2024-03-29
Skip Navigation Links
Destpêk/Anasayfa
Pêwendî/İlişki
Lînk
Skip Navigation Links
Video
Album
Arşîv
İlhami Sertkaya
 
No, qeder nîyo, qebul mekerê
2016-03-08 18:48
İlhami Sertkaya


Astrolog, nezdîyê hawt rojî ke aşme de mendbî, ameyabî ‘cêr’, ameyabî Dinyaye. Ebe nê astrologî roportaj virastê. Mi wend, bala mi yew nuqte antbî. Astrologî ropertaj de, cayêde vatbî; ‘aşme de, mi ke qayîtê Dinya kerdêne, ne sîndorî, ne welatî, qet çîyê nêasêne. Uca de ez fikirîya ke, seba herbî, xirabîye, dişmenîye, qet çîyê hewca û lazim nîyo. Ez reyna fikirîya ke, pêro mordemê xiraban ke biruşnê aşme, îta de qayîtê Dinya bikerê, ez bawer kena ke, ê zî naye fam kenê û pêro xirabîyanê xo teriknenê’. Wa roportaj uca de vindo, mi xo bi xo va ke; ’ de bira gorî, ma kotî ra nê pêro mordemanê xiraban biruşnime aşme?’.

Seba ke ‘însano ewladê însanî’! Na rastîye fam bikero, hewca nîyo şoro aşme, tayê biaqil bo, bes o. Ez rind zanena ke, zaf kesî, na rastîre bizanê zî, seba menfaatê xo, xirabîye dewam kenê. Ma gelo Erdogan nêzaneno huzurê Heq-Homayî de yew ziwan qedexe kerdene, ê ziwanî de perwerde bîyene qedexe kerdîş, guna wo? O nêzaneno ke; şarî bomde kerdene, ebe barê giranan çekan fanatîkan ra nimite ruşnayene huzurê Homayî de guna wo?

Qet merak mekerê ‘ her kes her çî zaneno’, la tayê çîyê muhimî estê ke, ‘ma’ nêzanenîme;

1- Eke Amerikayî de mebîyêne, Kobanî, rojavayê Kurdistanî, kewtêne destê İŞİD ê zalimî. (de vajê ke rast nîyo)

2- Kobanî û rojava ke saye koalîsyonî raxelesîya, PYD yî, bayraxa Kurdistanî ney, ê partîye berz kerd. Kamê ke bayraxa Kurdistanî berz kerd, PYD yî erişê înan kerd. (Kursitanê rojavayî ke, tarix de wayîrê ruhê kurdistanijî bîy, kamî û kamejî kayî nê şarî nîya no ruh ra ant, zanîno)

3- Ewro ‘kanton’ vanê, ma meşte? Herbê Surîyayî ke biqedîyo, şima o waxt bivêne, nê ‘kantonî’ benê çi? (Xora serekê PYD yî vanê –ma Surîya lete nêkenîme, ma rê dewlete lazim nîya. Ebe no hal, ma peynîya to vênenîme hal û ahwal)

4- Gelo şarê Kurdan, seba Kurdistanî handayê bedel da û danê ya, seba şexsan û partîyan? Eh! Nika helbet şima pêro nê cuwabî danê ke ‘şarê ma seba Kurdistanî bedel da û danê’ la verî şima xo xapnenê. Sebep? Her çi verê çiman der o, keko!

5- Hîris serre ra zêda yo ke, sêneyê Kurdistanê vakurî de gonîye rişîna. Dewî tal benê, kêyeyî we şaşînê, gocberîye dewam kena, nufusê nê şarî bi mîlyonan vila bî. Her çî vurîya, la herbo ke qet yew mezra ranêxelesno, serdarê înan û serek, nêvurîya. ‘Serekî va çî na partîye henî kerd. (Serekî çi nêva ke?)

6- No şar, guna wo. Ebe xendekan, domanê nê şarî, kes ‘mexendekno’, heyf o, guna wo.

7- Ma, herbî zî zanenîme, hastîye zî, bira! La no hal, ne halê herbî yo, ne halê hastîye yo!

8- Eger ke ma na Dinya de, wazenîme bibime wayîyê serbestîya xo, heq û edaletê xo, wayîrê dewleta xo, ma rê di çîyî lazim ê, zêde ney; A-eeb ruhê netwîye, yewbîneya xo virazime, yewbînî ra (juminî ra) hesbikime. Ziwanê xo, ebe nê ruhî bişuxulnime, qisey bikime, candar bikime. B- Hedefê ma, çareyê ma, dewlet bîyena ma wa. Kamî ke naye qebul nêkenê, (eke dişmenê Kurdan ê, xora dişmen ê, eke kurd ê, wa canê înan ra cennem!Goş medime înan. Wilay kesê ke bi nameyê ‘welatperwerîye’! Goş danê înan, guna xo çîn a)

9- Şoreşvanîye xirabkerdene ney, virastene ya.

10- Sîyaset ke, cayêde xemetîya, vurîya, eke bî qilêr, eke kayê qilêrî kewto ci, ê siyasetî biteriknê.

Mi, nînan va û endî şima û bi aqilê xo.

Ma nêşikîme her kesî beme aşme...

Eke xêrxwazî estê, ê gereke ma berê aşme..

De na Dinya de (hata ke dewleta to çînî bo) kam ma se keno ke? Qîmetê ma çîn o.

No hal û merhale, qederê ma nîyo, qrbul mekime.

Ez endî çi vajî? Se vajî?




Print