Xîyal ke bisikîyo
Zaf ney, la senik bibo zî, xîyalê mi, çen reyî sikîya.
Xîyal ke bisikîyo, omid zî sikîno.
Xîyal û omidî, girêdayê yewînî yê. Nê serranê peyênan de xîyalê mi, di raya sikîyayî.
!- Mi zen kerdbî ke, gerîlayî, serekê gerîlayan, no durismeyê Ocalanî yo ke, çiman ver der o, seba sebebê hedefê gerîlayan qet çîyê
çîn o, zelal o, red kenê
No, çi heyf ke nêbî û endî ‘Turkiyayije’ ebe destê dewleta Tirkan ‘demê xo’ girewto.
2- Mi zen kerd ke, rojavayê Kurdistanî ke îsgalê dewleta Surîyayî de raxelesîyo, endî asteng nêmaneno ke, ebe dewleta Kurdistanê bakurî, benê yew.
No zî nêbî û xîyalê mi îta de zî sikîya
PYD, nê firsendî, ebe destê xo , durî kerd û keno. Xora temsîlkarê PYD yî eskera vanê ke ‘ ma letebîyena Surîya nêwazenîme’
Loro, loro!
Nê çîyê ecêbî, nê vate û planê ‘xorî û tarîyî’ kamî kerd para welatê ma û sarê ma?
Sima pêro zanenê, zanenê!
Xora musgulat zî no yo ke, ‘sima zanenê, la veng nêkenê’
De veng mekerê!
La, ma ra zi, mi ra zî mevajê ‘ma Kurdistano azad wazenîme’
Mevajê, çi ke ma doman nîme.
Plan ‘Turkîyayyij o, vate zî gege ‘Kurdistan o’!
Ebe kilama ‘Kurdistanî, ma bixapnê’, ebe planê entgrasyonê Tirkîyayî zî, sîyaset bikerê!
Ox! Ma zî ‘werd’.
Wa her kes rind bizano ke, her kes hewl bizano ke, yew sar, (hasa) pêro ehmaq nîyo.
Wa her kes rind bIzano ke, planê tarîyî, heta pêynîye tarî de nêmanenê.
Kamê ke xîyalê nê miletî ebe planê xorîyan siknê û siknenê, rojê hesab do bidê.
A roje zî do bêro!
Seba nînan ez reyêna ê persê xo pers bikerî;
‘sima ke dewlet bîyene û yew bîyena Kurdistanî nêwazenê, qey nê sarî xapnayî?’
Sima ke entegrasyon û Tirkîyayij bîyene wazenê, qey koyan de, Qandîl de, Basur de, Rojava de qalê herbî û ‘kantonan’ kenê?
Ma qey Amed de, Dersim de qalê ‘kantonî’ nêkenê?
Seba nê cayan ‘destur çîn o’ ha!
Nika zî bi nê planê ‘entegrasyonî’ weçînitîs kerdê wes. Meydanan de, nutuqan de, ancîna ne Kirmanckî, nê kirdaskî çîn o, ebe Tirkî qalê ‘çilo-pilo’ kenê.
Nê vateyî, nê çîyî xora estbî keko!
Sarê ma seba nê vateyê ke qet seba Kurdistanî çîyê çîn o, canê xo, domanê xo, malê xo, milkê xo nêda. Endî HDP, bîya leteyê partîya sîstemê Tirkîya.
A zî, seba naye, ‘kilama demokrasîye’ vana
A ‘demokrasîya ke, heqê dewlet bîyena Kurdistanî nêwazena!
Tew! Tew ke, çi tew!
XÎYALÊ MI YO KE SÎKÎYO, BASUR DE EWRO BERZ BENO!
TI WES BE, BASUR!
Ilhami Sertkaya