2022-07-04
Skip Navigation Links
Destpêk/Anasayfa
Pêwendî/İlişki
Lînk
Skip Navigation Links
Video
Album
Arşîv
 
Zarokan di şahiya Newrozê de helbest xwendin
2022-03-20 21:54


Memo Dîcle

STOKHOLM-Îro zarokan li Kitêbxana Kurdî ya Stokholmê NEWROZ bi xwendina helbestan û bi govendan pîroz kirin. Hunermendê Kurd-Swêdî ê film û şanoyê ê naskirî Özz Nujen beşdarî şahiya Newrozê bû û rengekî xweş da şahiya zarokan.

Mamosteyê zimanê kurdî Haluk Agrîn dibêje ’’Me du mamosteyan bi hevkariya Kitêbxana Kurdî ya li Stokholmê, îsal ji bo pîrozkirina Newrozê şahiyek bi xwendina helbestan amadekir. Ev çalakiyeke cuda û xweş bû. Dê û bav, û zarok jî bi vê çalakiyê gelek kêfxweş bûn.

Di rojên pêşda em ê vîdeoya xwendina helbestan li ser Youtubê biweşînin. Ez hêvîdar im ev cure pîrozkirin hersal bê kirin û bibe kevneşopî. Û bibe nimûne ji bo hemû kurdên Dîasporayê, ji ber ku zimanê me, hunera me jî wek Newrozê beşên girîng ên çanda me ne. Ew hevdu rind temam dikin’’

Çend helbest ji nav helbestên ku zarokan îro di Newrozê de xwendin:

KURDISTAN

Hezar, hezar sal û zeman
Hat dabirîn, çîyayên me man
Hezar, hezar av û tofan
Kişyan û çûn, kanîyên me man.

Hezar, hezar qebîl û ber
Ser axa me saz kirin şer
Weke berfa sîngê Sîpan
Helyan, dîsa çîyayên me man.

Hezar, hezar car par kirin,
Hezar, hezar nav lêkirin,
Tofanê şûşt dîsa birin,
Dîsa navên qedîm ser man.

Hezar, hezar sedsal herin,
Merd û nemerd ser bigerin,
Te bernadin em ji destan,
Welatê me xweş Kurdistan

(Rizalîyê Reşîd)

***

ROJBAŞ

Rojbaş dinya!
Rojbaş ewrên reş û sipî
Dar û ber, gîya, mêş û mûrî
Rojbaş roja zer û sîs
Gulên rengîn
Çûkên dengîn
Rojbaş zinarê mezin
Toza ber lingê min
Gelîyê kûr
Çîyayê dûr
Ava çirik
Gula dirik
Ba û baran
Rojbaş jîyan!

(Kemal Burkay)

***

DAYIKA MIN

Dayika min gelek şêrîn e,
Şêrîn e, şêrîn e, weke şekir,
Wek ezmanê şîn e, xweşik e
Kengê ez xemgîn dibim, hembêza xwe vedike
Ooo! çi nerm e, çi germ e hembêza dayika min!
Ez zanim ew ji min pir hez dike
Serê min dişo, porê min şe dike
Her car dibêje min: rinda min, delala min!
Hingê ez jî dibêjim, yadê tu rind î, tu delal î,
Tu şêrîn î, tu heval î,
Tu zelal î, tu helal î!
Ez ji te pir hez dikim yadê!

RENGÊN PAYÎZÊ

Dilopên baranê ketin xwarê
gul çilmisîn, reng li wan nema
vêsîn yek bi yek, roj bi roje
lê tu hîç xeman neke
û dil nesoje!
Binêre!
gulan rengên xwe dane pelên darê
pel zer bûne
û hin ji wan sor û mor
dikevin ber bayê payîzê
dibezin, direqisin li hawirdor
Dilxweş be, bi kakilê gûzê
bi rengê gizêrê, fêkîyên payîzê
Rûgeş be bi krîstalên sor, libên hinarê
û bi bîhna hemî zadên kevarê
Siruştê rengê xwe nû kir
Dem hat demsalê xwe gêr kir
Roja germ xwe ji me dûr kir
Cotkaro zû cot bike
Sivorîk tu amade yî?
zadê xwe kom bike!
Çûkên koçer firîn û çûn germistanê
Qijika belek hêlîna xwe rind çêbike
bisekine li benda zivistanê!

BARAN

Baran barî, baran barî,
Ji ezmanan baran barî
Ew hatiye ji ewrên reşe
Baran dike xuşe-xuşe

Li ber malan av dikişe
Vê baranê em şil kirin
Hemû çûkên li ser daran
Erdê hişk û mişk û maran
Bêhna erdê gelek xweş kir
Vê baranê geş kir jîyan
Ew pîroz be li gul û gîyan

(Haluk Agrîn)

***

ALA MIN

Ala min sore
Wek xwîna dilê mine.

Ala min sipîye,
Ew kevoka aştî ye.

Ala min zere,
Ew roja Kurdistane.

Ala min keske,
Wek mêrg û çîmene.

Ala min tim bilinde,
Wek Çiya yê Ararate.

Ala min pir kevne,
Ew bersinga Kawa ye.

Halit Balîn (Dilo)


Print