MÎTÎNGA HAK-PARê

BI SERFIRAZÎ DERBAS BÛ

Şandeyeke Partiya Maf û Azadiyan HAK-PAR, ji bo ku rapora xwe ya bi navê "Pêşniyazên ji bo bicîkirina demokrasiyê û çareserkirina pirsa kurd li Tirkiyê" pêşkêşî Yekitiya Ewropayê bike, di roja 3ê cotmehê hat Brukselê. Ji bo pêşwazîkirina şandeya kurd ya ku bi serokatiya serokê giştî yê partiya HAK-PARê A.Melik Firat hatin Brukselê, li dor hezar kurdên ji çaralî Ewropayê li ber parlamentoya Ewropayê civîyan. Bi coşeke mezin, bi dahol zurne pêşwazî kirin û bixêrhatin dan HAK-PARiyan. Li gor bernama ku ji alî Komela Piştgiriya HAK-PARê hatibû danîn mîtîngeke bi rêk û pêk hat derbaskirin. Nûnerên gelek sazî û rêxistinên kurd li wir amade bûn û piştgiriya xwe ji bo helwesta bi şeref û rûmet ya HAK-PARê dan diyarkirin.

Axaftina pêşin ji alî serokê Komela Piştgiriya HAK-PARê birêz A.Kadir Aslan hat kirin. Aslan, ji kurdên welatên cuda yên Ewropayê re spas kir ji bo ku beşdarî kirin û piştgiriya dane wan. Dûra xwediyê rojnama Dema Nû Aydogan Inal, dilxweşiya xwe ji bo piştgiriya kurdên Ewropayê bo HAK-PARê anî zimên û got ku HAK-PAR bi rastî ji bo çareserkirina pirsa kurd li Tirkiyê, xwediyê projeyeke giring e. Ev çalakiya îro tenê beşek ji wê projeyê ye. Divê hemû welatparêzên kurd herweha kurdên Ewropayê jî destê alîkarî û piştgiriyê bidin HAK-PARê.

Nûner û berpirsên gelek sazî û rêxistinên din jî gotar xwendin.Wek, serokê Komela Dijberên Şer Mehmût Kilinç, Serokê giştî yê KURD-KAVê M.Celal Baykara (ku bi xwe jî di nav şandeyê de bû), nûnerê Federasyona Komeleyên Kurdistan li Swêdê Kovan Amedî, berpirsê rojnama Peyama Kurd, Cotkar, li ser navê Platforma Kurdên Ewropa-PLATFORM mamosta Şexmûs Dip, li ser navê HEVKARÎ M. Ali, li ser navê Kurdistan Centrum Eziz Hamam di axaftinên xwe de HAK-PARî pîroz kirin û piştgiriya xwe nîşandan. Herwisa seroka Federasyona Kurdan li Swêdê Şermîn Bozarslanê jî bi şandina mesajekê piştgiriya FKKSê nîşanda.

Li ser navê KOMKARê jî serokê wê Fettah Tîmar axifî. Tîmar ji şandeya HAK-PARê û serokê A. Melik Firat re spas kir ku bi helwesteke kurdewarî ya rasteqîn, bi berxwedan ji bo azadiya gelê kurd tevdigerin. Ew meşa HAK-PARê ji Diyarbekrê heta Brukselê careke din nîşanî me da ku gelê kurd ber xwe dide, bi hêvî ye û wê her bi serkeve.

Hemû gotarvanan, di axaftinên xwe de rûmeteke mezin dan helwesta HAK-PARê û pêwistiya dîtina pirsgirêka kurd li Tirkiyê ji alî Yekitiya Ewropayê ve anîn zimên. Di gotaran de hat destnîşan kirin ku eger Ewropa ji siyaseta înkar û asîmilasyonê re çavê xwe bigre û bi wî halî Tirkiyê bigre nav xwe pirs wê dijwartir be û her berdewam bike. Lê gelê kurd bindestiyê qebûl nake, divê ev ji nuha ve bête zanîn.Û hemû gotarvanan, li ser giringiya yekitî û yekdengiya kurdan, hevdugirtina kurdan bi tundî sekinîn.

Axaftina dawî ji alî serokê şandeyê herweha serokê giştî yê HAK-PARê A.Melîk Firat ve hat kirin. Melik Firat silav li beşdarên mîtîngê kir û got we zehmet dît hûn hetin we destê alîkariyê da me. Ez gelekî kêfxweş im, di nav we de ez xwe ne wek kalekî 80 salî lê wek xortekî 18 salî hîs dikim. Ji vir 80 sal berê wextê dewleta Tirkiye hat damezrandin, û welatê me hat parvekirin li Ewropayê ji kurdan kesek tunebû, bilî Şerîf Paşa. Ew bi tenê bû û gelekan ji welat têlgiraf dişandin digotin ew me temsîl nake. Ismet Paşa xwe wek ji xelkê Sîêrtê da nişandan û peyman îmze kir. Îro êdî kurdên xwedî xîret û zana hene ku bikarin bersiva siyaseta îro bidin, rê nedin Lozaneke dudyan. Di vî warîde HAK-PARê gav avêtiye, ji bo mezinbûn xurtbûna vê gavê hewceyî alîkarî û piştgiriya me hemû kurdên welatparêz e. Îro hatina we hêz daye me. Sibê em ê bi serwerên YE re rînên danûstandinê bikin, daxwazên xwe yên gelê xwe bigihînin wan."

Di bernama mîtîngê de sazbend û hunermendan ji folklora kurdî nimûne pêşkêşkirin. Koma govenda zarokan ya Komela KOMKAR-Hamburgê û hozan Rezan reng dan çalakiyê. Bi vî awayî meşa ji Diyarbekrê heta Brukselê gihîşt dawiyê.