Hejmara 28a ya Dema Nû hat komkirin. Sedemê komkirina rojnamê, çend nivîsên wê ne; yek jê nivîsa bi sernivîsa"Bern Newrozuna saldiri ve tepkiler"," (Êrişa ser Newoza Bernê û reaksiyonên dijî wê) û nivîsa Kemal Burkay bi sernivîsa "PKK ve KADEK, Olup biten ne, degisen ne?" (PKK û PADEK, çi bû çi guherî?).

Goya di van herdu nivîsan da bi riya weşanê propaganda ji bo rêxistinek ilegal ya terorîst hatiye kirin?! Lê ev herdu nivîsên han çawa ku "edaleta" dewletê îddîa dike propaganda PKK nakin, eqsê wê kiryarên PKK yên xirab rexne dikin. Gelo xêr e? Xuyaye dewleta tirk naxwaze kesek behsa kiryarên PKK yên xirab bike û wê rexne bike. Dîsa nivîsek din bi sernavê "Kürtler azinlik degil" (Kurd ne minorite, ango eqeliyet in. Nivîs beyana partiya HAK-PAR e) û nivîsek jî bi sernivîsa "Kemalizim ve Kürdler" (Kemalizm û Kurd) e. Goya armanca wan herdu nivîsan jî parçekirina Komara Tirkiyê ye, û li gor qanûna çapemenîyê gereke ew rojname bê komkirin...

Belê xwendevanên hêja, ji vê re şiroveyeke taybetî pêwîst dike gelo? Hertişt ne zelal û eşkere ye? Dewleta tirk ya ku niha di riya Yekîtiya Ewrûpa (EU) da ye, qet naxwaze kurd bîhna xwe bistînin. Wê PKK ji xwe ra kirîye behane û her daxwazeke mafê insanî û demokratîk ku ji alîyê kurda ve tê kirin wek "xizmeta terorostîyê" nîşan dide.Û weha dixwaze zordestiya xwe li ser gelê kurd bidomîne û dinyayê bixapîne...