Zora dewleta Tirk naçe çeteyan, qetilkaran, bazirganên esrar û eroyînê, diz û talankerên mezin. Kesên han xurt in, şirîkên dewletê ne; heya meriv dikare bêje dewlet in. Tirkîyê ew îdare dikin. şûr û şeşar di destê wan da ye. Xezna millet di destê wan da ye..

Kes nikare ji wan bipirse û wan derxe pêşîya dadigehan. Dema derxe jî di demeke kurt da berat dikin.

Ew mezinê welat in. "welat û millet bi wan serbilind e!"

Lê zora dewleta Tirk, zora dozger (mideymomî) û dadger (hakim), zora polêz û cendirmeyên Tirk diçe feqîr fuqareyan, diçe zarokan, rewşenbîran… Di qereqol û qişleyan da ew eza û teda dibînin. Di dadigehan da ew ceza dixwin û dikevin hepsan.

Nivîskar û rewşenbîrên ku ji ber nivîs û axaftinên xwe, an ji bo bîr û rayên xwe tên êşandin, tên girtin li vî welatî gelek in. Cezaya ku dane Serokê DBP (Partîya Demokratî û Aşitîyê) Yilmaz Çamlibel nimûneyek ji wan e.

Çamlibel heft sal berê li bajarê Kutahyayê, di civîneke li Komela Haqên Mirovî da qisekirîye û bona vê yekê di derheqa wî da dawe hatibû vekirin. Mehkemê vê dawîyê salek ceza da Çamlibel û mehkema bilind jî bi lez û bez ew tesdîq kir.

Xuya ye, dewleta Tirk ji DBP û ji serokê wê Çamlibel aciz e. Dixwaze bi rîya vê cezayê wî bavêje hundur û kar û xebata wî bide sekinandin.

Ev biryar jî nîşan dide ku dilê karbidestên Tirk tune ku ber bi demokratîyê biçin. Ew hovên berê ne, dijminê Kurdan in û dijminê bîr û bawerîyên pêşketî û demokratîk in.

Mehmed Axar serokê polêz û wezîrê hundurê berê ye. Bi devê xwe got ku, "me xetera wê jî daye ber çavan û ji hezarî zêdetir operasyon çêkirîye!"

Di dema Axar da, bi rastî jî bi sedan û bi hezaran kesên sîyasî, welatparêz û rewşenbîrên Kurd, her usa jî Tirkên rewşenbîr û demokrat hatin kuştin û curmkarên wan ne hatin dîdin. Ji ber ku li pişt wan dewlet hebû. Çawa Axar dibêje, ew operasyonên dewletê bûn.

Çeteyan meriv kuştin, ticareta esrar û eroyînê kirin, di berika wan da pasên kesk û sor hebûn ku gelekê wan bi destê Axar hatibûn îmza û morkirin. Ew bi van pasan di navbera welatan da bi rehetî çûn hatin, karê xwe kirin. Kesên ku hatin girtin jî bi destê polêz û zabitan, ango bi destê MşT'ê ji zindanan hatin revandin. Yek ji wan M. Alî Axca bû..

Silahên ku di kuştina gelek kesan da bi kar hatin, bi destê Axar belav bûbûn...

Ango Axar qasî çivîka nav niftê qirêj bû, qasî kujdarê hezar kesan gunekar bû.

Lê ev Axar çend roj berê di meclîsa Tirkan da, bi destê Komîsyona Lêgerînê "paqij " bû!. Ango gotin tu curmekî wî tune!

Axar bi dengên DYP, ANAP û DSP'îyan xilas kir, ji adaletî revî!

Gelo Adaleta Tirkan heye ku meriv bêje "jê revî"?..

Lê hûn ji serokê DSP'ê û serokwezîrê Tirkîyê Eco ra çi dibêjin ku navê wî derketîye wek kesekî "dirist?.."

Hela li vî diristî binêrin ku yekî wek Axar bi destê xwe paqij kir û ji adeletê revand?..

Em dizanin Eco çi derewîn e! Ewê ku milletê Kurd û heqê Kurdan ewqas înkar dike ma jî wî derewîntir kî heye?

Lê vê bûyerê jî nîşan da ku Eco ne dirist e. Yê ku ji wî ra dibêjin dirist sextekar in, derewînên ji wî mezintir in.

Dema dor hate Meclîsa "bilind", wê jî di deqekî da biryara komîsyonê testîq kir! Kesî hewce ne dît ku lî ser vê babetê qise bike.. Hemû partî û hemû mebûs bêdeng man.

Belê, mezinê vî welatî diz û haydût in û herkes ji wan ditirse, heya hukumet û parlamena Tirk jî di bin emrê wan da ye..

Gelek caran hat eşkerekirin ku esrar û eroyîna ku tê welatên Ewrûpa, di sedî da heyştêya wê ji ser Tirkîyê derbaz dibe? Gelo, gava dewleta Tirk rê nede, evtişt dibe?

Helbet nabe. Ne sirek bû ku li pişt vê ticaretê dewleta Tirk bi xwe hebû. Dewletê şerê dijî Kurdan bi van perê reş bi rêva bir, ewqas silahên mezin bi van perê reş dikire. Profesorên Tirk bi xwe gelek caran gotin ku, di vî karî da ji ser tirkîyê salê 100 mîlyar dolar dizivire, diçe û tê û qasî 20 mîlyarî li Tirkîyê dimîne.. Dewleta Tirk bo vî karî çete sazkirine, yan jî bi xwe bûye çete!

Evtişt herkesekî zanibû; lê dewleta Tirk heya nuha înkar dikir. Lê li vê dawîyê, tiştekî ecêb bû. Cîgirê Serokê MHP, şewket Bulent Yahnîcî, bi zmanekî gelek zelal evtişt eşkere kir. Yahnîcî usa got:

"Di navbera Yuksekova û Marsîlyayê da bi buhayê 100 mîlyar dolarî eroyîn derbaz dibe. Evtişt bi alîkarîya polêz dibe. Eroyîn bi tiran diçe û erebeyên polêz û kesên din wan diparêze û ji wan ra rê nîşan dide. Ev kar 20-25 sal e dibe. 15 Mîlyar dolar di nav welat da dimîne û parva dibe. Bona vê yekê jî MşT'a Tirk û hin dorhêlên din bûne du bend û şerê hevdu dikin…"

Yahnîcî navê polêz dide, lê "hin kes û dorhêlan" bi nav nake. Ew jî leşker e, ango zabit in, walî û qeymaqam in..

Eferim jî Yahnîcî ra. Ew ji partîyeke nijadperest û faşîst e û partîya wî di hukumetê da ye; lê wî dîsa jî rastî got. Bîlesewe ne gotine: "Camêran bikuje lê heqê wan jî bidîyê!"

Dozgerekî ku li hêla Entebê çend sal maye, dibêje, li Tirkîyê koalîsyoneke reş heye ku ji qaçaxçîyan, ji polêz, dozger û dadgeran, ji sîyasî û burokratan (zabit, walî, qeymaqaman) pêk tê. Evana 50 sal e ku toyê eroyînê di nav xwe da parva dikin. Ji bona vê yekê jî naxwazin şer bisekine, li Kurdistanê rewşa taybetî rabe.

Nêvîyê aborîya Tirkîyê bê qeyd e. % 40'ê wê ji esrar-eroyînê tê.

Nuha hûn baştir tê digihijin ku çima, li Tirkîyê general, polêz, gelek sîyasîyên şerxwaz naxwazin şer bisekine, aşitî çêbe û rewşa taybetî rabe. şer nanê wan e, ambara wan bi perê reş tijî dibe.

Ser gotinên Yahnîcî, Ewrûpî, wekî ji xewê hişyar bûne, nuha ji Tirkîyê dipirsin: "Ev çi mesele ye?"

Ewrûpî, Ewrûpî, ma hûn zarok in, ma hayê we tune ku dewleta Tirk bi salan e ticarîya vî karî dike?!. Hûn jî, Amêrîkî jî vê yekê ji me û ji Yahnîcî baştir dizanin; lê yê we jî sîyaset e.. Hûn dostên xwe rûreş nakin.. şik tune ku, MşT'ên we jî ji vî karî para xwe distînin û hin mesrefê xwe bi van peran dikin. Wek operasyonên CÎA'yê li şran û Nîkaragua…

Tirkîyê MGK îdare dike, MGK'ê jî general!

Vê dawîyê Tirkîye bû namzetê endametîya YA. Me jî, gelek kesê dinê jî gotin herhal Tirkîye, bêdil û giran be jî wê biguhure. Ji ber ku ewqas dil dike bikeve YA, divê hin guhartinan bike ber bi demokratîyê biçe û di pirsa Kurda da jî hin gavan bavêje..

Lê xuya ye, dilê hukumet û leşkerê Tirk tune ku di warê demokratîyê û di pirsa Kurd da gavên piçûk jî bavêje. Evyek ji rapora MGK xuyayî ye.

Wekî eyan e, MGK (Konseya Mîllî ya Ewlekarîyê) sazîyeke usa ne ku tê da serokdewlet, serokwezîr û çend wezîrê dinê, serokê MşT'ê û general cî digrin. Hejmara generalan ji sîwîlan zêdetir e. Sîwîl jî çiqas sîwîl in, ew jî pirseke din e. Ji ber ku Tirk, bi gotina wan bi xwe, "milletekî leşker"in; îş û karê wan şer û pevçûn e…

Bi salan e Tirkîyê MGK îdare dike, di MGK da jî gotina generalan derbaz dibe.

Li ser pirsên mezin û piçûk, berê MGK raya xwe dibêje. Hukumet divê berî hertiştî pêşnîyarên MGK bigre rojewa xwe û çi lazim e bike. Heya nuha kesî ne dîtîye ku hukumet ji pêşnîyareke MGK ra bêje na. Evtişt nebûye û nabe; ne usa, genaral roja dinê dikarin dest daynin ser hukum!.

Ango MGK li ser hukumetê ye, li ser parlamenê ye, li ser hertiştî ye!

Milletê Tirk milletekî leşker e û dewleta Tirk jî dewleteke eskerî ye.

Gor qeyde û qanûnên YA sazîyeke wek MGK nabe. Ew bi demokratîyê ra li hev nayê.

Bona vê yekê jî, yek ji pêşnîyarên YA jî, ne ranekirin, lê kêmkirina rol û tesîra MGK'ê ye. Lê xuya bû ku general ji vî tiştî ra ne razî ne!

General ji qebûlkirina nasnama Kurdî ra ne razîne!

General ji têlewîzyona Kurdî ra ne razî ne!

Di qanûna Esasî da bendek heye ku zmanan (armanc Kurdî ye) qedexe dike; genaral ji guhartina wê ne razî ne!

General ji gelek tiştan ra ne razî ne!

Di rapora MGK da hatîye gotin ku Tirkîye nikare van guhartinan bike, Krîterên Kopenhagê bi cî bîne; ew kiras li Tirkîyê nabe!

Hingê wê çibe? Sîyasetvanên bê şexsîyet, tirsonek û xulam dikarin ji generalan ra bêjin na? Na, nikarin bêjin!..

Baş e, gel li kuderê ye? Ew xuya nake, gel li meydanê tune!.. Li vî welatî esker "paşa" ye û gel "qûl"ê wan e.

Xuya ye ji vî hevîrî ra hîn gelek av divê..

Me yê bigota: Madem usa ye, bila sîyasetvan hemû kar û hukim bidine destê generalan, û rasterast ew hertiştî îdare bikin. Bila di serê qanûna esasî da bê nivîsandin ku:

"Hukum bê qeyd û şert yê generalan e!"

Lê ne hewce ye ku em bêjin, ji xwe usa ye…

Zarokên Kûçeyên şstembolê Kurd in..

Kûçeyên şstembolê ji zû va bûne wek kûçeyên Rîo, tê da bi dehhezaran zarokên bê xwedî dikelin.

Rojnameyan nivîsandin ku nêvîyê wan di van 2-3 salên dawî da ji Kurdistanê hatine.. Ango ew zarokê Kurdan in ku ji ber zulma dewleta Tirk cî-warên xwe berdane, ji welatê xwe revîne, li şstembolê bêmal, bettal û belengaz bûne..

Belê nîvê wan di du-sê salê dawî da hatine, lê nîvê dinê?.. Xuya ye piranîya wan jî jî dîsa zarokên Kurdan in û berî wê hatine. Ji ber ku di van 10-15 salên dawî da Kurdistan bi destê dewleta Tirk ser û bin bû, 4000 gund hatin walakirin û Kurd, ji bo xilaskirina canê xwe ji welatê xwe direvin… Gelek ji wan diçin şstembolê, şzmîrê, Bursayê, Edenê û bajarên dinê.

Ev zarok, ji heft salî bigir heya çardeh-panzdeh salî, di kûçeyan da destmalên kaxiz û benîştê difroşin, solan boyax dikin, camên tomafîlan paqij dikin, bi vî awayî nanê xwe derdixin, alîkarîya malbata xwe dikin.

Belê zarokên kûçeyan li şstembolê Kurd in. Zarokên ku li kûçeyên şamê, Bêyrûtê solan boyax dikin jî Kurd in.. Em xwe dizanin nizanin, hemalên şstembolê jî Kurd in, yên şam û Bêyrûtê jî. Herhal li Bexda û Tehranê jî usa ye..

Ev jî trajedîya me Kurdan e. Welatê me li Rojhilata Navîn welatê herî dewlemend e, lê em ji ber zulma dagirkeran koçber bûne, bi rîyan ketine, li welatên xelkê şerpeze bûne..

Ma evtişt heqe rewa ye?..

Adet usûlê Tirkan e, gelek pesna xwe didin. Demirelê gerdenga dema devê xwe vedike, dibêje: "Boyyîk Turkîye!" Ecoyê qirok jî tim dibêje "Guçlî Turkîye!"

Ango Silo dibêje Tirkîye mezin e, Eco jî dibêje Tirkîye xurt e.

Sazîya bi navê UNDP (Bernama Peşveçûnê ya Milletên Yekbûyî) çend roj berê rewşa welat û milletan da xuyakirin, ka çiqas pêşva çûne, çiqas paşva mane..

Bi vî awayî xuya bû ku Tirkîye çiqas mezin e û çiqas xurt e.

Tirkîye di warê pêşveçûnê da di dinyayê da welatê 75'an e! Ango heya piştî Kuba, Kosta Rîka û Uruguayê tê..

Di navbera welatên OECD da Tirkîye ya herî dawî ye..

Di warê peşveçûnê da Kanada, Norwêç, DYA (USA), Swêd, Holanda, Japonya, li pêş in.

Pêşveçûn çi ye: Di warê aborî da, çandî da, di warê zanîn û teknîkê da çiqas pêşta çûyî?.

Eşkere ye ku di vî warî da Tirkîye di nav feqîr û belangazan da ye.

Lê di gelek tiştan da jî Tirkîye li pêşîya hemûyan e: Wek serhişkî, derew, bertîl, zulm û teda, eza û cefa kirin, kuştin, neheqî, mafya, nijadperestî, şovinîzm, mîlîtarîzm…

Divê meriv heqê Tirkan jî nexwe!

Nêmetên Bazara Serbest..

Sazîya Yekitîya Milletan, UNDP dîsa eşkere dike ku di dinyayê da 200 kesê dewlemend xudîyê zêdeyî trîlyon dolarî ne. (Malum e, trîlyonek 1000 mîlyar e.)

Li alîyê din, xelkê 43 welatên feqîr, ku hejmara wan 582 mîlyon e, tenê xwedîyê 146 mîlyar dolarî ne.

Di dinyayê da qezenca 1,2 mîlyar kesan roje ji dolarekî kêmtir e.

Di dinyayê da 100 mîlyon zarok bêmal in, di kûçe û kolanan da dijîn.

Rojê 30 hezar zarok dimirin, ji ber nexweşîyên ku dermanê wan heye.

Di van 10 salên dawî da 50 mîlyon kesan ji ber şer û berberîyan mala xwe terk kirin.

şro li dinyayê 10 mîlyon penaber (multecî) heye.

Di 10 salên dawî da 5 mîlyon kes di şerên nav welatan da mirin, 6 mîlyon kes jî seqet bûn.

Di parlamenên dinyayê da hejmara jinan sedî 14 ye.

Evana hemû dîdemên dinyaya himçax in, nêmet in "bazara serbest" in!

Belê, bazara serbest, ango kapîtalîzm sazîyeke ewqas delal e, dinyaye ke usa li ber me çêkirîye, usa adil e, pirsan usa baş çareser dike û wê hîn jî bike!..

Pesinker çiqas pesna wê bidin heqê wan e!