NIKA SINGAL; SODIRÊ TO BIXEYR!
Ma, silam dabî Kekûkî û vatbî; ‘sodirê to bixêyr’
Ez, ê lêlê sodirîyan rind zanena.
Dinya aleme o waxt bê qisawet, hewnê sîrinî der ê.
Tenya tayê kesî û tayê welatî, o waxt pay ra yê. Ruyê înan de, vayê lêlê sodirî herekînê, çimê înan, gilê koyan, xorîyîya neqebeyan der ê. Zereyê înan de kelecanîye, omid, virnîya înan de adirê herbî.
Barê xo giran ê, karê xo, zaf muhim ê.
Linga înan, mabênê vengan û bêvengîye der ê, fekê înan de, yew kilama beleke menda. Ya a kilame do vajê, ya zî lorike. Ya mizgîne, ya zî xebera binkewtîye. Ya huyayîs, ya berbus. Gilê koyan, seher û sukî, ebe tîja sodirî, ya birqîyêne, ya pelaxîyêne.
Pesmerge; ya ebe tîja sodirî, mizgîne zimnêne, ya zî a mizgîne tepya virdêne.
Pesmerge; nameyê xo ra zî aseno ke; ‘ver bi mergî’ sîyêne.
Pesmerge; ebe herbî kay nêkeno, ya serkewtene, ya serkewtene!
Pesmerge; omid o, elçîyê omidî yo.
Lêlê sodirî de, kewt raye pesmerge. Ver bi Singalî, giran bi giran sîyêne. Waxt ameya, çar het ra, eris kerdî. Ko, zingîya, zime û verojî ebe vengê çekê înan herekîya. Teyrê Singalî, ver bi asmen herekîyayî. Adirî dest kerdbî ci. Waxtê qesasê sarê ma yê ezidîyan, waxtê raxelesîyena Singalî bî. Serek Berzanî; (sey zaf qaso serekan, herb ra durî ney) zerreyê adirê herbî de bî ancîna.
Zalimê Singalî, çar het ra girotîya. Roje, roja pirodayîs û herisê (domanan ney, ê) pesmergeyan bî. Hedef zelal bî; raxelesîyena Sengalî!
Pesmergeyê qehremanî, hîna ke Dinya aleme hewnê xo yê sîrinî de bî, kewt Singal. Vengê pesmergeyan, suka Singalî de zimîya.
Alaya Kurdistanî, suke de berz bî.
Sey Kerkukî, se ke mi nê dîmeman dî, zerreyê mi ra bîhnêde xorîye, asteyê sêneyê mi berz kerd, na ro.
Na raya, a cumla fekê mi ra reyêna vecîya;
SODIRÊ TO BIXÊYR SINGAL
Dime ra; ez bi na kelecanîye kewta xîyalan. Mi xo bi xo pers kerd;
‘Gelo ez çi waxt sikîna vajî; ‘sodirê to bixêyer Dersim, Çewlig, Amed, Xarpit, GImgim, Wan, Agirî?’
Ez..
Çi waxt..
Wa xîyalê mi cayê xo de vindê, nika Singal.
Ebe pesmergeyî; SODIRÊ TO BIXEYR SINGAL!
Ilhami Sertkaya