Çawa hûn xwendevanên delal jî zanin, di meha Gulanê da grûbek ji gerîllayên PKK, ku ji sîyaseta dawî aciz bûn, ji PKK veqetîyan û çûn cem Yekitî (YNK).

PKK ji vê yekê gelek aciz bû. Berî hemûyan jî serokê wê Ocalan, ku di destê Tirkan da mehkûmê ceza dardakirinê ye, lê di nav çar dîwarên cizîra _mralîyê da jî partîya xwe rehet rehet îdare dike!.. Tirk jî bi rastî jê ra çiqas baş in! Hin dibêjin têlsiz danê. Hin dibêjin, têlefona destan danê.. Lê ew jî nebe, xwedê ji Awûqatên wî razîbe, her hefte tên diçin û emir û fermanên wî digihînin hevalan, digihînin rojname û têlevîzyonan, digihînin "PPK Başkanlik Konseyî" (Lîcna Sereke ya PKK) û bersîvên wan jî vedigerînin...

Mesajeke, ango Fermaneke Apo bi vî cureyî di meha Heziranê da di kovara PKK "Serwebûn"ê da derket.

Mesaj dirêj e û wek mesajên wî yên dinê li ser gelek tiştan e. Apo di derheqa wan kesên "revîyayî" da qise dike û ji bo vê yekê YNK gunekar dike. Dibêje: "Eva senetê YNK yê berê ye, dixwaze komikekê çêke û bi xwe va girêde." Bo hevalên xwe yên veqetî jî usa dibêje:

"Evana çete ne. Di rewşa şer da curmê wan giran e. Divê cezayê herî giran bidine wan..."

"Cezayê herî giran" helbet kuştin e; ango Apo kuştina wan kesan dixwaze..

çi ecêbeke giran! Bi xwe li ber bend û sêpîyê sekinîye, dinya alem hewl dide wî ji mirinê xilas ke, lê ew bi dil û can kuştina hevalên xwe yê berê dixwaze...

Xuya ye, Apo ji xwînê têr ne bûye. Gotina pêşîyan e: "Heya can lê hebe, xû ew xû be.."

Gelo bala we dikişîne? Dozger, dadger û polêzên Tirk çima dest datînin ser rojnama hefteyî Roja Teze? Berê sebep yek bû: Di rojnamê da kîngê behsa Kurd û Kurdistanê biba û dewleta Tirk bihata rexnekirin, eva wek curmeke giran dihate hesibandin û rojname dihate qedexekirin. Nuha jî usa ye. Lê van mehên dawî sebebek teze derketîye û ew jî rexnekirina PKK ye.

Wek nimûne: miqamên Tirk dest danîne ser hejmarên 50 û 53 ji ber nivîsên Cemîl Baran, ku di herduyan da jî sîyaseta PKK dihate gunekarkirin.

Lê eva ne tiştekî ecêb e. Ocalan û Partîya wî, bi gotinên xwe, xizmeta dewleta Tirk dikin, dewlet jî wan diparêze, wek berî 12 _lonê..

Bi gotineke Tirkî, ji navbera wan av derbaz nabe!..

Ev xeber ji rapora komîsyoneke navnetewî ye ku middetekî berê çûbû Tirkîyê, ji bona eza û teda (îşkence) li vî welatî bi çi derecê tê kirin, bipirse û lê bigere. Nûnerên komîsyonê yek Swêdî, yek Awûstralî, yek jî _ngiliz bû. Kesên parlamenter û huquqnas bûn.

Di raporê da tê gotin ku, polêzê Tirk hîn jî bi rehetî li xelkê dide, li wan ezîyet dike, ji ber ku di mehkeman da tê parastin û tu ceza nabîne. Komîsyon nimûneyên jêrê dide:

Polêzekî Tirk ji ber ku di qereqolê da li merivekî xistibû û lê ezîyet kiribû hat mehkemekirin, curmê wî eşkere bû û ceza danê. Lê çiqas ceza? Mîlyon û nîvê perê Tirkîyê, ango du dolar û nîv!..

Polêz du dolar û nîvê xwe da û bi serbestî derket çû..

Polêzekî jî bi zarokekî 12 salî eza û teda (îşkence) kiribû. Curmê wî jî ispat bû. Lê mehkemê salek ceza dayê û ew jî tecîl kir; polêzê zulimkar dîsa bi serbestî derket çû...

Belê, li vî welatî polêz û esker dikarin li xelkê heqeret bikin, lêdin, eza û cefa li wan bikin, heya wan bikujin; tişt nabe! Ew di her telît xirabîyê da serbest in û curmê wan bê ceza ye...

Qetilkar û zulimkarno, werin li Tirkîyê polîzîyê bikin, ev welat gor dilê we ye!..

Lê dîsa li vî welatî, zarokê ku qutîyek baqlewe bidize bedêl 6 sal zindan e!

Rewşenbîrê ku heqê Kurdan biparêze û hukumetê rexne bike, bedêla xwe ji 2 salan bigir heya 15 salan zindan e!

Ewrûpî dereng mane ku welatekî usa delal bigrin nav xwe! Ev welat wek cennet e, ne tenê bi roj û behrên xwe, lê bi neheqî, zulimkarî û xirabî jî...

Lê zanim Ewrûpî li himber dewleta Tirk pir xweşbîn in. Nuha bêjin: Dîsa jî pêşveçûnek heye, qe nebe polêzan ew meriv û ew zarok ne kuştine!..

Nuha li Tirkîyê li ser rewşa zindanîyan gelek gilî-gotin, qal û qir heye.

Zindanî li hêvîya efê ne. Hukumetê par û pêrar soz da ku efekê derxe. (Herçiqas pêşnîyara hukumetê sîyasîyan li der efê dihêle..) Zindan heya qirtikê tije ne.

Lê va ye meh û sal derbaz dibin û ef dernakeve, zindanî jî roj bi roj bê sebir dibin, acizîya xwe nîşan didin, li vir û serêşî, şer û pevçûn çêdibin, zindanî serî hildidin, têne kuştin û birîndarkirin.

Hukumet him zindanîyan dixapîne efê dernaxe, him jî bo wan plan û dafikên teze çêdike. Yek ji wan dafikan mapisxaneyên "tîpa F" e.

Hukumet van salên dawî gelek mapisxaneyên teze çêkirin ku jê ra dibêjin tîpa F yan jî "mapisxanaya tîpa Tirk.." Dewleta Tirk dixwaze bi rîya wan ji serêşîyan xilas be, girtîyan bêdeng bike. Ev mapisxane bi odeyên piçûk pêk tên ku di her yekê da yan kesek, yan sê kes wê bimîne. Bi vî awayî ew "qoxiş"ên berê namînin ku di her yekê da gelek kes diman.

Dema ku tiştek "tîpa Tirk" be, êdî zêde gotin ne hewce ye! Tirk bi xwe jî tiştên ecêb û sosret ra "Turk îşî" dibêjin û henekê xwe pê dikin…

Lê nîyeta dewleta Tirk bi van mapisxaneyên teze, xasima bêdengkirina girtîyên sîyasî ne. Ji xwe ev ji bo wan in. Ewê sîyasîyan bikin van hucreyan û pêvendîyên wan bi girtîyên dinê ra qut bikin. Di van mapisxaneyan da xarinxaneya miştêrek, meydana miştêrek ji bo gerê û hewa stendinê û cîyê sporê jî tune.

Ango eva rewşeke gelek giran e ku li tu derê dinyayê emsalê xwe tune.

Dewleta Tirk dibêje "emê bi vî awayî girtîyan terbîye bikin!" Lê terbîyeya wan çi zulm û çi teda ye dinya alem baş dizane. Xuya ye dewleta Tirk dixwaze van merivan di zindanê da birizîne, bi tenahîyê bê moral û dîn bike. Di vê dewletê da însaf û merhemet tune.

Çare ne zulm e, ne zindan e. çare efeke giştî ye, demokratî ye, naskirina heqê mirovan e. çare naskirina heqê Kurdan e bi rîya aşitî û danustendinê.

Serok û berpirsîyarên Tirk divê ne zindanan, lê serê xwe biguhurin!

Hukumeta Tirk hazirîyeke teze dike ku Kurdên welatparêz û kesên dîndar ji karê dewletê bavêje. Di qanûnên heyî da ji xwe gelek bend û qeyd, gelek cezayên giran hene dijî "cudaxwazan û kevneperestan" ango dijî Kurdan û _slamîyan. Lê rêvebirên dewleta Tirk qîma xwe bi wan naynin û destûreke teze hazir dikin, yeke xirabtir..

Gor destûra teze mufettîş wê bikarin, bê biryara mehkemê memûran bi Kurdperwerî û şerîatperestî gunekar bikin û ji kar bavêjin…

MGK usa dixwaze, ango general usa dixwazin.. Zexta 28 Sibatê berdewam e..

Di pêvajoya endametîya Yekitîya Ewrûpê da xelkê hêvî dikir ku Tirkîye piçek biguhure, qanûn û destûrên hişk bên nermkirin û astengên pêşîya demokratîyê rabin.. De ha!.. Va ye Tirk hîn dişidînin; ber bi pêş naçin, lê ber bi paş diçin…

Xûyê van merivan usa ye!