Sed û du saliya ji dayik bûna BARZANÎ hat pîrozkirin

Bi helkefta bîranîna bi rûmet ya sed û du saliya ji dayik bûna BARZANIYÊ nemir, Komîta Hevkarî ya Hêzên Siyasî yên Kurd û Kurdistanî, Fedrasyona Komeleyên Kurdistanê û Înisyatîva Kurdên li Swêdê, di roja 13/3/2005 de civîneke bîranîn û prozbahiyê li darxistin. Ji herçar alî Kurdistanê bi sedan kurd beşdarî civînê bûn û hezkirin û rêzgirtin ji bo têkoşer û rêberê mezin ê miletê kurd nîşandan.

Civînê bi xwendina sirûda "Ey şehîdan!" dest pêkir. Li ser navê , Komîteya PDK li Swêd, Nûnertiya Hukumeta Herêma Kurdistanê, Komîteya Hevkarî, Federasyona Komeleyên Kurdistanê li Swêdê, Însiyatîfa Kurdên li Swêdê, Partiya Komunîst û gelek partî û rêxistinên din gotar xwendin, yan jî mesajên xwe pêşkêşî komîteya amadekar kirin.

Bi meşandina bernameyê re, li ser perdeya mezin resmên mezin yên Barzanî û pêşmergeyan hatin raydan. Car bicar parçeyên muzîkê, stran û sirûdên şoreşgerî hatin xwendin. Civîn bi xwendina "Ew reqîb" giha dawiyê. Bi vî awayî Kurdan careke dî serok û rêberê mezin Barzanî û xebata wî ya bêhempa bi bîr anîn, jê re rêz û hezkirina xwe nîşandan.