8 Adar 2003

Roja 8ê adarê rêxistinên kurdan li Stokholmê li dijî planên dewleta tirk ku dixwaze bikeve Kurdistana Îraqê meşeke mezin lidarxistin. Di meşê de nêzîkî 5000 kes beşdar bûn.
Van rojana kurdên Ewropayê û taybetî yên li Swêd li ser gef û tehdîda dewleta tirk li dijî Kurdistana başûr ketine nav tevgereke xurt. Li herderê meş û mîtîngên protestoyê pêktînin. Wek tê zanîn du hefte berê jî dîsa li Stokholmê xwepêşandaneke giring pêkhatibû.

Kurdên Swêdê vê carê çalakiyeke mezintir pêkanîn. Bi hezaran kes berê li meydaneke nav Stokholmê kom bûn, li wir hunermend Nasir Rezazî û civatê bi hevra "Ey reqîb" xwendin û piştî axaftinên kurt, meşê dest pêkir. Di meşa Stokholmê de sloganên "Demokratî bo Îraq, azadî bo Kurdistan!", "Turkiska armeen ut ur Kurdistan" "Na! Na! Na! Tirkiye na!" "Bye bye Saddam!" hatin bangdan.

Li ber sefareta Tirkîyê zimanê kurdî û swêdî li ser daxwaz û armanca xwepêşandanê hat qisekirin. Kurdan careke din li dijî dagirkeriyê, ji bo azadiya gelê kurd û Kurdistanê bi xurtî dengê xwe bilind kirin. Ev çalakî jî her wek ya du hefte berê bi amadekariya Komîta Hevkarîya Hêzên Siyasî yên Kurd û Kurdistanî, Federasyona Komeleyên Kurdistanê, Platforma Kurdên Ewropa, Yekitîya Jinan, Yekitiya Ciwanan çêbû.