Nameya Burkay:

"KURDAN JI BÎR NEKIN!"

Sekriterê Giştî yê Partîya Sosyalîst Kemal Burkay ji wezîrên derva yên welatên Yekitîya Ewrûpa û berpirsîyarên wan ên Komîsyona Ewrûpa ra nameyek bi rê kir. Burkay di nameya xwe da li ser "Pelgê Şirîkatîyê" ya ji bo Tirkîyê raya xwe eşkere kir û daxwazên gelê Kurd careke din anî bîra wan.

16 Çirîya Paşîn, 2000

Birêz ...

Komîsyona Ewrûpa di 8'ê Çirîya Paşîn da Pelgê Şirîkatîyê ji bo Tirkîyê eşkere kir. Di vê pelgê (wesîqê) da tiştê ku ji Tirkîyê tê xwestin, ango reformên ku divê ew bike, yek bi yek hatîye nivîsîn.

Em wek Partîya Sosyalîst a Kurdistan piştgirîya van daxwaz û pêşnîyaran dikin û wan wek firsendeke baş dibînin ji bo guhartina Tirkîyê. Divê dewleta Tirk van reforman, bi taybetî tiştên ku di warê mafên mirovî û demokrasîyê da jê tê xwastin di waxtê da bi cî bîne, raya giştî ya hundur û der nexapîne.

Lê mixabin, di vê pelgê da bi şiklekî eşkere û fireh behsa pirsa Kurd ne bûye, ku pirsa herî mezin e ji bo Tîrkîyê. Heya tê da navê Kurd jî derbaz nabe. Lê, di dema borî da sazîyên Yekitîya Ewrûpa, bi taybetî Parlamena Ewrûpa, çend caran di derheqa Kurdan da biryar girtibûn û çareserkirina vê pirsê wek şertekî danîbûn pêş Tirkîyê.

Sebebê vê helwesta dawî ya şermoke çi ye? Ger ev ji bo xweşkirina dilê hin hêz û kesên şovîn ên Tirk be, ku li himber pirsa Kurd gelek bi hêrs dikevin, şaş e û xizmeta vê pêvajoyê ji bo avakirina demokrasîyê li Tirkîyê nake. Ji ber ku ew rewşa xirab a Tirkîyê di warê demokrasîyê da di rûbarî pirsa Kurd da ye. Tirkîye heya ku vê rastîyê qebûl neke û ji bo çareserkirina pirsa Kurd li ser bingeha heqîyê gavên aşitîxwaz nevêje, nikare di warê mafên mirovî û demokratîyê da jî tu gavekî mezin bavêje û reformên hanê bi cî bîne.

Di vê wesîqê da helbet ji bo Kurdan jî tiştên baş hene. Wek daxwaza serbesthiştina weşanên radyo û têlevîzyonê bi zmanên hemû welatîyan û heqê xwendinê. Lê ev daxwazên hanê jî, ji ber ku wek "heqên hûrgelan" ne hatine bi navkirin, dewleta Tirk wan di çarçuva "mafên şexsî" da dibîne û dil nake ku ji bo bi cîanîna wan tu berpirsîyarî hilgire ser milê xwe. Ewê ji bo van tiştan ji Kurdan ra çiqasî destûrê wê bide, ew jî ne xuyayî ye.

Helbet, pirsa Kurd ne pirseke usa piçûk e ku bikeve çarçuva "mafên şexsî", heya ne jî statuya hûrgelan têra çareserkirina vê pirsê dike. Ev pirsa milletekî mezin e bi nifûseke 40 mîlyon û bi welatekî parçebûyî. Milletê me va ye bi salan e di Tirkîyê, Îraq, ¢ran û Sûrîyê da ji bo serbestîyê ber xwe dide, şorişên mezin dike. Di dinyayê da milletê ku qasî me di rîya azadîyê da bedêl daye û hatîye êşandin kêm e.

Nîvîyê milletê Kurd, qasî 20 mîlyonî li Kurdistana Bakûr û di nav sînorên Tirkîyê da dijî.

Heya ku ev pirsa mezin çareser nebe, gelo aşitî û demokratî dikare bê Tirkîyê, mafên mirovî bi cî tên? Heya ku ev pirs çareser nebe, Tirkîye dikare heyîyên welat ji bo pêşveçûnê bi kar bîne? Ewrûpa Tirkîyê bi serêşîyeke mezin wek pirsa Kurd digire nav xwe?..

Xuya ye herkesek, berî hemûyan jî rêvabirên dewleta Tirk bi xwe, divê pirsa Kurd veneşêrin, gor giranî û mezinahîya xwe li ber çav bigrin. Çareserkirina vê pirsê him ji bo gelên Kurd û Tirk, him ji bo heremê, him jî ji bo Yekitîya Ewrûpa şert e û bi feyde ye. Çareserî jî li ser bingehê wekhevîyê û gor heqî û rastîyê dibe.

Em wek Partîya Sosyalîst a Kurdistan, bi salan e ku ji bo çareserîyeke usa heqnas û himçax dixebitin, şiklê wê jî federalî ye ku herdu gel dikarin li ba hev bijîn.

Birêz...

Ji ber ku di vê Pelgê Şirîkatîyê da pirsa Kurd gor giranî û mezinahîya xwe cî ne girtîye, heya navê xwe jî ne hatîye gotin, gelê Kurd gelek êşîyaye.

Qe nebe di şiklê dawî da bila ev neheqî bê rakirin, bi taybetî di civîna bilind a Nîsê (Nîce) da daxwazên Kurdan di vê pelgê da bên cîkirin.

Bi mîlyonan Kurdên nefîbûyî û koçkirî, bikaribin vegerîn welatê xwe, zirarê wan bê dayîn û birînên wan bên dermankirin.

Bi zmanê kurdî radyo û têlevîzyon serbest be û bila dewlet bi xwe jî, çawa bi zmanê Tirkî dike, bi zmanê Kurdî jî weşanê bike. Ji ber ku em jî beş û salmeyan didin.

Xwendina îcbarî ya pêşîn bila bi zmanê Kurdî jî bibe. Her usa jî bi zmanê Kurdî lîse, zanîngeh û mektebên teknîk û meslekî vebin

Bila partîyên Kurd jî serbest bin.

Bi guhartina Qanûna Esasî bila nav, hebûn û heqê Kurdan bêne qebûlkirin.

Birêz...

Em piştgirîya we dixwazin ji bo 20 mîlyon Kurdê Kurdistana Bakûr û Tirkîyê, ku ji hemû heqên netewî bê par in, heya zmanê wan jî hatîye qedexekirin.

Me ji bîr ne kin!

Bi silav û hurmetên min..

Kemal Burkay

Sekriterê Giştî

Partîya Sosyalîst a Kurdistan