ŞEHÎDÊN HEWLERÊ HATIN BÎRANÎN

STOKHOLM-14 Gulan 2005- Îro li paytextê Swêdê Stokholmê civînek ji bo bîranîna şehîdên kareseta 4ê Gulanê ya ku li Hewlerê qewimîbû hat li dar xistin. Civîn ji alî Komîteya Hevbeş ya rêxistinên Kurd li Swêdê (Komîteya Hevkarî - Federasyona Komeleyên Kurdistan li Swêdê - Însiyatîfa Kurdên Swêd) hatibû amadekirin. Di civîna bîranînê de, hin mirovên şehîdan, nûnerên partî û saziyên kurd û swêdî û herweha ji hemû beşên Kurdistanê gelek kesên welatparêz beşdar bûn.

Civînê bi rawestina bi deqîqeyekê ji bo rêzgirtina şehîdan û xwendina sirûda "Ey Şehîdan" dest pê kir, dûra nûnerên partî û rêxistinên kurdî, swêdî û erebî gotar xwendin. Li ser navê Komîteya Hevkarî Şefik Kaya, li ser navê Federasyonê Şermîn Bozarslan, li ser navê Însîyatîfa Kurdên Swêd Azîz Aliş gotar xwendin. Peyama nûnerê Hukumeta Herêma Kurdistanê li Bakurê Awropa Taha Berwarî, û Komîteya YNK li Swêd hatin pêşkêşkirin. Herweha nûnerên partiyên swêdî, ji Sosyal Demokratan (s) Maria Hassan, ji Partiay Çep (v) Mat Einarsson, Yekitiya Ciwanê Lîberal ên Partiya Gel (fp) Fredrik Malm gotar xwendin.
Nûnerên komîteyên hevbeş yên kurd û ereban jî beşdarbûn û gotar pêşkêş kirin. Di hemû gotar û peyaman de terorizm û fundementalîzma dînî hat mehkum kirin û lanetkirin.
Di nav bernamê de hunermendên kurd car-car sirûd û helbestan pêşkêş kirin.
Civîn bi xwendina "Ey reqîb" giha dawiyê.