Gor xeberên ku gihîştin guhê me û di medyayê da cî girtin, PKK gelek endam û gerîllayên xwe, ku sîyaseta PKK ya dawî rexne dikin û dixwazin jê veqetin girtîye û bi îxanetê gunekar dike. Jîyana van kesan di xeterê da ye. "Rêxistina Gelên Bin Zulmê" çend roj berê beyanek derxist û ji bona vê yekê rêvebirên PKK gunekar kir.

Tiştên hanê ji bo PKK ne xerîb in û salên berê jî gelek caran çêbûn. Lê tiştê xerîb ew e, PKK vî tiştî di demeke usa da dike ku êdî dijî dewleta Tirk dev ji şer berdaye û gotina aşitî û demokratîyê di devê xwe da wek benîşt dicû. Lê tiştê herî xerîbtir helwesta Avdilla Ocalan e. Ocalan ji cizîra îmralîyê bi destê awûqatên xwe ji PKK ra fermanan û ji raya giştî ra mesajan dişîne û van kesan gunekar dike û laf û gefan li xelkê dixwe. Yek ji van mesajan di meha heziranê da di kovara PKK Serxwebûnê, hejmar 222 da hat weşandin.

Ocalan di vê mesajê da van kesan wek xaîn nîşan dide, dibêje em di halê şer da ne û divê ev kes gor qanûn û qeydeyên şer bên cezakirin, ango bên kuştin.

Eva çi ecêba giran e, çi tezad e! Dinya alem, Kurdên welatparêz, tevî wan jî Tirkên demokrat xwe diwestînin û diêşînin ku li Tirkîyê ceza dardakirinê û astengên li pêş azadîya ramanî rabe, lê mehkûmê ceza dardakirinê Ocalan, heqê eşkerekirina bîr û ray jî hevalên xwe ra û jî xelkê ra nasnake û bê perwa emir û ferman dide ku ew bêne cezakirin, bêne kuştin!..

Bi vî awayî çawa bawerîya xelkê bi Ocalan bê, çawa bi PKK bê? Gotinên li ser aşitî û demokratîyê û kirinên han gelo li hev tên?.

Ev çi helwesta ecêb e ku PKK berekî va bi dewleta Tirk ra aşitîyê dixwaze, pêşnîyara civakeke demokrat dike, bona vê yekê jî şer bi yek alî disekinîne, lê dijî welatparêzên Kurd û dijî heval û hogirên xwe şer û pevçûnê her dimeşîne?

Partîya me, bona van bûyerên dawî, bala rêvebirên PKK dikişîne, ji wan dixwaze ku tu zirarê nedin van girtîyan, wan serbest bihêlin û ger ew kes dixwazin ji PKK veqetin, ji vê daxwazê ra hurmet bikin. Wekî din, dinya alem wê bibîne ku hemû gotinên PKK li ser aşitî û demokratîyê gotinên vik û vala ne û PKK di warê netewî û navnetewî da li himber raya giştî mehkûm be.

Lê tiştê herî mihîm ev e ku, Ocalan van mesajan bi destê awûqatên xwe ji nava çar dîwarên Îmralîyê bi rehetî dişîne der, ku hemû gotin û kirinên xwe li ber çavê dewleta Tirk e. Gelo ku dewleta Tirk destûrê nede û heya nexwaze, ew dikare vî karî bike?

Herkes jî zane ku Ocalan roja hatîye girtin ketîye xizmeta dewleta Tirk û gor emir û fermanên leşker bi kar dike. Bona vê yekê jîyana wî bexşandine. Kirin û gotinên Ocalan sedî sed gor sîyaseta dewleta Tirk e û ew mesajên xwe bi destûra wan û bi rîya awûqatên xwe dişîne der.

Ev mesajên teslîmbûnê ne ji bo gelê Kurd, lê mesajên çavtirsandin û kuştinê ne ji bo wan kesan -çi heval û hogirên wî çi kesên welatparêz, serok û sîyasîyên Kurdan- ku vê sîyasetê rast nabînin û rexne dikin.

Ew awûqatên ku van mesajan digerînin, kirina wan jî ne karekî welatparêzî ye, lê karekî gelek qirêj e, ku êtibar û şerefa huqûqnasan jî xirab dike. Ew bi vî awayî dibin haletê dek û dolavan, dibin haletê karekî pîs. Bi vî awayî ew jî dibin parçeyek ji çerxa dewleta Tirk.

Bona vê yekê, ger tiştekî xirab bibe, berpirsîyarê vî tiştî, berî Ocalan, berî PKK û berî van awûqatên berdestik, dewleta Tirk bi xwe ye.

Ger ew kesên girtî di destê PKK da bên kuştin, berpirsîyar ne tenê PKK, her usa jî dewleta Tirk e.

PKK hêzên xwe yên nav welat derxiste der, li Kurdistana Başûr bi cî kir, nuha wan kiş dike ser Kurdên Başûr, da ku gor dilê dewleta Tirk dezgeyê heyî xirab bike. Berpirsîyarê vî tiştî jî dewleta Tirk e.

Ger sibê, dijî rêber û kadrên sîyasî yên Kurd bi destê PKK û kesên provokator êriş çêbin, berpirsîyarê xirabîyên han jî dîsa dewleta Tirk e.

Piştî ku Dewleta Tirk bi alîkarîya hinekan Ocalan bi dest xist, bi rîya wî bendê PKK kir destê xwe û PKK kir xizmeta xwe, nuha jî dixwaze dîsa bi destê Ocalan tevgera Kurd bi tevayî vemirîne û di pêvajoya endametîya Yekitîya Ewrûpê da ji hemû astengên pirsa Kurd xilas be. Bona vê yekê jî, hewl dide û hemû rê olaxên qirêj bi kar tîne, da ku hêz û rêxistinên Kurd ku vê lîstikê dibînin û dixwazin pêşî lê bigrin, bê tesîr bike, ji ortê hilîne.

Dewleta Tirk, çawa berî 12 Îlonê PKK dijî tevgera Kurd bi kar anî, îro jî dixwaze dîsa usa bike.

Lê ev hewes û xeyala vemirandina tevgera Kurd wê careke din di dilê wan da bimîne.

Em, wek Partîya Sosyalîst a Kurdistan, him gelê Kurd, him jî raya giştî ya dinyayê dijî vê plana qirêj hişyar dikin. Divê kes dijî dek û dolavên dewleta Tirk, dijî vê çerxa zulmê, teror û kuştinê bêdeng nemîne.

Divê Yekitîya Ewrûpa ku xwe hazir dike Tirkîyê bigre nav refên xwe, ji herkesî zêdetir hişyar be. Birpirsîyarîya Yekitîya Ewrûpa ji ya herkesî zêdetir e.

Em careke din gazî hemû welatparêzên Kurd, gazî rêxistinên sîyasî û demokratîk dikin ku, dijî dafikên dewleta Tirk, dijî biryar û kiryarên PKK ku zirara xwe wê bide doza Kurd, bêdeng nemînin û helwestekî baş bigrin. Kî li himber van plan û karên xirab bêdeng bimîne, lê seyr bike, wekî duh, sibê jî wê gunekar be.

Em gazî wan kesan dikin ku bi dil û daxwazên paqij, bi bîr û bawerîyên baş, bo rizgarkirina welat û millet di refên PKK da cî girtine, divê van plan û dezgeyên xirab bibînin û helwesteke baş bigrin. Li himber wan du rê heye: Ewê li refên sazûmana dagirker û kolidar û xulamên wan bin, yan li ba gelê Kurd?.

Welatparêzî ne ew e ku mirov bikeve xizmeta Dewleta Tirk û êrîşî welatparêzên Kurd bike.

Ger îxanetek heye ev e!

21 Tîrmeh, 2000