Xelata Charles Cros ya îsal gihîşte

Şivan Perwer

Xelata muzîka cîhanî  ya îsal gihîşte hunermendê Kurd Şivan PERWER. Komîteya xelatê ya Akademiya Charles Cros, bi minasebeta CDya Şivan ya dawîn “Min bîrîya te kiriye” ev xelat di roja 18ê meha 11an de li Parîsê pêşkêşî wî kirin. Şivan ji vê xelatê re layîq hate dîtin ji ber ku wî muzîk xistiye xizmeta azadiya milletê xwe.

Xelat di bin parastina serokomarê Fransayê Jacques Chirac de ji alî komîteyekê ve hate dayîn.

Di merasima xelat dayinê de rewşa milletê kurd ya îroyîn, êş û dijwarîyên ku kurd dibînin û hêvî û gumanên wan ji pêşerojê û ji cîhanê hat behskirin û bîranîn. Herwisa di van hissîyetên kurdan de rola muzîka Şivan çiye hat behskirin. Şivan jî bi axaftineke kurt û gotina strana ”Ferman e, ferman e, fermana me kurdan e” spasî komîtê û Jacques Chirac kir. Di merasimê de Kamuran Ji-Kîkan, wek sekreterê instituya Kurdî û werger beşdar bûbû. Me Birêz Kikan li Diusburgê di şahiya 30 saliya damezrandina PSK de dît û li ser girtina xelatê jê agadarî girtin, wextê Şivan tenê ji bo kişandina fotoyekê hebû....

Em hunermendê gelê kurd ê mezin Şivan PERWER ji bo xelata wî ya nû pîroz dikin, û hêvîdar in ku ew hela hê gelek xelatên mezin bigre.

Charles Cros (1842-1888) kî ye?

Charles Cros ê fransî, mirovekî ne nexwende û nenivîser bûye, lê di warê muzîkê de hunermendekî piralî û şareza bûye. Ew herweha şairekî hezkirî jî bûye, lê tiştê ku ew li cîhanê daye naskirin ew e ku, wî cara yekemîn Gramafon îcat kirîye. Ji bextreşiya wî re hevalekî wî yê nêzîk fikra wî diziye û li ser navê xwe qeyd kirîye. Ango wî di şûna Cros de xwe wek îcatkarê Gramafonê daye naskirin û bûye xwediyê patentê. Dûra hatiye tesbîtkirin ku xwediyê fikra gramafonê yê rastî Charle Cros e.

Navê Charles Cros li Akademiya Muzîkê kirine. Her sal bi nave wî ji hunermend yan jî berhemên hunerî yên bijartî yên salê re xelat tên dayîn. Xelat di bin parastina serokomarê Fransayê de ji alî komîteyekê ve tê dayîn.

JARNAME

Dîwarekî spî, pir mezin, rût, tevde rût
Li ser diwêr nerdewanek, bilind e bilind
Li ber dîwêr çilazek, jar e jar
Zilamek ji wê da hat, destên wî qilêr in qilêr
Hildaye destê xwe çakûç û bizmarek, serî tûj e tûj
Glokek jî bend, saxlem e saxlem.

Hilkişiya ji pêpelûkê, bilind e bilind
Bizmarê tûj kuta, teq teq teq
Li ser tepelûka dîwêr, rût e rût.

Çakûç ji destê xwe avît, ket ha ket
Serê bizmar, bend avîtê, dirêj e dirêj
Bi serî ve girêda çilazo, jar e jar

Dîsa daket xwarê ji pêpelûkê, teq req teq req
Li piştê çakûç û pêpelûk, giran e giran
Lêxist çû dereke din, dûr e dûr.

Ew roj ev roj e, çilazo belengazo jar e jar
Guneho bi serê bend ve, dirêj dirêj
Bi nazikî li ba dibe, dibe ha dibe.

Min ev çîrok ji ber xwe ve çêkir, hêsan hêsan
Bila har bibin hin kes, cidî cidî
Û ji boy ku zarok bikenin, biçûk biçûk.

Charles Cros

(Wergera ji zimanê tirkî: Haluk Ozturk)