kurd bi xwe divê çi bikin? Ew jî girêdayî plana Amêrîkê ye. Gelo dawîya şer çi be? Ger piştî Saddam li Iraqê sazûmaneke demokrat û federal avabe û Kurdistana Başûr jî di vê sazîyê da wek beşeke federal cîyê xwe bigre, ew ji bo Kurdan baş e. Lê divê ev yek ji nuha va zelal be. Muxalefeta Iraqê ya ku piştî Saddam hukim bistîne ew jî vê yekê qebûl bike. Amêrîka garantî bide.

“Ango divê Kurd pêşîya xwe bibînin, bawer bin. Hingê ew dikarin di vê guhartinê da rola xwe bilîzin. Usa nebe divê Kurd herema xwe nekin cîyê ar û şewatê.

“Tiştê ku ez dibînin, Kurdên me yên başûr û serokên wan di vî warî da realîst in. Ew jî daxwaza federalîyê dikin û dibêjin, pirs ne tenê guhartina Saddam e, piştî wî çi be, ew mihîm e..”

Burkay, her usa jî got: “Ku şer dest pê bike, meriv ji nuha va nikare bêje tesîrên xwe çi bin. Dikare Tirkîye û İranê jî bikişîne nav û agirê şer gelek fireh be. Hingê tesîra xwe li ser parçê dinê yê Kurdistanê jî bike. Divê Kurd ji nuha va sîyaseteke zelal û rast bidin pêşîya xwe.

“Berî hertiştî, divê Kurd bi hev bişêwirin û yekitîya wan hebe, raya wan yek be. Ango ew bi hev nekevin, lê bi hevra hereket bikin. Ya duwem jî, divê Kurd ji bo parastina herema xwe û mafê xwe dudil ne bin, ango xwedî biryar û helwesteke zelal bin. Da ku destkevtîyên heyî li Kurdistana Başûr ji dest wan neçe û bikaribin gavên ber bi pêş bavêjin.

“Di vî warî da bar û berpirsîyarîya giran dikeve ser milê Kurdên Başûr. Divê ew yekitîya xwe xurt bikin û bi Kurdên parçên dinê ra jî bişêwirin. Ji ber ku di vê demê da hêzeke herî piçûk jî bo Kurdan giranbuha ye. Em di vî warî da, gor îmkanên xwe li gel wan in.”

Burkay, di axaftina xwe da, her usa jî li ser rewşa Kurdistana Bakûr sekinî. Bi kurtî, behsa guhartinên du-sê salên dawî kir, ku piştî girtina Ocalan çêbû. çawa sîyaseta Ocalan û PKK guharî û di rewşeke hanê da ew çi dixwazin, ji bo çi dixebitin û divê Kurdên Bakûr çi bikin...

Konferans bi du beşan pêk hat. Piştî axaftina Bûrkay nîv saet navber hate dan. Piştî wê jî gelek ji beşdaran rabûn li ser vê babetê bi kurtî raya xwe gotin û pirsên xwe kirin. Burkay bersîva van pirsan jî da û civîn bi serfirazî giha dawî.