Rojnamegeriya kurdî
bû 107 salî

22 Nîsanê, roja salvegera damezrandina rojnameya kurdî ya herî pêşin “KURDISTAN”ê ye. Loma 22-ê Nîsanê wek "Roja Rojnamegeriya Kurdî" tê bîranîn û pîrozkirin.

Ev roj di tevgera rewşenbîriya kurd da rojeke giring e. Ew li welat û dervayî welat bi gelek awayên cuda tê pîrozkirin.

Rewşenbîrê mezin Miqdat Midhat Bedirxan, di 22ê Nîsana sala 1898a de li Qahîrê, paytextê Misirê dest bi derxistina rojnameya kurdî ya pêşin "KURDISTAN"ê kir. Sedemê ku rojname ji welatê bav û kalan, Kurdistanê ewçend dûr, li Misirê hatiye derxistin ew e ku, dewleta Osmanî ji şiyarbûna kurdan, ji bilindbûna azadîxwaziya miletê kurd ditirsiya û loma nedihîşt rewşenbîrên kurd bi serbestî karê weşanê bikin. Piştî ku rojnamê li Misrê dest bi weşanê kir, dewleta Osmanî zext li Misrê kir ku wê qedexe bike. Li ser zext û zordestiya dewleta Osman, rojnameya Kurdistan bi neçarî gelek cîh guhastin. Bedirxanan rojnameya “Kurdistan” derbasî Ewropayê kirin. Piştî Midhat Bedirxan begê, birayê wî Evdirehman Bedirxan barê derxistina rojnamê hilda ser milê xwe. Di çar salan da li menfiyê, di rewşeke dijwar da 31 hejmarên rojnamê derketin.

Kovar, rojname, rêxistin, partî û dezgeyên kurdî hemû roja 22-ê Nîsanê wek rojeka rojnamegeriya kurdî bi bîr tînin û pîroz dikin. Em jî, wek Roja Nû bi minnetdarî Midhat Bedirxan begê, birayê wî Evdirehman Bedirxan begê bi bîr tînin û di rêça wan de dimeşin.