Hikumeta Tirkiyê Divê Guhê Xwe Bide Daxwazên Rewa

Daxwazên çalakiyên demokrat û aşitîxwazên ku ji aliyê Partiya Aşitî û Demokrasî (BDP) û Kongreya Civaka Demokratîk (DTK) ve hatiye amadekirin û Partiya Maf û Azadiyan (HAK-PAR) û Partiya Beşdariya Demokratîk (KADEP) piştgirî lê dikin, daxwazên rewa û maqûl in.

Daxwazên hanê her usa jî daxwazên Partiya me ne. Partiya me bi salan e cî be cî kirina wan kar û xebat dike. 

Bê guman cî be cî kirina daxwazên hanê, proseya guhartin û demokrasî li Tirkiyê bi hêztir, rê li ber çareserkirina pirsa Kurdî bi rêka dan û standinê ve xweştir dikin.

Bûyer û pêşhatiyên Afriqaya Bakûr û Rojhilata Navîn nîşan didin ku zilm û zordarî, tund û tijiya rejimên dîktatorên navçeyê, nikarin pêşiya xebata azadî, demokrasî û guhartinxwazên gelan bigrin.

Serokwezîrê Tirkiyê Erdoxan, ku ji dîktatorên navçe dixwaze guhê xwe bidine daxwazên gel û tund û tijî bi kar neynin, divê bi xwe jî guh bide daxwazên Kurdan û pêşiya tund û tijiya hêzên ewlekari yê Tirkiyê bigre, da ku êrîş li ser çalakiyên aşitiyane nekin.

Hikumeta Partiya Dadî û Pêşveçûnê (AK Partî), ku di warê guhartin û demokrasiyê da karên hêja kiriye, nabe çarenivîsa “proseya vekirinê” qurbanê bi dest xistina çend hezar dengan bike. Hikumeta AK Partî divê guhê xwe bide daxwazên çalakiyên demokratîk û aşitiyane û bona cî be cî kirina wan gavên pêwist  bavêje.

BDP ve DTK çalakiyên hanê bi tenê amade kirine. Ku gor bîr û baweriya me ev yêka hanê kemasiyeke mezin e.

Partiya me piştgiriya çalakiyên hanê yên aşitîxwaz û sîvîl û daxwazên wan dike.

PSK banga çalakvanan dike, ku bona pêşî lê girtina ajavegeriyê, li ser çalakiya aşitîxwaz û sîvîl pêgîr bin.

Partiya me banga hêzên welatparêzên Kurdistan, hêzên aşitixwaz û demokratan dike ku:

Bona bi dest xistina mafê perwerde bi zimanê zikmakî;

Bona sekinandina çalakiyên leşkerî û derxistina lêborîna giştî ya bê qeyd û şert;

Bona belavkirina sîstema caşitî û saziyên militarîst, ku li Kurdistana Bakur kar dikin;

Bona eşkerekirina “cînayetên qisas ne diyar” û bi siza gihandina tawanbarên wan cînayetan;

Bona amade kirina destûreke nû, ku pir netewî û pir oliya Tirkiyê nîşan bide û bibe zaminê mafên netewî û olî,

Bona bi dest xistina armancên hevbeş yên vî rengî, bi hevre kar û xebat bikin, li ser çalakiya aşitiyane pêgîr bin.

28’ê Adara sala 2011

PSK-Partiya Sosyalîst a Kurdistan