VER BI VÎNDÎBÎYENE

Sima, ver bi vîndîbîyayîsî sonê.

Vîndîbîyayîsê sima, bêveng o.

Na Dinya de, merdena tewr xirabe, merdena bêvengîye ya.

Na Dinya de, vîndîbîyayîso tewr xirab, vîndîbîyayîso bêveng o.

Çimo ke qayt keno, nêvîneno, o çim zaf bîyo kor.

Goso ke, veng gêno, nêhesêneno, nêwazeno bihesêno, o gos, zaf ker o.

Aqilo ke,waneno, newazeno fam bikero, o aqil zaf xirab o.

Kam ê ke kerdê wayîrê nê çîyan û xuyanê xiraban, ê kesi ver bi vîndîbîyayîsî sonê.

Sima ver bi vîndîbîyayîsî sonê.

Mantiqo ke qaso sima bi fek, bi vate û teorîyan qebul nêkenê, qaso sima bi xo xapnayene ver bi ci vecînê; yanê Asîmîlasyonê Tirkan, ziwanê asîmlasyonî kerdê fek û ruhê sima, ebe hetkar û îdareyê ê ziwanî, binê tesîrê ê ziwanî de, xorî bi xorî, xo qedênenê.

Ziwanê sîyasetê sima, ziwanê asîmîlasyonî yo.

Ziwanê kultur û teorîyê sima, ziwanê asîmîlasyonî yo.

Rakewtena sima, ravastena sima, silam û kelamê sima, ziwanê asîmîlasyonî yo.

Gelo sima rast, çi wastêne û çi wazenê?

Gelo sima nê sarî ra çi vatbî û çi vatêne?

Soz û qerarê sima, vate û meramê sima çi bî?

Sima nêvatêne ‘ma wayîrê ziwan û kamîya xo bivecîme’?

Sima nêvatê, ‘ziwanê ma, rastîya ma, bîyena ma wa’?

Ê, hê..?

Bî çî?

Ma qey sima ‘wayîrê ziwanê xo nêvecînê’? Qey sima ziwanê xo nêmisenê, qisey nêkenê? Musgulat, asteng çik o?

De vajê; ‘derdê sima çik o’?

Sima qey xo û nê sarî xapnayî?

Qey hîna zî xapnenê?

Qey hîna zî nê sarî ra vanê ‘xo ver bidê, tekosine bikerê, pistî bidê ma’?

Seba çi? Tekosîna çikî? Seba çi sima nê sarî de ‘pistî dayene’ wazenê hîna?

Seba Tirkî û Tirk bîyenê?

O, xo ra est bî!

Seba Kurdistanî?

Kurdistano bê ziwan?

Lawo mekerê! Heyf o, guna wo no sar!

Bes o, kayê sima bes o.

‘Geldim,gitim, aldIm,verdIm, al û vêre’ sima bes o.

Guna nê sarî, guna nê ziwanî vileyê sima der o.

Ilhami Sertkaya