Yekemîn pêşangeha pirtûkên kurdî li Elmaniyayê çêbû

Di rojên 6,7 û 8ê hezîranê de li Elmaniyayê li bajarê Kölnê, yekemîn pêşangeha pirtûkên kurdî bi beşdarbûna bêtirî 20 weşanxaneyên kurdî ji çaralî Ewropayê vebû. Pêşangeha yekemîn li Elmanyayê ya ku bi navê Cegerxwîn hatibû sazkirin, di van sê rojan de wek daxuyaniyeke mişterek ya kurdên Ewropayê ji bo pêşxistina zimanê kurdî û çanda kurdî pêkhat. Roja pêşin di vekirinê de 300 kes amadebûn û roj bi roj beşdarî û eleqe zêdetir bû.

Pêşangehê bi axaftina Newroz Çolemêrgî destpê kir. Piştî vekirina pêşangehê serokê KOMKARê Fettah Timar li ser giringiya kar û xebatên bi vî rengî kir. Timar di axaftina xwe de got ku wê baştir bibûya eger dezgehên kurdan bi hevra ev pêşangeh vekirana. Daxwaza me di serî de ew bû ku KOMKAR tevî hin saziyên din bi vî karî rabin. Me ji hin derdorên eleqeder re jî pêşniyar kir ku em bi hevra bikin, lê mixabin weha nebû. Em hêvîdar in ku ev yek sala pêş pêk.

Piştre serokê Partiya Maf û Azadiyan (HAK-PAR) Ebdulmelik Firat axaftineke kurt kir. Di destpêkê de, Firat li ser giringiya yekbûna Kurdan rawestiya û got: "Em bi hevdu re bin, tikes li hemberî me namînin!". Firat ku çend roj berê ji Kurdistana Başûr vegeriyabû behsa ger û hevdinên xwe yên Kurdistana azad kir û razîbûna xwe ji rewşa gelê kurd ê vêderê nîşanda. Piştre wî pesnê amadekarên pêşangewhê (KOMKAR) da û bangî Kurdan kir ku li pirtûk û wêşanên kurdî xwedî derkevin.

Serokê  PENa Kurd Zerdeşt Haco jî derbarî giringaya pêşxistina zimanê kurdî yê nivîskî kir û di axaftina xwe de spasî KOMKARê kir ku bi sazkirina vê pêşangehê rabûye
Xwediyê weşanxaneya APECê Elî Çifçî jî li ser pirtûka kurdî û rewşa zimanê kurdî  û weşangeriya kurdî axifî. Çiftçî behsa hin tradisyonên kurdên Swêdê ên baş û rûniştî kir, wek çêkirina civînan bi zimanê kurdî, axaftina nav malê de bi zarokan re bi kurdî û hwd.

Koma Dîlan bi govendên xwe, Koma Nemrûd, hunermend  Fatê, Zibêr Yûsif û Sedat Karakaş bi deng û awazên xwe rengek dane pêşangeha pirtûkan.

Weşanxeneyê kurdan wek DENG. OZ-GE, DOZ, KOMAL, AK-PA FIRAT, Weşanên KOMKAR, AFÎŞ, HAVÎBÛN,PIYA, PSK-Riya Azadî, PDK-Îran, PYDK-S û KOMJIN (JIYAN) û ji Swêdê, jî ku ji alî weşanxanyên kurdî ve pêşketiye, weşanxaneyên Roja Nû, APEC, Nûdem û Pelda, Pirtûkxana Sara beşdarî pêşangehê bûn. Herweha nivîskar Hesenê Metê, Laleş Qaso, Firat Cewerî, M. Ali Kut, Salih Omerî, Goran Candan, Seyîdxan Anter jî ji Swêdê beşdar bûn. Gelek rewşenbîr û siyasetmedarên kurd wek cîgirê serokê HAK-PARê Ramazan Karaman, Mahmut Kilinc, Necdet Buldan, Zekî Öztürk, Şükrü Gümüş di vekirina pêşangehê de amade bûn.

Di nav çarçova çalakiyên Pêşangehê de çend semîner an jî sohbet pêk hatin. Roja duwemîn nivîskar û helbestvanên kurd  Eskerê Boyîk û Hisên Hebeş, û roja dawî jî Nazîf Telek li ser berhemên xwe axafîn û bi guhdaran re sohbet kirin û kitêbên xwe ji beşdaran re îmze kirin.

Berpirsiyarên KOMKARê ji beşdarî û eleqeya kurdan razî bûn, û ev pêşangeh digel kil û k-masiyên xwe ve wek tecrubeke baş pejirandin û li gor gotina wan ewê hewl bidin ku sala bê hîn rêkûpêktir organîze bikin.