‘ WÎ! EZ TO RÊ BIMIRÎ!’

Eke nusneyê derg û ‘teorîyî, fikrê hîra û mesajê ‘analîzan’ fayde nêkenê, ma ‘derdê xo’ kilmek binusnime. Kesê ke nêwazenê rastê rastîye bibê, kesê ke rastîye ra tersenê, xora sima ci ra çi vanê, vajê, çi nusnenê, binusnê, nêwazenê bivênê, biwanê.

Sima heta ke qalê ‘soresvanîye’, qalê ‘welatperezîye’, qalê ‘serbestîye’, qalê ‘kamîye’ bikerê, rastîya ziwanî de ranêxelesînê.

Meremê!Fayde nêkeno!

Ez rind zanena ke, sima mi wanenê.

Ez rind zanena ke, sima vateyê mi zanenê.

Ez rind zanena ke, sima her serre’ roja ziwanî’ de, seba ke qaso vajê,’ziwanê xo ra wayîr vecînê’, ebe formalîteyan, qalê ziwanî kenê.

Ez rind zanena ke, sima tenya xo xapnenê.

Sima zi rind zanenê ke; ziwan ne hobî yo, ne zî her serre de, yew roje ‘virardîs o’.

Ez rind zanena ke, sima zaf bîyê asîmîle û heskerdîsê ziwanî zerreyê sima de vecîyo. Wendoxî zanenê kes ê ke ez bi nameyê ‘sima’ qal kena, kem ê.

Nînan ra yew kes, nê rojanê peyênan de, ancîna bi Tirkî, derga-derg qalê ziwan û wayîr wecîyene nusnabî. Helbet o bi xo zî, ziwanê xo nêzaneno.

Mi ke nusneyê ey wend, no sernusne ameya aqilê mi.

Mi xo bi xo va; ‘WÎ’ EZ TO RÊ BIMIRÎ!’

Nê kesî, hem kurdan xapnenê, hem zî dawa serbestîye xapnenê. Nê kesî, hem Kurdan ra çiman qirpnenê, hem zî dewleta Tirkan ra. Nê kesî Dewleta Tirkan ra vanê ‘ma bira yîme’, Kurdan ra zî vanê, ‘ma sima seveknenîme’. Nê kesî Kurdistan nêwazenê, la se ke wazenê, xo misnenê. Fekê nînan de çekuyê ‘hastîye, biratîye’ kemî nêbenê, la ê tenya seba faydeyê xo nê çekuyan û vateyan ruçiknenê.

Bawer bikerê, Dewleta Tirkî ke nînan ra vajo ‘ma kurdistan danê sima’, ê nêsonê û nêwazenê.

Ê ,koke ra henî bîyê Tirk ke, sima ebe vate û nusneyê înan ra qet gosdar mebê, qet ebe nînan mexapîyê.

Ilhami Sertkaya