Plana Tirkan li Ser Xabûrê

Tirkan dest pê kirine li nêzî Habûrê derîyeke gumrêkê yê din vedikin ji bo Iraqê. Nuha rê çêdikin, hazirî dikin û gor gotina wan heya salekê ew derî dest bi kar bike..

Armanca Tirkan ji vê derîyê duduyan baypas kirina Kurdistana Başûr e. Ji ber ku Tirk ji derîyê İbrahîm Xelîl aciz in. Li wir gumruka Kurdan heye û hatinên gumrikê ku digihîje destê Kurdan, ji bo Kurdistana Başûr gelek bi qîmet e. Her usa jî hat û çûna Kurdistana Başûr û Iraqê bi destê Kurdan tê qontrolkirin.

Tirk ji rewşa Kurdistana başûr gelek aciz in û vê yekê eşkere dibêjin. Parlamen û hukumeta Kurd, mektebên Kurdî, têlevîzyonên Kurdî, leşker û polêzê Kurd, li vê dawîyê jî avakirina banka merkezî li Kurdistanê wan gelek aciz dike. Dibêjin li vir dewleteke Kurd ava dibe. Kulla dilê wan ev e.

Tirk bi avakirina derîyê duduyan, dixwazin Kurdan ji navberê derînin û rasterast bi rejîma Bexdayê ra bidin bistînin. Di mehên çûyî da ji bo rêwingîyan wîzeya Iraqê wek şert danin û hatin û çûn zehmettir kirin. Heya, ger ji wan bê, dixwazin rîya Kurdan bi temamî bigrin. Bona vê yekê jî maneyan çêdikin. Dibêjin:

“Li alî dinê (Kurdistana Başûr) hukma iraqê derbaz nabe û valahî heye, bê ser û ber e. Li alî dinê li gelek cîyan rêyan dibirin û xerac û bertîlê distînin. Yên ku di vê rê da tên û diçin, ticareta mazotê dikin, ji vê yekê gelek aciz in.”

Lê ev gilî gotin hemû vir û derew in. rastî ziddê vê ye. Xelk di vî derî da ne ji gumruka Kurdan, lê ji ya Tirkan gelek aciz e. Li hêla Kurdan rê gelek aram e û tu xirabî, rêbirî, xerac û bertîl tune. Yê ku xelkê dûr û dirêj dide sekinandin, baş miamele nake, beşên giran û bertîlê jê distîne alî Tirkan e. Li alî Tirkan şebeke hene ku bi destê walî, qeymeqam, zabit û polêzên Tirk ava bûne û ji xudîyê qamyonan xeracên mezin distînin.

Tirk dibêjin ji derîyê teze heya sînorê Iraqê 10 kîlometre ye û Iraq bi xwe vê rê wê biparêze.. Lê gelo, ev rê 10 kîlometrebe jî, beşek ji Kurdistana Başûr e û heya nuha ne di dest Iraqê da bû, lê dîsa di dest Kurdan da bû. Ji bo Saddam ev der, gor biryara Yekitîya Milletan jî cîyê qedexe ye. Lê xuya ye, nîyeta Tirkan ev e ku vê rê bi xwe biparêzin. Ji xwe Başûr kirine rîya avê.

Nîyeteke Tirkan jî ev e ku bi rîya derîyê duduyan ticareta xwe bi Iraqê ra xurt bikin. Ew ji Ambargoya li ser Iraqê ku bi biryara Yekitîya Milletan hatîye danîn, gelek aciz in. dibêjin ji Şerê Kendavê vir da gelek zirara me bûye û dixwazin vê biryarê betal bikin, gor kêfa xwe hertiştî bifroşin.

Lê di vî warî da astengê pêşîya wan bi taybetî Amerîka ye. Amerîka naxwaze ku ambargo li ser Iraqê sist be û ji xwarin û dermanan pêve tiştê dinê bê firotin.

Dema Amerîka li dij be ji bo Tirkan zehmet e. Amerîka axayê wan e û ji bo wan ne hêsan e ku guh nedin gotina axayê xwe. Bona vê yekê Tirk di van rojana da gelek aciz in. Pirsa Xabûrê germ dikin, ji bo derîyê teze gilî gotinên mezin dikin, lê emê binêrin heya kîderê dikarin biçin?.