KOMKAR-Swêdê komcivîna xwe ya 30-yî çêkir

KOMKAR-Swêd (Komela Karkerên Kurdistan li Swêd) roja 15 çile 2006 komcivîna xwe ya 30-yi çêkir. Komcivînê bi rawestina deqîqekê ji b o rêzgirtina şehîdên Kurdistanê dest pê kir. Piştî xwendina rapora xebatê ya sala çûyî, li ser raporê, xebatên komelê guftugo  çêbûn; kêmasî hatin testnîşankirin û rexnekerin, kar û çalakiyên baş hatin pesinandin. Ji bo dewra pêş dîtin û pêşniyazên cuda hatin kirin.

 Hebûn û çalakbûna komelê ya piştî 30 salî wek ciyê şanazî û kêfxweşiyê hat behskirin. Komîteyeke karger ya nû hat hilbijartin ku ji heft kesan (sê jin û çar mêr) pêk tê. Ji jinan Sevgî Yildiz wek seroka komelê hat hilbijartin.

Çend faktayên kurt di heqê KOMKAR-Swêdê de:

KOMKAR-Swêd yek ji wan komeleyên kurdan yên aktif e ku li diasporayê bi kar û xebatên xwe yên çandî  xizmetên berbiçav kiriye. KOMKAR-Swêd komela herî kevn e li swêd, ew di damezrandina Federasyona Komeleyên Kurdistan li Swêd de xwediyê roleke sereke ye. Ew yek ji şeş komeleyên avakarê Federasyonê ye. Vê komelê yekemîn weşanxaneya kurdî vekiriye li vî welatî û heta nuha 65 pirtûkên bi zimanê kurdî weşandiye; nêzîkî bîst û pênc salan kovareke kurdî çandî (ROJA NÛ) derxistiye. KOMKAR-Swêd îro jî pirtûkên kurdî derdixe û belav dike, li ser înternetê weşandina kovara Roja Nû dewam dike, komên folklore yên KOMKAR-Swêd îro jî reng didin cejn û şahiyên kurdan. Li nav Stokholmê lokaleke komelê heye ku wek maleke kurdan naskirî ye.