2024-03-29
Skip Navigation Links
Destpêk/Anasayfa
Pêwendî/İlişki
Lînk
Skip Navigation Links
Video
Album
Arşîv
İlhami Sertkaya
 
ŞEWA ÇEMÊ MERÎÇÎ
2015-03-03 09:42
İlhami Sertkaya
A şewe, mi vîre ra nêşona. Yew şewa payîzîyê 1982 bî. Di serrî koyan, dewan, serdan û şeheran de, ‘fekê merdene ra’, sîndorê kiştîşî ra, mabênê eskeran û polêsan ra, vêşanîye, têşanîye ra, ez kewtbîya ‘hal bi hal’ axir yew şewe ez amyebî leweyê çemê Merîcî. Mi hîna çem nêdîyo. La çîyo ke ez zanena, na şewe, ya ‘mirena, ya manena’. Asmeno kewe, rakerde, zelal û pak bî. Hêgayî, sey xalîyê dirîyayî, derg û hîra bîyêne. Asterekî asmen de birqîyêne, çimê mi lerzêne.

Bawer bikerê, ne ters, ne xof, ne kêyf, ne zî xem..

Se ke hîsê mi, serreyê xo girewt û nê hêgayanê derg û tarî de vîndî bîbî. Gorê misnayîşê di kesî, mi înan ra xatir wast û gamanê xo verba hêgayî eşt. Her çî kez şîyêne, kewtêne mabênê lazutan. Lazutî henî derg bî ke, bejna mi, dîyena mi, kerdî binê pelganê xo. Nika mabênê nê lazutê dergan ra, sey yew kesê korî, şîyêne. Mi het û xetê şîyena xo vîndi kerd. Hêga, nême ra sîndorê Tirkîya û Yewnanî bî. Ez kotîyê hêgayî der a, nêzana, la vengê wesayîtê eskerî, rind mi ra nêzdî, mabênê hêgayî de ameyêne. Mi xo kerd çewt, meredna, vineta. Baya lazutan, baya wele, baya mazot û gazê wesayîtî dîrega pirnika mi ra ancîyêne. Vengê wesayîtî ke kewt durî, vinet, mi xo lewna. Kinc û kolê mi kewtê çi hal, ez tarî de nêzana, nêvênena. Hêgayo lanetin hîna nêqedîyo. Gelo no çemê Merîçî kotî der o? Ez şima ra vajî; Çem, çîn o. Yanê ê di pêyayî, mi cayêde pirdê çemî ser o vîyarnê la ez nêzana. Çîyo ke înan mi ra mısnabî, di het ra di komê roştîye bî. Merikê bejne dergî, vengê xo şenik kerdbî, vileyê xo verba goşê mi çewt kerdbî, bi hermeyê xo îşaret kerdbî û vatbî ke;

-Na roştîye, qereqolê Tirkan a, a roştîye şuka Yewnanî ya, rind qayît bike, xo şaş meke, ver bi a roştîte ra şo

De ‘duman mi megêro’, mabênê nê hêgayê lazutê dergî de, roştîye-moştîye mi vindî kerdbî û nika çi ra dime yew roştîye vênena, la nêzana ê kamî ya. Gelo ez se bizanî? De Bêrê qayîtê na hekmete bikerê ke, çi ra tepya, na şewa peyêne de, bibo ke ez bi xo ver bi qereqolê Tirkan şorî! Esas, no ‘mi kişeno’!

Hêga de vecîya, kewta cayêde rut. No cayo rut de, durî ra, gege wesayîtî ver bi a roştîye şîyêne. Mi fam kerd ke uca raye ya. Mi xo çewt kerd, giran bi giran ver bi raye şîya, cayêde minasîb de, talde de vineta ke, wesayît ke bêro, ebe roştîya ey, nê panoyî ez biwanî ke, bi Yewnankî ya zî bi Tirkî nusîyo. Eke bi Tirkî binusîyo, hêy wax!Endî mi cihêtê xo şaş kerdo, eke bi Yewnankî binusîyo, ez rast ameya. Mêratê wesayîtî nêm saete ya kena nîyame. Çi ra dime veng ameya, la ez gereke zaf bi dîkat, bal antîş qayît bikerî ke nê panoyî biwanî. Roştîya wesayîtî, zê va gina panoyî ra û vîyart. Heya! Herfê panoyî sey qorê çewtinî asêne.

‘De rawaze’ mi wa xo bi xo. Endî şik qedîya, ez verba roştîye bi lerz şîya. Her çi ke ez şîyêne, roştîye bîyêne girs û hîra, vengî ameyêne, bînayî aseyêne. Reyêna şima ra vajî ke, na şuka qıjkeke çik a, nameyê xo çik o, ez hîna zî nêzanena.

Ez kewta sixletîya însanan. Yanê gorê nê halî, ez raxelesîya’.

La hîsê mi, bîbî ser û bin. Ne kêyf, ne kelecanîye.

Ez, a şew ra nata, xerîbîye der a.

A şewe, destcikerdena xerîbîya min a.

Xerîbîya min a derge, a şewe dest kerdbî ci û hîna zî dewam kena.

Gelo bîyo çend serrî?

Çi vurîya? Çi qedîya? Çi virazîya?

Çîyo ke çiman ver der o; Kurdistanê Başurî, bî wayîrê dewlete

Leteyê Kurdistanê bînan de, hîna bêdewletîya ma dewam kena.

Qey?

Çi ke, nika anderî kilama ‘demokratik Tirkîya’ esta.

Na kilame bi nê halî, hîna zaf ma xecelnena. Ma nê fîlimî hîna zaf vênenîme. Ez xo rê, a şîîra xo ya ke Çemê Merîcî û a şewe ser o mi bi Tirkî nusnabî, çend çekuyan bi Kirmanckî vajî;

‘’Waxto ke ez Merîç ra vîyarta

Ne asmen, ne asterekî, ne merdene

Ez tenya to fikirîya

Ne şabîyene, ne derd, ne merez

To fikirîya tenya ez’’




Print