Li Stokholmê:

Bi hezaran kes ji bo referandûma bo serxwebûna Kurdistanê meşiyan

Bi amadekariya Komîteya Referandûmê bo serxwebûna Kurdistanê, îro (21 sibatê 2004) li paytextê Swêd Stokholmê xwepêşandanek çêbû.

Meşê ji meydana nav bajêr (sergelstorg) destpêkir ber bi sefareta Amerîkayê birêket. Li ser pêwîstiya sazkirina referandûmekê, bi zimanê kurdî, swêdî û îngîlîzî hat qisekirin. Nûnerên partiyên swêdî piştgirîyeke temam dan daxwaza kurdan ji bo refarendûmeke ku ji alîyê NY(Neteweyên Yekbûyî) (FN) li Kurdistana başûr bête sazkirin. Rêvebirin çalakiyê di axaftinên xwe de ji partiyên siyasî yên Swêd, ji sendîka û saziyên demokratîk û ji gelê Swêdê bi tevayî piştgirî xwestin ji bo pêkanîna referandûmekê li Kurdistana başûr.

Hunermend Nasir Rezazî, Merziye Ferîqî, Leyla Ferîqî û hindekên dî sirûd û stranên welatperwerî pêşkêşkirin Ji aliyê komîteyê ve li meydana kombûnê îmzayên piştgiriyê hatin komkirin. Li ber sefareta Amerîkayê daxwaznama komîtê bi zimanê ingîlîzî hat xwendin, slogan ji bo azadiya Kurdistanê û referandûmeke demokratîk hatin bangkirin. Şandeyekê nama komîteyê birin sefareta Amerîkayê. Çalakiya kurdan bi awayekî gelekî bi rêk û pêk gihîşt dawiyê. Polêsê swêdî ji beşdarên çalakiyê re sipasiyên xwe pêşkşêkir ku bê teşqele û problem çalakiyeke mezin gihandin dawî. Ji rûçkên beşdaran ku bi saetan di bin sermayê de sekinîbûn, tenê dilxweşî û razîbûneke eşkere xuya dikir çimkî wan îro erkekî welatparêziyê pêkanîbûn... Wan careke dî dan xuyakirin ku kurd şiyar in û ji bo daxwazên xwe yên neteweyî li ser piyan in...