Siyasetvan û rewşenbîrê kurd Hemreş Reşo çû heqiya xwe

Serokê Partîya Demokrata Kurdistan-Bakûr Hemreş Reşo, di roja 27’ê Çileyê Pêşîn da li Elmanya çû heqîya xwe. Bi wefata wî tevgera Kurd sîyasetvan û rewşenbîrekî xwe yê hêja winda kir. Navê Hemreş yê li ser kaxez Hamdî Turanli ye. Di sala 1939 da li Kahta ya Semsûrê (Adiyeman) hatîye dinyayê. Piştî xilaskirina lîse demekê li Zanîngeha Enqerê, beşa huquqê da xwendîye û di sala 1963 da derketîye dervayî welat, li Elmanya cîwar bûye. Ji wê çaxê heta wefata xwe li Elmanya jiya.

Hamreş Reşo hîna di xortanîya xwe da kurdekî welatparêz bû. Li dervayî welat jî di warê sîyaset û çanda kurdî da kar û xebata xwe ajot. Li vir piştgirîya tevgera Kurdistana Iraqê kir, bû endame KSSE (Komela Xwendekaran Kurd li Ewrûpa). Tevî hin hevalên xwe rêxistina Bahoz avakir û kovara Çîya derxist. Kovara Hawar, beşa latînî ji nû va çapkir.

Di salên 80’yî da di kar û xebata ji bo avikirina Yekitîya Hêzên Kurd (Tevgera Rizgarîya Kurdistan-TEVGER) da Hemreş jî wek nûnerê PDK-Bakûr hebû.

Di sala 1992’yan da tevî hin rêxistinên dinê PDK-Hevgirtin avakirin û ew bû serokê vê yekitîyê. Piştî ku rêxistina wî navê xwe guhart bû PDK-Bakûr dîsa ew bû serokê partiyê. Heta wefata xwe serokatiya partiya xwe kir. Hemreş Reşo zewicî bû û bavê pênc zarokan bû.

Bi wefata wî gelê kurd welatparezekî xwe yê hêja winda kir. Bila serê malbata wî, heval û hogirên wî û gelê kurd saxbe.