23/04/2003
GENERAL JAY GARNER li Kurdistanê bi coş û kêfxwesiyeke mezin hat pêşewazîkirin. Roja duşemê bi lîderên kurdan Mesût Barzanî û Celal Talabanî re hevdîtinek pêkanî. Piştî Hewlêrê çû Silêmaniyê û li wir jî kurdan bi heyteholeke mezin xêrhatin lê kirin û spasî û razîbûna xwe ji helwesta DYA re dan diyarkirin. Wî jî bi gotinên xwe hêvî û xweşbînîyeke mezin da gelê kurd.

Garner li Hewlêrê bi rojnamevanan re civîneke presê pêkanî. Li ser civîna xwe ya bi Mesût Barzanî û Celal Telebanî re agahdarî neda rojnamevanan. Tenê bi tundî ravekir ku di wextekî herê nêzik de hukumatek wê bê avakirin, û hingê êdî Amerîka û ingilîz wê li vir nemînin.

Generalê Amerîkî ê teqawûtbûyî Jay Garner roja çarsemê li Hewlêrê di axaftina xwe ya bi rojnamevanan re li pêş parlamenta Kurdistanê li ser çîmenan got:
-Em li vir di nav baxçeyekî xweş û tekûz de sekinîne. Nuha di hemû Iraqê de intibayeke wek ya vir xweş meriv nabîne.
-Li îdareya kurdan temaşekin, wan li vir bakûr, gelek pirs û problemên xwe bi awayekî demokratîk çareser kirine, ku gelek ji wan probleman li tevaya Iraqê hene û li benda çareser kirinê ne
Di gera xwe ya Kurdistanê de gelek peyamên hêvîdagirtî da kurdan. Wek: "Rewşa idarî civakî ya kurdan wê ji tevaya Iraqê re bibe nimûne". "Hûn kurd milletekî mezinin, dahatuya we jî mezin e","Kerkûk bajarê kurdan ne". û hwd.
Bi seredana waliyê Iraqê General Jay GARNER hêviya kurdan ji bo dahatuyeke xweş zêdetir bû. Ji alî cîhanê ve şansê miletê kurd vekirî xuya dike. Êdî maye li ser meşandina siyaseteke biaqilane û perspektiveke yekgirtî û neteweyî ji alî rêberên siyasî ve... Çavê çil mîlyon kurd li ser gotin û kirinên wan e.