STOCKHOLM-07-11/04-Federasyona Komeleyên Kurdistanê li Swêdê, di bin navê "Rojên Kurdî" de du rojan li ser hev pirsên integrasyonê û zimanê zikmakî konferans û panêl pêkanîn.

ÎNTEGRASYON
Roja pêşin li ser întegrasyonê û pirsgirêkên malbatên kurd û ciwanên wan sê semîner û panêlek hat derbaskirin.
Di destpêkê de seroka FKKS Şermîn Bozarslanê civîn vekir, piştre mamosteya întegrasyonê Xunav Xoşnavê li ser pirsên întibakirina malbatên kurd di civata Swêdê de axifî, û ji serpêhatiyên xwe û malbatên kurd nimûne pêşkêş kirin. Xoşnavê pêwîstiya fêrbûna kurdan ji sîstema dibistanên swêdî ku bi şêweyekî demokratî tê meşandinê anî zimên. Wê got ku berdewamiya zimanê kurdî li dîasporayê di destê du kesan de ye, ew jî dê û bav e.

Sureya Calli, ku di warê tevgerê (rabûnrûniştin) de pispor e, li ser problemên nivşeyî yên ku di navbera dêûbav û ciwanan de peyda dibin qise kir. Wê di dawiya axaftina xwe de destnîşan kir ku nasnama etnîkî di nav ciwanên kurd de gelekî xurt e, gelek ji wan kurdî nizanibin jî, bi kurdbûna xwe serbilind in. Ew çanda kurdî, yan jî tradîsyonan nepejirînin jî dixwazin kurdbîna xwe hertim derxînin pêş. Divê dê û bav bi hişkî li dijî kirin û fikrên wan dernekevin, berî hertiştî riya dîyalogê tercîh bikin.

Semînereke din jî ji alî psîkolog Marcela Bravo hat dayîn. Wê jî li ser rewşa malbatan di pêvajoya koçberî û integrasyonê de, qise kir.
Di dawiyê de panêlek li ser pirsgirêkên di pêvajoya kocberî û integrasyonê de, çêbû. Beşdarên panêlê Şermîn Bozarslan seroka FKKS, Seyran Duran seroka YJK, Çiyavan Bamernî serokê YCK, raya xwe gotin ka rêxistinên kurd û merciyên swêdî bi çi awayî dikarin alikariya malbatên kurd bikin...

ZIMANÊ ZIKMAKÎ

Roja duwemîn li ser pirsa; "Ji bo parastin û zindîkirina zimanê kurdî çi pêwist e?" ji alî Reşo Zîlan û serokê Instituya kurdî li Parîsê Kendal Nezan yek semîner hatin dayîn. Wana li ser rewşa zimanê kurdî û xetera asîmîlasyonê qise kirin. Kendal Nezan herweha li ser kar û xebatên Înstituyê agahdarîyeke fire da guhdaran.

Civîna dawiyê panelek bû ku, li wir pirsa;"Pirtûkên kurdî yên zarok û mezinan - ji bo bêtir xwendina wan çi pêwist in?" hat gengeşî kirin. Penêlîst ev kesana bûn: Haşim Ahmadzadeh, mamoste - nivîskar; Firat Cewerî, nivîskar - weşanxana Nûdem; Dr. Abdulbaset Seyda, nivîskar; Haluk Ozturk, nivîskar - Weşanxana Roja Nû; Ali Çiftçî, weşanxana APEC; Izzet Osman Farxa, mamoste; Xunav Xosşnav, mamoste. Panel ji alî nivîskar Silêman Demîr ve hate rêvebirin.
Ji ber kêmbûna wext, her panelîstekî dîtinên xwe tenê di pênc deqîqan de gotin. Sedemê kêmxwendina pirtûkên zarokan û çareserkirinê pirsgirêkê, panêlîstan bi çend gotinan dîtin û pêşniyazên xwe anîn zimên. Ji kêm-kalîtebûna pirtûkan, nebûna kevneşopiya xwendinê di nav malbatên kurd de bigre heta rewşa siyasî û civakî gelek sedem hatin dîyarkirin. Dawiyê civînê de hat pêşniyazkirin ku Federasyon li ser vê babetê civîneke taybetî çêbike. Seroka Federasyonê ev pêşniyaz di cî de dît û got ku ew ê di rojên pêş de civîneke weha çêbikin û dîsa gazî weşanger, mamosteyên ziman û nivîskaran bikin. Di bernamê de, derxistina deklerasyoneke daxwazên kurdên Swêdê ji mercên swêdî, ji Tirkiyê û ji Hûkûmeta Kurdîstanê hebû, lê ji ber nemana wext, ev daxwazî bi cî nehat.

Digel kil û kêmasiyên xwe, civînên herdu rojan, çalakiyeke Federasyonê ya serkevtî bû.